Македонија
Заев и Филипче на Клиниката за неврологија: Создаваме европско здравство за граѓаните

Претседателот на Владата на Република Македонија, Зоран Заев, и министерот за здравство, Венко Филипче, денеска ја посетија универзитетската Клиника за неврологија, во рамки на комплексот клиники „Мајка Тереза“ во Скопје.
Истакнувајќи дека Клиниката за неврологија веќе е рамо до рамо со здравствените установи во европските земји, премиерот Заев потенцираше дека неколкуте новини коишто на Клиниката за неврологија се воведени од неодамна, ќе придонесат кон побрза и попрецизна дијагностика на невролошките заболувања кај граѓаните. Тоа, како што рече премиерот Заев, во исто време ја подобрува состојбата на македонското здравство во целина.
„Новиот апарат за биопсија на мускул, за пациентите ќе овозможи попрецизна дијагноза на невро-мускулните болести. Бенефит, пак, од лабораторијата за испитување мозочна течност, којашто е една од најсовремените, ќе биде побрзата и секако попрецизна детекција и дијагностицирање на болестите на мозокот. Ова всушност претставува нова метода во нашиот здравствен систем. И конечно, болните од мултиплекс склероза, од сега таканаречената биолошка терапија ќе ја примаат на Клиниката за неврологија, под соодветен медицински надзор, во новата дневна болница отворена токму за нив“, рече Заев.
Во својата изјава за медиумите премиерот истакна дека во фокусот на Владата, којашто наскоро ќе биде Влада на Република Северна Македонија, се благосостојбата и здравјето на граѓаните на земјата. Премиерот Заев исто така истакна дека целта на Владата е да создаде здравствен систем по европски стандарди – здравствен систем којшто во центарот на своето внимание секогаш ќе ги има пациентите.
„Годинава во буџетот за здравствена заштита се издвоени средства во износ од 30 милијарди денари што, во споредба со 2018 година, е за околу две милијарди денари повеќе. Предвидено е зголемување на средствата за финансирање на здравствените програми, болничкото лекување за одделни ранливи групи ќе биде бесплатно, а обезбедени се пари и за набавка на нови лекови за лицата со ретки болести“, додаде премиерот Заев.
„Универзитетската клиника за неврологија е исклучително позитивен пример на јавна здравствена установа којашто континуирано ја зголемува достапноста на здравствените услуги“, истакна министерот за здравство, Венко Филипче, и додаде дека новите оддели на клиниката се од особено значење за пациентите, имајќи предвид дека ваков вид услуги и на испитувања се вршат исклучиво на Клиниката за неврологија.
„Подготвуваме групна набавка на биолошка терапија, којашто овозможи на крајот на минатата година и на почетокот на оваа година што поголем број пациенти да ја примаат оваа терапија. Досега таа терапија ја примаа 9 пациенти со МС, а од оваа година 45 значи зголемувањето е навистина големо“, посочи министерот за здравство, Венко Филипче, во изјавата дадена за медиумите.
Директорот на Универзитетската клиника за неврологија, Иван Барбов, од своја страна истакна дека од исклучителна важност е невролошките болести навреме и прецизно да се дијагностицираат бидејќи од тоа зависи натамошните третман на пациентите. Барбов, во исто време, потенцираше дека Клиниката за неврологија има доволно медицински кадар, којшто е максимално посветен пациентите да добијат соодветна нега и квалитетни здравствени услуги.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Лицето што го споменуваат ВМРО-ДПМНЕ никогаш не бил личен шофер на Зоран Заев

Додека државата буквално гори, додека македонските шуми, пасишта, полиња се претвораат во пепел, ВМРО-ДПМНЕ штанца лаги од белата палата. Прво беа скакулците криви, кравите, СДСМ, Заев, утре ќе измислат некој друг, реагираат од СДСМ, на прес-конференцијата на Миле Лефков кој обвини дека шоферот на Заев е уапсен за подметнување пожар во Струмица.
„Очајни, бедни обиди за дефокус и тоа со истиот лик Миле Лефков. Вистината е лесно проверлива: лицето што го споменуваат никогаш не бил личен шофер на Зоран Заев ниту пак телохранител.Не можат да организираат итна интервенција на терен и да ги изгасат пожарите, па организираат лаги. Единствени виновни за пожарите се ВМРО-ДПМНЕ и Мицкоски кои се неспособни.Изгоре над 20% од територијата на државата. Нема нови возила, нема опрема, нема пожарникари, нема авиони. Има само лаги, прес-конференции и луксузни патувања“, велат од СДСМ.
Додека пожарите јадат шуми и домови, додаваат од таму, тие трошат народни пари на морски плодови, егзотично овошје и приватни авиони. Додека граѓаните гасат пожари со кофи и лопати, владата на ВМРО-ДПМНЕ троши милиони на телефони, ама нема денар за спасување животи и имот.
Македонија
Зајакнување на партнерството со Вермонт – македонска делегација се сретна со гувернерот на сојузната држава

Делегацијата на Армијата и Министерството за одбрана која престојува во Вермонт, САД, предводена од началникот на Генералштабот, генерал-мајор Сашко Лафичиски придружуван од државниот секретар во министерството, Елизабета Чуповска Ристова, во текот на вчерашниот ден оствари средба со гувернерот на оваа сојузна држава, Фил Скот на која присуствуваше и командантот на Националната гарда на Вермонт, генерал-мајор Грегори Најт.
За време на средбата се разговараше за придобивките од Програмата за партнерство во овие изминати повеќе од три децении која се реализира преку широк спектар на активности, како што се: изведување на заеднички обуки и вежби, конференции, посети на воени бази, школски центри и институции во САД, семинари, и сл. Дополнително беше нагласен огромниот придонес на командантот на Националната гарда на Вермонт, генерал-мајор Најт кој за време на својот мандат има клучна улога за развојот и успешноста на ова програма.
Во рамки на активностите македонската делегација оствари средба со командантот на Универзитетот „Норвич“, бригадниот генерал Вилијам МекКола при посетата на оваа воено високо образовна институција. Обнова на програмата за размена на студенти помеѓу Армијата и Универзитетот беше во фокусот на разговорот. Оваа програма одигра значајна улога во зајакнување на партнерство меѓу двете земји и во поддршка на професионалниот и академскиот развој на идните воени лидери. Таа останува клучен механизам во напорите за продлабочување на институционалните врски и унапредувањето на интероперативноста.
Во текот на денот, делегацијата го посети и Регионалниот центар за подготвеност и регионална технологија „Нортфилд“, каде беше презентиран ангажманот на овој центар во доменот на информациски операции и сајбер безбедноста во нашата држава.
Во таа прилика, генералот Лафчиски истакна дека „искуството и експертизата на центарот претставуваат уникатна можност за градење капацитети во оваа област“, имајќи предвид дека зајакнувањето на сајбер отпорноста е национален одбранбен приоритет кој е усогласен со принципите на колективна одбрана на НАТО и заложбата за сајбер одбрана на Алијансата.
Во следните неколку денови делегацијата ќе присуствува на повеќе презентации и посети на институции и капацитети од взаемен интерес.
Македонија
(Видео) Митрески: СДСМ нема да учествува во гласањето за интерпелацијата на обвинителот Коцевски

Интерпелацијата за јавниот обвинител, Љупчо Коцевски, нема правни последици и СДСМ нема да учествува во гласањето, одлуката е на обвинителот, изјави пратеникот од СДСМ, Јован Митрески.
„Иако нашиот став претходно беше дека ставот во однос на интерпелацијата за работата на Јавниот обвинител ќе го соопштиме од собраниската говорница сепак поради неразумните и нелогични одложувања на седницата со неразумни и нелогични барања на паузи а и поради вашиот голем интерес решивме тоа да го направиме на оваа прес конференција. Интерпелацијата во принцип значи барање политичка одговорност а овде зборуваме за човек од третата власт. Третата власт или судската власт која по Устав треба да биде независна. Тоа од една страна. Од втора страна тоа може но и не мора да има правни последици. Дали ќе има правни последици зависи од самиот обвинител, од самиот функционер. Во овој случај од самиот обвинител, дали ќе поднесе оставка или не“, рече тој.
Митрески додаде дека ако точката на дневен ред била одлука за разрешување тогаш можело да се отвори дебата дали се задоволни или незадоволни од работата на обвинителот, секако низ соодветно пропишана процедура.
„Како пратеничка група на СДСМ и Коалицијата остануваме на принципиелниот став дека јавното обвинителство мора да биде независно, ослободено од политичко влијание и притисок и сите одлуки мора да се послобото на законот и никако поинакви“, рече пратеникот.
Во врска со истрагата за Кочани, Митрески рече дека Мицкоски кажал е задоволен од тоа како се води истрагата.
„Знаете дека премиерот Мицкоски зборуваше дека треба да се смени Јавниот обвинител и дека, цитирам, таа процедура е тргната и нема сопирање. После трагичниот настан во Кочани знаете дека има промена на изјавата односно дека нема да има разрешување се додека не заврши истрагата. Со тоа што премиерот Мицковски отиде и чекор понатака кажа дека е задоволен од тоа како се води истрагата. Затоа со ова нивна одлука која што денес ја слушнавме на прес-конференција се отвораат прашања кои се легитими, меѓутоа јавноста за тоа ќе добие одговор во следниот период. Се поставува прашањето дали премиерот Мицковски е задоволен од истрагата, бидејќи нема одговор до денес, од тогаш кога во истрагата не се опфатени началниците на Тошковски“,рече Митрески.