Македонија
Заев за наградата „Евалд Фон Клајст“: Со Ципрас поставивме основа за тоа како треба да работат идните генерации

На свечена церемонија, во присуство на дел од највисоките гости на годинешната Минхенска конференција за безбедност, на премиерите на Северна Македонија и Грција, Зоран Заев и Алексис Ципрас, синоќа им беше врачена наградата „Евалд Фон Клајст“ што овој угледен форум ја доделува како признание за особен придонес за мирот и стабилноста во светот и за афирмација на принципите на трансатлантската алијанса.
Како што информираат од владината-прес служба, наградата на двајцата премиери, во име на организаторот на конференцијата, им ја врачил германскиот министер за надворешни работи, Хаико Маас, кој во своето обраќање по тој повод истакнал дека Заев и Ципрас успеале да го направат тоа што не им успеало на сите нивни претходници во изминатите 30-тина години и дека наградата „Евалд Фон Клајст“ не може да има подостојни добитници од нив двајца.
Во своето обраќање по повод наградата, Заев истакнал дека него и неговиот пријател Ципрас ги обединиле надежта, дијалогот и заедништвото и дека со решението на спорот меѓу двете земји, Европа и Балканот стануваат едно – Балканот како ново место на надеж, како место за дијалог и заедништво, како место за стабилност и соработка. Премиерот додал дека заедно со грчкиот колега наградата им ја посветуваат на сите млади од Балканот и дека тоа што тие го прават денеска е основа за она што младите луѓе, идните генерации, ќе го создаваат утре.
Ципрас, пак, во својот говор нагласил дека освен договорот меѓу двете земји и признанијата за нив, огромна награда е и темелот за пријателство што го поставиле со Заев како основа за заедничката иднина на народите на двете земји како сојузници и земји членки на НАТО и на Европската Унија.
Домаќинот на свечената церемонија на доделување на наградата „Евалд Фон Клајст“ на Минхенската конференција за безбедност, премиерот на Баварија, Флоријан Херман, во своето обраќање потенцирал дека премиерите Заев и Ципрас се лицата на новите европски лидери кои го најавуваат времето за нови идеи и партнерства во решавањето на најсложените прашања со кои се соочува светот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити изврши увид на градежните активности за изградба на примарната водоводна мрежа во Мерово, Желино

Првиот заменик-претседател на Владата и министер за животна средина, Изет Меџити, придружуван од градоначалникот на општина Желино, Блерим Сејдиу и пратеници од регионот, денеска изврши увид на градежните активности за реализација на проектот за изградба на примарната водоводна мрежа во селото Мерово, општина Желино.
Проектот предвидува изградба на дистрибутивната мрежа за водоснабдување во рамките на селото, изградба на поврзувачки цевковод од резервоарот до главната мрежа, отворање на нов бунар покрај постојниот, како и рехабилитација и проширување на веќе изграден резервоар.
Досега е извршено отворање на еден бунар и изградба на еден резервоар, кои во рамките на овој проект ќе бидат финализирани и модернизирани.
Вкупната вредност на инвестицијата изнесува 15.847.359 денари, обезбедени од буџетот на надлежното министерство, а градежните активности се очекува да завршат до крајот на 2025 година.
„Одржливото снабдување со вода е еден од најважните приоритети на нашата Влада, бидејќи е директно поврзано со квалитетот на животот на граѓаните и развојот на нашите населени места. Со овој проект ставаме крај на децениските проблеми со недостиг на водовод во Мерово и им обезбедуваме на жителите подобри услови за живот“, истакна првиот заменик-претседател на Владата, Изет Меџити.
Оваа инвестиција претставува дел од стратешките проекти кои имаат за цел унапредување на основната инфраструктура и задоволување на елементарните потреби на граѓаните во сите населени места на општина Желино и пошироко.
Македонија
На Табановце се чека околу 10 до 15 минути за излез од државата

Поради пожар во националниот Парк Јасен, регионалниот пат Р1106 Македонски Брод – Скопје затворен е за секаков вид на возила.
Сообраќајот на државните патишта се одвива непречено, по суви коловози. Интензитетот на сообраќајот на патиштата надвор од градските средини е зголемен.
Поради летните одмори, се бележи зголемена фреквенција на возила, на ГП Табановце времето на чекање за излез е околу 10-15 минути. На останатите гранични премини од македонска страна нема подолги задржувања при влез или излез од државата.
Македонија
Општина Карпош: Го демантираме другарот на Мицкоски, Сотир Лукровски, дека има нерешени 11 000 предмети за легализација, а тој ќе ги решел за две и пол години

„Општина Карпош во целост го демантира другарот на Христијан Мицкоски, Сотир Лукровски, дека во општина Карпош има нерешени 11 000 предмети за легализација и замислете, тој ќе ги решел за две и пол години. Фактите говорат дека општина Карпош од 2011 до 2018 година има примено вкупно 12688 барања и од нив досега се решени 9385, а останати се уште 3303 барања“, велат од општина Карпош.
„Најголем дел од нив се со нерешени имотно-правни и оставински постапки и се чека на завршување на судска постапка, на друг дел е побарана дополнителна документација, и мал дел се во постапка за решавање.
За кандидатура на градоначалник основен услов за кандидатот е да биде добро информиран и да не кажува лаги. Ако кандидатот во кампања кажува лаги, какво ли ќе биде неговото функционирање како Градоначалник!?
Општина Карпош го замолува г-дин Христијан Мицкоски да го едуцира својот кандидат и го замолуваме да не ги вознемирува директорките на градинките и училиштата“, соопшти општина Карпош.