Македонија
Заев и Царовска: По 60 години ООУ ,,Јоаким Крчоски” во село Волково добива нова современа спортска сала

Премиерот Зоран Заев, заедно со министерката за образование и наука Мила Царовска и со градоначалникот на општина Ѓорче Петров Александар Наумовски, денеска ја пуштија во употреба современата спортска сала во општинското основно училиште „Јоаким Крчоски” во село Волково во Општина Ѓорче Петров.
Со нејзината изградбата од септември околу 400 ученици од селата Волково, Орман и Кучково, конечно ќе добијат соодветни услови за физичко образование, како клучен дел од заложбата за здрав и комплетен развој на младите.
„За нас како Влада вложувањата во спортот, особено во спортските објекти во училиштата, е исклучително важен фактор за развојот на прогресивно и инклузивно општеството кон коешто сите стремиме. Спортот овозможува социјална интеракција и влијае позитивно врз градењето на основни етички принципи, особено кај младата популација“, рече премиерот Заев.
Тој потсети дека основното училиште „Јоаким Крчоски“, кое е основано 1959 година во село Волково, досега немаше спортска сала, а учениците наставата по физичко и здравствено образование ја изведуваа во училница приспособена за вакви активности.
„По 60 години настава во импровизирани услови, оваа Влада ја препозна важноста на потребата од изградба на современ спортски објект и таа потреба ја ставивме во врвните приоритети на буџетирање. Во оваа пригода сакам да нагласам дека еден од приоритетите на оваа Влада е да го зголеми бројот на млади кои спортуваат за 30%. За таа цел планираме изградба на спортски сали во повеќе училишта каде што тие недостигаат“, истакна Заев.
Во соработка и со финансиска поддршка од Министерството за образование и наука, во мај 2019 година, започнаа градежните работи на нова типска спортска сала. За оваа сала преку Министерството за образование и наука од буџетот на Северна Македонија се издвоени 22.800.000 денари, а општината за расчистување и уредување на просторот одвои 4.000.000 денари.
Министерката за образование и наука Мила Царовска рече дека освен на воведување квалитетни и современи наставни програми и јакнење на наставниот кадар, изминатиот период МОН забрзано работи на подобрување на условите во училиштата, преку проширување изградба, и реконструкција на училишните згради и спортските сали.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Зголемена фреквенција на возила на ГП Табановце за влез и излез од државата

Сообраќајот на државните патишта се одвива по суви коловози.
АМСМ известува дека денеска во време од 08:00–16:00 часот ќе биде обезбедувана велосипедска трка ХРОНО, при што сообраќајот на регионалниот пат граничен премин Пелинце на потегот од раскрсницата за село Драгоманце до Меморијалниот центар АСНОМ во село Пелинце ќе биде запрен.
Исто така, истиот ден на 22.07.2025 година во време од 08.00–17.00 часот ќе биде обезбедувана велосипедска трка МОУНТАИН БАЈК (тренинг), при што сообраќајот на патот во село Добршане на регионалниот пат за Свети Николе до местото викано Студена Вода ќе биде запрен.
Повремено затворање на регионалниот пат Куманово – граничен премин Пелинце е планирано и за 23.7. и 24.7.
Интензитетот на сообраќај на патните правци надвор од градските средини е зголемен. На ГП Табановце се бележи зголемена фреквенција на возила за влез и излез од државата, времето на чекање е околу 15-30 минути. На останатите гранични премини од македонска страна, нема подолги задржувања за влез и излез од државата.
Македонија
Претежно сончево и многу топло, максималната температура до 42 степени

Времето денеска ќе биде претежно сончево и многу топло. Ќе дува слаб до умерен, а во западните делови повремено засилен ветер од југозападен правец. Минималната температура ќе биде во интервал од 13 до 21, а максималната ќе достигне од 35 до 42 степена.
Во Скопје, сончево и многу топло со слаб до умерен ветер од југозападен правец. Минималната температура ќе се спушти до 20, а максималната ќе достигне до 41 степен.
Времето во наредните денови
Под влијание на топол бран од југ до сабота (26.07) времето ќе биде сончево и многу топло со мала до умерена локална облачност. Дневната температура насекаде ќе биде над просекот за месец јули.
Македонија
ДУИ ги соопшти имињата за градоначалници и во Тетово и Желино, за Гостивар ќе чека предлог од Таравари, а за Струга од Села

Претседателот на Демократската унија за интеграција (ДУИ), Али Ахмети, свика редовна седница на Централното претседателство на партијата, на која беа разгледани актуелните политички случувања во земјата и подготовките за претстојните локални избори.
Централното претседателство едногласно го именува Фатон Ахмети, генерален секретар на ДУИ, за шеф на Централниот изборен штаб.
Исто така, со целосен консензус беа потврдени кандидатите кои ќе се натпреваруваат за градоначалници и носители на советнички листи во повеќе општини:
Во Општина Тетово, кандидат ќе биде Бајрам Реџепи, потпретседател на ДУИ.
Во Општина Желино, кандидат ќе биде Гемир Сулејмани, претседател на општинската организација на ДУИ.
Во Општина Гостивар, носител на советничката листа ќе биде Валдет Џафери, претседател на огранокот на ДУИ. Во Општина Струга, носител на советничката листа ќе биде Фатон Пололжани, претседател на огранокот на ДУИ.
Во наредните денови, по завршување на внатрепартиските и коалициските консултации, ќе бидат потврдени дополнителни кандидати за останатите општини.
Од Алијансата за Албанците, преку Зијадин Села, се очекуваат предлози за кандидати за градоначалници во општините Струга, Харачина и Дебар, а од Арбен Таравари – за Гостивар, Врапчиште, Теарце и Сарај.
Од ДУИ велат дека остануваат посветени на фер, инклузивен и програмски силен изборен процес, а граѓаните се повикуваат како на референдум да ја потврдат следната победа на локалните избори.