Македонија
Заев вети, институциите исполнија, хотелот во Лагадин на чичко Никола е легален
По десетина поништени решенија на Општина Охрид и исто толку жалби од инвеститорот, две пресуди на Управен суд и нешто повеќе од шест години надмудрувања меѓу институциите, хотелот во Лагадин, за кој охриѓани предупредуваа дека прекршува 12 закони и е спротивен на Уставот, може легално да се догради.
Хотелот може да се догради по одобрението издадено во 2016 година
Шестгодишниот синџир од институционални преписки за поништување на одобрението за градење на хотелот го прекина Министерството за транспорт и врски. Ја прифати последната жалба од инвеститорот Никола Толевски и првпат по издаденото спорно одобрение за градење во 2016 година, не ја поддржа Општина Охрид во обидите за поништување на документот. Министерот Благој Бочварски на посебна прес-конференција на почетокот на месецот ја оправда постапката повикувајќи се на пресуда од Управениот суд од минатата година, кој пресуди во корист на инвеститорот бидејќи немало доволно докази оти не пријавил навреме дека почнува со градба во услови кога објектот е веќе изграден. Министерот уверуваше дека и покрај одлуката што ја донеле, со која хотелот станува легален, не се исцрпени сите можности да се поништи одобрението за градење. Укажа дека Управниот суд дал насоки Општина Охрид да најде друг основ за поништување на одобрението и се понуди лично да му помогне на градоначалникот да ја провери целата постапка за издавање на одобрението доколку не може сам да го направи тоа.
„Досега Општина Охрид се нема обратено за евентуална правна помош за предметната постапка. По тужба на инвеститорот, Управниот суд донесе пресуда против решението на Министерството за транспорт и врски и Општина Охрид и го задолжи Министерството за транспорт и врски да постапи мериторно, но ѝ дава можност на Општина Охрид да ја прегледа повторно постапката за издавање одобрение за градење и доколку има друг основ, да го огласи за ништовно одобрението за градење по друг основ. Исто така, и Националната комисија за УНЕСКО ѝ дава препорака на Општина Охрид да го преиспита одобрението за градење“, велат од Министерството за транспорт и врски за „Макфакс“.
Пецаков: Хотелот стана легален со потпис и амин од министерот Благој Бочварски
Градоначалникот на Охрид, пак, Кирил Пецаков, за евентуалната помош од министерот чека официјална понуда од Министерството за транспорт и врски.
„Понудената помош е единствено дадена само во изјава за медиуми. Соработката треба да биде на институционално ниво“, вели градоначалникот Пецаков за „Макфакс“.
За една година и четири месеци, колку што е градоначалник на Охрид, тој двапати донел решение за поништување на одобрението за хотелот во Лагадин. Со нив Општина Охрид издала вкупно десет решенија за поништување на одобрението за градење на хотелот.
Со мериторната одлука на второстепената комисија завршуваат предметот и процесот за овој инвеститор, вели градоначалникот на Охрид, Кирил Пецаков
„На 9.6.2022 година е едното прогласување за ништовност и на тоа од Министерството за транспорт и врски има одговор дека се поништува решението што го издал првостепениот орган и предметот се враќа кај првостепениот орган на повторна постапка. И повторно Општина Охрид го прогласува за ништовно истото одобрение за веќе на десеттото решение од второстепената комисија при Министерството за транспорт и врски од 1.12.2022 година, кое станува правосилно на 1.3.2023 година, да се поништи решението на градоначалникот на општина Охрид, без да се врати повторно на одлучување на првостепениот орган. Сето тоа е потпишано и аминувано од страна на министерот за транспорт и врски, Благој Бочварски“, вели градоначалникот Пецаков.
На прашањето дали веќе бара друг основ за понишување на одобрението, како што насочува Управниот суд, тој вели дека по мериторната одлука на Министерството за транспорт се исцрпени сите постапки за овој инвеститор.
„Првпат во историјата, барем за Општина Охрид, второстепената комисија на Министерството за транспорт и врски одлучува мериторно, но не како што кажува законот дека вториот пат треба да одлучи мериторно, туку одлучува десеттиот пат мериторно и му дава правосилност истиот орган, а не Општина Охрид, што значи дека истото одобрение, кое е издадено во 2016 година, сега стапува во сила. Со ваквиот епилог на постапката основата поради која Општина Охрид го поништувала одобрението за градење веќе не држи, а со мериторната одлука на второстепената комисија на Министерството за транспорт и врски завршуваат предметот и процесот за овој инвеститор, односно според Законот за управната постапка, првостепениот орган треба да ја почитува одлуката на второстепената комисија“, вели градоначалникот Пецаков.
Бочварски го критикува Пецаков, но не размислува да му ги одземе ингеренциите
Иако е очигледно несогласувањето меѓу двете институции, Министерството за транспорт и врски, кое може да ѝ ги одземе ингеренциите на Општина Охрид и да најде друг основ за поништување на одобрението место само да нуди помош и јавно да го критикува градоначалникот, засега воопшто не размислува за таква можност.
„Во овој момент Министерството за транспорт и врски не размислува за одземање на ингеренциите. Напротив, интенцијата е да продолжи процесот на децентрализација, сѐ со цел поефикасно управување со градежното земјиште“, велат од кабинетот на министерот Бочварски за „Макфакс“.
И градоначалникот на Охрид, Кирил Пецаков, не размислува да иницира барање одговорност од својот сопартиец Никола Бакрачески, кој како градоначалник на Охрид на крајот на 2016 година го издаде одобрението за градење на хотелот.
Исполнето ветувањето на Заев до чичко Никола
Министерот за транспорт и врски, Благој Бочварски, со последната одлука го исполни ветувањето што поранешниот премиер Зоран Заев му го даде на инвеститорот Никола Толевски. Пред четири години, Заев, на трибина на СДСМ во преполната сала „Билјанини извори“, Толевски го нарече чичко Никола и му вети дека ќе се реши проблемот. Рече и дека со чичко Никола си праќале пораки за хотелот, а тој, пак, објасни дека не се работи за хотелски комплекс, туку за обично објектче со осум соби и девет апартмани.
„Дури и да постои правно-формален аспект во одделението за урбанизам, не може да се каже не. Не може – не бидува. Најлесно е да биде не. Ќе најдат начин како да биде да. Ќе се реши проблемот. Ако треба, ќе ја земам сега второстепената одлука во мои раце и ќе дојдам тука“, му рече Заев на Толевски во март 2019 година.
По ова ветување на Толевски, Заев во Владата им даваше ветувања и на жителите на Лагадин, кои бараа карабината да се урне.
Нејасно е како е занемарен Законот за водите, кој не дозволува градби 50 метри од брегот
Павлов препорачува изнаоѓање на правен механизам, со кој ќе се спречи понатамошното градење на објектот
Зоран Павлов, претседател на Комисијата за управување со светското природно и културно наследство на Охридскиот Регион, има забелешки за постапката за издавање на одобрението. Комисијата не била вклучена во постапката оти почна со работа во 2018 година кога одобрението веќе беше правосилно, но во сила беа законите за кои Павлов вели дека требало да се почитуваат.
„Зачудува фактот што не е почитуван Законот за управување со светското природно и културно наследство, кој е донесен во 2010 година, каде што една од целите е спречување активности што негативно влијаат врз исклучителните универзални вредности на светското природно и културно наследство во Охридскиот Регион, како и начелото на должна заштита. Исто така, не е јасно како е занемарен и Законот за водите, каде што се наведува дека е забрането градење во крајбрежниот појас од 50 метри“, вели Павлов.
Тој смета дека продолжувањето со градба на спорниот објект само ќе ја потврди немоќта за справување со состојби што негативно влијаат на исклучителната универзална вредност на Охридскиот Регион.
„Препораката, секако, е во насока на изнаоѓање на правниот механизам, со кој ќе се спречи понатамошното градење на објектот имајќи ги предвид сите досега издадени одобренија и акти. Во таа насока ја поддржуваме и заложбата и на Националната комисија за УНЕСКО, која ѝ препорача на Општина Охрид повторно да ги разгледа активностите поврзани со градбата. Државата доби многубројни препораки и одлуки на Комитетот за светско наследство, кои ги потврдуваат заложбите на УНЕСКО, а се во насока на подобрување на состојбата и зачувување на статусот на светско наследство“, вели Павлов за „Макфакс“.
Нерешавањето на проблемот со спорниот хотел може само да претставува поттик за слично постапување, кое Павлов вели дека во ниеден случај не е посакувано кога е во прашање статусот на светско наследство на Охридскиот Регион.
Толевски ќе го догради хотелот
„Ќе го доградам, зар така да го оставам“, вели инвститорот Никола Толевски
Никола Толевски, инвеститорот на хотелот, по последната одлука на Министерството за транспорт и врски, вели дека ќе продолжи да гради. Вели дека само барал правда бидејќи Општината му издала одобрение за градење, па тој се охрабрил да вложува.
„Не прашувајте ме колку пари вложив. Прашајте колку луѓе и нерви изгубив во текот на овие години. Општината ми зеде 200.000 евра за комуналии, па ми го поништи одобрението. Ќе го доградам, зар така да го оставам. Нема да стигнам за оваа сезона, но ќе го доградам. Не знам зошто само за мене се крена толкав метеж. Еве малку подолу, кон Пештани, има поголем објект од мојот и тоа уште поблиску до брегот, а никој не го споменува, си се гради“, вели Толевски за „Макфакс“.
Од протестот пред хотелот во 2017 година
Хотелот во Лагадин го следат скандали уште од темели. Почна да се гради во декември 2016 година за време на новогодишните празници. Соседите се пожалија дека им испукале ѕидовите и подовите при копањето на јамата за хотелот и од тогаш почнаа да се организираат за да ја спречат градбата. На нивно барање инспекцијата излезе на терен и утврди дека инвеститорот, иако гради, нема пријавено дека почнува со градење. Еден месец по почнувањето со градба, на 25 јануари 2017 година тој пријави дека гради, а во март Општината првпат му го поништи одобрението за градење бидејќи не известил навреме. Тогаш ја градеше втората плоча, но без разлика на поништеното одобрение, Толевски истовремено се жалеше на второстепена комисија и градеше. Сопре кога изгради четирикатница.
Жителите на Лагадин летото 2017 година излегоа на протест пред хотелот. Бараа да се поништи одобрението и да се урне карабината. Прецизно ги бележеа сите прекршувања што ги прави објектот и ги документираа на страницата на „СОС Охрид“. Издејствуваа и многу од институциите да се изјаснат против градбата, но по одлуката на Управниот суд, велат дека сосема изгубиле надеж. Некои од нив едвај чекаат Толевски да го догради хотелот оти сега просторот околу него е жабарник и депонија.
Со оваа сторија „Макфакс“ се приклучува кон кампањата за зголемена транспарентност на институциите што Институтот за комуникациски студии ја спроведува во соработка со медиумите, во рамките на проектот „Користи факти“, кој е поддржан од Британската амбасада.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Битиќи: На крај на годината во буџетската каса фалат една милијарда евра
На денешната седница за пратенички прашања, пратеникот од Социјалдемократскиот сојуз на Македонија, Фатмир Битиќи, предупреди дека фискалните показатели објавени на 25 ноември откриваат сериозен јаз во приходната реализација на Буџетот.
Наместо планираната динамика, рече тој, државата досега наплатила близу 299 милијарди денари, што е само 82,32% од годишниот план, оставајќи дупка од над 64 милијарди денари или 1,04 милијарди евра, средства кои треба да се обезбедат до 31 декември годинава.
Во прашањето уaптено до заменик министерот за финансии, Николче Јанкуловски , пратеникот Битиќи праша по кои ставки, во кои износи и од кои извори ќе се обезбедат приближно 64,07 милијарди денари (околу 1,04 милијарди евра) за целосна приходна реализација до 31.12.2025 година, дали со дополнително задолжување и на кои финансиски пазари, дали со вонредни и еднократни приходи и дали може јавно да се гарантира дека заради „буџетско затворање“ на годината нема да се доцни со поврат на ДДВ, нема да се создаваат нови доспеани, а неплатени обврски кон фирмите и нема дополнително да се кратат капиталните расходи.
„Евидентно е дека приходната страна на Буџетот не ја следи сопствената проекција и од ден во ден, како се приближува крајот на годината, расте ризикот или потребата од ново задолжување, одложување на финансиски обврски кон стопанството и граѓаните, селективни доцнења на поврат на ДДВ. Заклучно со 31.10.2025 даночните приходи и придонесите се реализирани со 78,61% од планираното (од 250,922 милијарди денари), што значи дека во последните два месеци од годината треба да се „надомести“ повеќе од една петтина од целата годишна наплата, амбиција која историски ретко е остварлива без вонредни мерки. Подсекторскиот пресек е уште поалармантен. Оваа приходна конфигурација на Буџетот зборува за тоа дека е производ на преценета наплата, потценети ризици и затворен процес на планирање кој ја оддалечува фискалната политика од развојните цели“, образложи Битиќи.
Македонија
Мицкоски: Ако се жалат судиите со 3-4.000 евра месечни примања, тогаш како им е на дечињата во градинка кои немаат играчки за играње
Реновираме градинки, училишта, цениме дека е поголем приоритет отколку да ги зголемиме платите на судиите и обвинителите. Мислиме дека е фер, нагласи премиерот Христијан Мицкоски, на денешната собраниска седница за пратенички прашања.
Премиерот Мицкоски нагласи дека следен чекор кој, исто така, е важен се законите во ресорот правда.
„Тоа се законите јавно обвинителство, за судови, за јавно обвинителска служба и за служба во судовите кој се однесува за две работи, едната е да можат судовите и обвинителствата да вработуваат само со одобрение на Судски совет и Совет на јавни обвинители, а Владата да ја информираат, што е во ред, но не можеме да се согласиме со тие средства кои треба од буџетот да ги одвојуваме за да бидат зголемени примањата, ако се жалат со 3-4.000 евра месечни примања, тогаш како им е на дечињата во градинка кои немаат па играчки за играње. Тој е буџетот, го украле, останале малку пари, тоа што останало ние се трудиме да менаџираме како што треба, реновираме градинки, училишта, цениме дека е поголем приоритет отколку да ги зголемиме платите на судиите и обвинителите. Мислиме дека е фер“, нагласи премиерот Мицкоски.
Премиерот додаде дека следен чекор кој помина на владина процедура е новиот закон за Судски совет и се усогласува со Канцеларијата на Европска Комисија и за брзо ќе се најде во Собрание.
„Потоа е делот на објавување на регистар на компании во кои државата има некаков удел, не доминантен, туку некаков удел, тоа се претпријатија во кои државата е сопственик, законот заедно со професори од Правен факултет го направивме, го доставивме до Министерство за економија и труд и Министерство за европски прашања и очекуваме скоро да се усогласи и во декември да се најде во Собрание. Понатаму има дел во кој давачки и процедури кои треба во три институции да бидат усогласени тоа се Централен регистар, Малмед, односно Агенцијата за лекови и Министерството за економија и труд во делот на Централен регистар е завршено тоа се шест, во Малмед се 19, десет усогласени, девет ќе се усогласат и останува уште три во Министерство за економија и труд и ова ќе биде завршено во рамките на оваа година. Понатаму имаме либерализација на железнички сообраќај, во делот на инфраструктура, транспорт, и веќе се реализираше состанок со Канцеларијата на Европската Комисија договорени се активностите. Имаме комплетирање на вработувања во рамките на Агенција за одземен имот, и работните места ќе бидат пополнети“, изјави премиерот Мицкоски.
Тој најави и дека владата ќе продолжи да ги субвенционира сметките за електрична енергија за домаќинствата
„Следниот чекор е исто така значаен кој не можеме да го исполниме, а се однесува во делот на енергетиката, а тоа е целосна либерализација на пазарот за електрична енергија, пред сѐ, се мисли на домаќинствата, затоа што ако Владата престане да ја субвенционира електричната енергија за домаќинствата тогаш цената ќе поскапи за отприлика 30% до 35% и тоа ќе предизвика инфлација и ќе има верижен ефект врз многу други процеси, и затоа ние како држава продолжуваме да ги субвенционираме сметките за електрична енергија за домаќинствата и сите на регулираниот пазар“, потенцираше премиерот Мицкоски.
Македонија
Амбасадорот на ЕУ во посета на Кочани
Амбасадорот на Европската Унија во Северна Македонија, Михалис Рокас, денес го посети Кочани. За време на неговата прва посета на општината по локалните избори, амбасадорот Рокас им оддаде почит на жртвите од неодамнешната трагедија и се сретна со новоформираните локални власти, како и со претставници на заедницата.
Посетата започна на градските гробишта, каде што амбасадорот Рокас и неговиот тим положија цвеќе во спомен на 63-те жртви во трагичниот пожар што настана на 16 март 2025 година. Потоа следеше состанок со новиот градоначалник на Кочани, Владко Грозданов, кој се фокусира на локалните приоритети, потребите на заедницата и тековната поддршка од ЕУ за развој на општината. За време на последователниот состанок со Општинскиот совет, беа разменети мислења со новоизбраните советници за јавните услуги, локалното управување и соработката со иницијативите финансирани од ЕУ.
„Попладнето се одржаа серија дискусии зад затворени врати: една со здружението на родителите на жртвите, „16 март 2025“ и друга со групата преживеани лица од кочанската трагедија. И двете дискусии понудија безбеден простор за споделување на искуството и ја истакнаа важноста на континуираната поддршка и почитувачката вклученост, вклучително и на државно ниво. Дискусиите ги водеше експерт од Центарот за психосоцијална и кризна акција „ЦПКА Малинска“, професионална агенција која уште од самиот почеток на трагедијата ѝ нуди психосоцијална поддршка на заедницата во Кочани“, се наведува во соопштението.
Посетата, исто така, посочи на широк спектар на иницијативи поддржани од ЕУ кои се планирани за Кочани и за поширокиот Источен регион. Тие вклучуваат напори за подобрување на управувањето со животната средина, надградба на медицинската опрема во клучните области на здравството и поддршка на енергетски ефикасна реконструкција на јавни згради. Исто така, се работи на долгорочен пристап за користење на термалните води во Кочани на одржлив начин.
Младинскиот ангажман ќе биде зајакнат преку новата Јуроп хаус (Europe House) во Кочани, со која се создава простор за креативност, учење и проекти во заедницата. Локалното граѓанско општество и независните медиуми ќе имаат пристап до нови можности за финансирање, додека подобрувањето на безбедноста на работното место останува важен приоритет за идната поддршка од ЕУ.
Се очекува дополнителна соработка преку претстојните експертски работилници за квалитетот на здравствената заштита и иницијативата Тим Европа, предводена од Романија.
Посетата заврши во „Гнездо“, каде што средношколци се приклучија на креативната работилница на Јуроп хаус користејќи формат на игра во стил на списание за да го истражат раскажувањето приказни и дизајнот на младите. Активноста е дел од тековната соработка помеѓу Јуроп хаус и заедницата во Кочани.
По посетата, амбасадорот Рокас ја испраќа следната порака: „Кочани покажа сила во година обележана со катастрофална загуба. Денес дојдовме пред сè да ја слушнеме и да ја поддржиме заедницата. Посветеноста на семејствата, посветеноста на локалните институции и енергијата на младите луѓе тука се јасни. Европската Унија ќе остане сигурен партнер додека Кочани продолжува да заздравува и да се движи напред.“
Мицкоски: Ако се жалат судиите со 3-4.000 евра месечни примања, тогаш како им е на дечињата во градинка кои немаат играчки за играње
Реновираме градинки, училишта, цениме дека е поголем приоритет отколку да ги зголемиме платите на судиите и обвинителите. Мислиме дека е...
Поради превенција од свлечиште на Водно надлежните на итна координација
Поради превенција за активирање на свлечиштето на падините на Водно, во близина на улиците „Белградска“ и „Партенија Зографски“, и реалната...
Филков до СДСМ: Груевски има политички азил, се занимавате со циркус, а не со реална работа
Министерот за правда Игор Филков одговарајќи на пратеничко прашање од Миле Талески од СДСМ, зошто не се бара екстрадиција на...
По вчерашното труење со храна во „Димо Хаџи-Димов“, вонредна инспекција во кујните на девет основни училишта во Карпош
Инспекциски тимови од Агенцијата за храна и ветеринарство (АХВ) денес спроведуваат вонредни инспекциски контроли во кујните на 9 основни училишта...
Мицкоски: Главен фокус в година ќе бидат капиталните инвестиции, целта е да дојдеме до раст на БДП над 4 отсто проценти
Премиерот Христијан Мицкоски на денешната седница во Собранието за пратенички прашања истакна дека в година главен фокус на Владата ќе...
Нема да биде екстрадиран: Ацо Боцевски, 28 години по убиството, живее во Грција и издава соби
Солунскиот жалбен совет одлучи да не го екстрадира во Македонија 60-годишниот Ацо Боцевски, познат под прекарот Циганот, осуден на повеќегодишна...
(Видео) Тешка сообраќајна несреќа во Србија: четири лица загинаа во судир на комбе и работна машина – валјак
Во тешка сообраќајна несреќа што се случи рано утрово, околу 6:20 часот, на патот помеѓу Ириг и Рума во Србија,...
(Видео) Сообраќајна несреќа во центарот на Скопје: пешак удрен од автомобил пред гимназијата „Јосип Броз-Тито“
Во текот на вчерашниот ден на улицата „Димитрие Чуповски“ пред гимназијата „Јосип Броз Тито“ во центарот на Скопје се случи...
Суспендирана миграцијата од Авганистан во САД откога Авганистанец застрела припадници на Националната гарда во близина на Белата куќа
Двајца припадници на Националната гарда на Западна Вирџинија се во критична состојба откако вооружен човек отвори оган врз нив во...
(Видео) Нови податоци: најмалку 55 лица загинаа во пожарот во облакодер во Хонг Конг
Бројот на жртви од катастрофалниот пожар што зафати станбен облакодер во Хонг Конг се искачи на најмалку 55, потврди противпожарната...
Двајца гардисти застрелани во близина на Белата куќа; Трамп: Животното што го изврши злосторството ќе ја плати највисоката цена
Двајцата војници на американската Национална гарда кои беа застрелани во близина на Белата куќа во среда се во критична состојба,...
Девојка убиена, млад маж повреден во напад на ајкула во Австралија
Една жена загина, а еден маж е сериозно повреден во напад од ајкула во близина на популарно место за сурфање...
Хамас побара евакуација на своите борци што останаа заробени во тунелите
Палестинската екстремистичка група Хамас ги повика земјите-посредници да извршат притисок врз Израел да им дозволи на десетици нејзини борци да...
Муцунски во Стразбур: Македонскиот јазик, идентитетот и достоинството на граѓаните не може да бидат предмет на преговарање
Министерот за надворешни работи и надворешна трговија, Тимчо Муцунски, попладнево учествуваше и се обрати на 24-тиот состанок на Мешовитиот парламентарен...
ДСЗИ нареди вонредно чистење и здравствени прегледи на вработените во училиштето „Димо Хаџи Димов“
Државниот санитарен и здравствен инспекторат освен затворање на кујната во училиштето „Димо Хаџи Димов“ во Влае како потенцијален извор на...
Гаши: Ниедно билатерално прашање не смее да стане пречка на нашиот европски пат
Ниедно билатерално прашање не смее да стане пречка на нашиот европски пат. Ние остануваме подготвени за принципиелен дијалог со сите...
Мицкоски: Нема да има нови ресори, еден човек ќе биде и вицепремиер и министер
Нема да има нови ресори, еден човек ќе биде и вицепремиер и министер за нешто, изјави денеска премиерот Христијан Мицкоски...
Во развиените држави ги среќавам моите најдобри студенти, а на Клинички ме фаќа страв каква услуга ќе добијам, рече Беќаровски
Партизацијата тотално го деградира квалитетот на јавното здравство и затоа итно се потребни системски промени за кои мора посилно да...
Повеќе од 900 жени годинава жртви на семејно насилство: „Оваа бројка е повик за итна акција“
Сега е време да се обединиме и да ја промениме приказната, да ставиме крај на насилството врз жените и девојките....
Словенија ги призна возачките дозволи oд Македонија
Словенија усвои измени на Законот за возачите, со кои им се овозможува на носителите на возачки дозволи издадени во Македонија,...
