„Во последните шест месеци Владата ги зголеми платите на вработените во здравството, образованието и безбедноста. Просветните работници и сите вработени во образованието добија покачување од 12 проценти. Првото покачување од 5 проценти го добија со септемвриската плата исплатена во октомври минатата година. А второто покачување од 7 проценти го добија со мартовската плата, исплатена во април“, велат од Владата.

„Со ова го враќаме изгубеното достоинство на просветните работници кои ги создаваат идните генерации во државата.

Здравствените работници, медицинските сестри, техничари и административен персонал за шест месеци добија покачување на платите од 15 проценти. Додека пак, матичните лекари и гинеколози добија покачување на капитациониот бод од 33 проценти, а стоматолозите на 22 проценти.

Службените лица во МВР кој се грижат за безбедноста и сигурноста на граѓаните и државата добија покачување на платите од 10 проценти. За ова зголемување на платите на 12.000 полицајци од буџетот се обезбедени 800 милиони денари.

Владата се грижи за сите граѓани. Зголемувањето на платите продолжува, до крајот на мандатот во здравството и образованието предвидено е да се зголемат за 46, односно 50 проценти“, се наведува во соопштението на Владата.

„Продолжената рака на Заев, Филипче е човек со криминален багаж зад него. Филипче е човек кој има голем број на афери кои се поврзани со него. Филипче беше член на Влада и не одговараше за модуларната болница, за провизиите од вакцините, за Онкологија и други афери“, соопшти ВМРО-ДПМНЕ.

„Филипче е дел од системот кој го уништуваше здравството изминатите години, а на грбот на граѓаните се богатеше.

Филипче е човек кој нема кредибилитет да биде политички лидер и е потрчко на неговиот ментор Зоран Заев. Филипче прави како што ќе каже Заев и тоа е се што треба да знаете за него.

Филипче не може да понуди ништо ново на политичката сцена, нема решенија на проблемите кои тој со Заев ги создадоа во Македонија. Филипче има политика на уништување на стандардот за живеење во Македонија.

Филипче е синоним за корупција и криминал. Филипче е завршена приказна за Македонија!“, се наведува во соопштението на ВМРО-ДПМНЕ.

„Демократската унија за интеграција најостро ја осудува одлуката на Владата за именување на Петар Богојевски за раководител на Агенцијата за европски образовни фондови – институција што има за цел да ги приближува младите кон европските вредности, а не да ги навредува и понижува“, велат од ДУИ.

„Именувањето на човек кој целата своја јавна и политичка кариера ја изгради со навреди и омаловажување кон Албанците, претставува директна провокација не само за Албанците во Северна Македонија, туку и за самата европска идеја во земјава.

Посебно иронично и трагично е тоа што истиот овој поединец беше предмет на кривична пријава токму од партиите на Влен во Владата – а денес, со нивна поддршка, е награден со водечка функција.

Овој чин е јасен сигнал: навредите кон Албанците не само што не се санкционираат, туку и се наградуваат со државни позиции.

Тоа претставува опасна порака дека секој што сака да гради политичка кариера, доволно е да ја понижува албанската заедница.

Дополнително, доверувањето на управувањето со европски фондови на човек кој не само што упатувал навредливи пораки до Албанците, туку и до самата Европска унија и нејзините вредности, претставува понижување и за европските партнери и за даночните обврзници на ЕУ, кои ги финансираат овие програми.

ДУИ повикува на итно повлекување на оваа срамна одлука и враќање на сериозноста во процесите што се однесуваат на европската интеграција, образованието и соживотот.

Владата не смее да си дозволи да ја претвори државата во сцена за евтини провокации, на штета на соживотот и европската перспектива“, се наведува во соопштението на ДУИ.