Македонија
(Видео) Заев: До 20 јуни да се обидеме да најдеме решение за името

Со решение за името, шансите се огромни да добиеме датум за преговори со ЕУ, рече премиерот Заев на пратеничко прашање oд опозицијата – дали Македонија има гаранција дека ако го смени името ќе добие датум за членство во ЕУ.
„Убеден сум дека сме на пат кон можно решение. Шансите се огромни да добиеме датум со решение на спорот штo трае 25 години. До 20 јуни да се обидеме да најдеме решение“, рече Заев.
Премиерот не одговори дали прифаќањето на ерга омнес важи за кој било друг предлог за името, како што важеше за предлогот Илинденска Македонија, прашање кое кон него го упати пратеничката Лилјана Кузмановска од ВМРО-ДПМНЕ. Таа побара одговор и зошто Грција го одби предлогот Илинденска откако Заев објави дека за тоа се договориле со Ципрас.
„За да го соопштам Илинденска, значи со Ципрас сме се усогласиле до степен да се провери овој предлог дома со другите чинители. На лидерската средба бев убеден дека има надеж, но грчката страна, за жал, го одби предлогот“, рече Заев.
Во врска со нон-пејперот, Заев го повтори ставот на Владата дека не е тајна оти во ЕУ има дебата за процесот на проширување и дека Холандија и Франција се скептични, но тоа според Заев не требало да ја обесхрабрува Македонија, која добила чиста препорака во последниот извештај на ЕК.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од денес пуштен во употреба магистралниот пат Охрид-Св.Наум, најави Владата

Македонија се гради. Денес официјално ќе биде пуштен во употреба магистралниот пат Охрид-Св.Наум во должина од 24,3 километри, најавуваат од Владата.
Вредноста на проектот за реконструкција на овој патен правец, како што е појаснето во официјалното соопштение изнесуваше 11,7 милиони евра.
„Ова значи дека по речиси 4 децении, не само охриѓани, туку голем број на граѓани ширум државата, но и туристи ќе можат да патуваат од Охрид до манастирскиот комплекс Св. Наум, но и до соседна Република Албанија, по нов патен правец.
Овие капитални проекти го подобруваат не само туристичкиот, туку и економскиот напредок и развој во Македонија.
Владата работи и создава дела за просперитет на Македонија“.
Македонија
Без вода дел од Кисела Вода

Регионалниот центар за управување со кризи на Град Скопје, по добиеното известување од ЈП Водовод и канализација, информира дека денеска поради изведување на водоводен приклучок на водоводна мрежа со пречник од Ф-150 мм на улицата Христо Татарчев бр. 47, прекинато водоснабдување ќе имаат корисниците од истата улица и кулите – Расдник, oпштина Кисела Вода.
Водоснабдувањето ќе биде прекинато од 09:00 часот до завршување на работните активности.
Македонија
Сончево и топло, максималната температура ќе достигне до 34 степени

Времето денеска ќе биде сончево и топло со мала локална облачност. Ќе дува слаб до умерен, а наместа долж Повардарието повремено засилен ветер од северен правец. Минималната температура ќе биде во интервал од 9 до 19, а максималната ќе достигне од 27 до 34 степени.
Во Скопје, сончево и топло. Ќе дува умерен, во делови од котлината повремено засилен ветер од северен правец. Минималната температура ќе се спушти до 17, а максималната ќе достигне до 34 степени.
Времето во наредните денови
Во следните денови времето ќе биде стабилно, претежно сончево и топло. Ќе дува умерен, во сабота наместа долж Повардарието повремено засилен северен ветер.