Премиерот Зоран Заев заедно со вицепремиерот задолжен за европски прашања, Бујар Османи, министрите за транспорт и врски и за економија, Горан Сугарески и Крешник Бектеши, и со претседателот на Собранието, Талат Џафери, денеска присуствуваше на отворањето на автопатот Р6 „Арбен Џафери“ во Косово.

„Оваа модерна автопатска артерија од денеска станува дел од системот автопати што го прави нашиот регион поврзан, близок, пријателски. Автопат кој ќе ја забрза динамиката на односите меѓу граѓаните, меѓу бизнис-заедницата од повеќе земји од овој наш регион“, рече Заев.

Тој кажа дека автопатот „Арбен Џафери“ е награда за трпеливоста и за бројните и значајни врски што Косово ги има со Република Северна Македонија на секој план.

„Овој автопат од денеска ќе стане сообраќајницата која ќе овозможи најсовремен, најбрз и најбезбеден проток на стотици илјади автомобили, граѓани и на други транспортни средства кои обезбедуваат Косово да биде меѓу топ 20-те земји со највисок обем на трговска размена со Република Северна Македонија, вредна повеќе од 500 милиони евра“, рече премиерот.

Според Заев, инфраструктурното поврзување во голема мерка ќе ја забрза севкупната европеизација на регионот.

„Автопатот што денеска се пушта во употреба го носи името на големиот Арбен Џафери, еден од најистакнатите ликови од независноста на нашата земја. Еден од оние истакнати личности кои дадоа голем придонес регионот да биде поврзан и единствен, составен од суверени земји кои меѓусебно се респектираат и го делат минатото во име на заедничката европска иднина. Автопатот што денеска се пушта во употреба ќе биде силна мотивација и за нас да ги забрзаме подготовките за старт на работите на автопатот Блаце – Скопје. Овие денови и кај нас се распишува тендерот на автопатот од 14 километри, вреден 120 милиони евра којшто е од границата меѓу Северна Македонија и Косово, до главниот град на нашата земја, Скопје. Така ќе се заокружи автопатското поврзување меѓу Скопје и Приштина и патувањето меѓу овие два града ќе трае само 45 минути“, рече Заев.

Овој автопат, додаде тој, прави поврзување помеѓу граѓаните во Република Северна Македонија и Косово, но и помеѓу граѓаните на Северна Македонија, Косово, Албанија, Црна Гора, го поврзува целиот овој наш регион.

На настанот присуствуваа претседателот и премиерот на Косово, Хашим Тачи и Рамуш Харадинај, претседателот на Собранието на Косово, Кадри Вејсели, премиерот на Црна Гора, Душко Марковиќ, и други државници и амбасадори.