Македонија
Заев: Не може газди на приватни фирми да бидат раководители на сектори во администрацијата

Лидерот на СДСМ, Зоран Заев, на денешната прес-конференција најави дека во следниот мандат ќе се укинат патните трошоци за пратениците во Собранието. Заев рече дека во идина сите функционери, без оглед дали се градоначалници, пратеници, директори, вклучувајќи ги и судиите, ќе имаат обврска јавно да ги прикажат сите трошоци.
„Воведуваме законска обврска за јавна објава на трошоците на сите функционери во централната, локалната, но и во судската власт. Алатката за отчетност на трошоците на функционерите со закон ќе ја направиме да биде задолжителна и за градоначалниците, и за пратениците и за судската власт. Се покажа дека отчетноста ги тера функционерите да штедат, а тие пари одат кај граѓаните. Тие што водат институции во име на граѓаните мора да се отчетни, транспарентни и чесни. Ќе ги укинеме патните трошоци за пратениците во Собранието“, рече Заев.
Првиот човек на владејачката партија рече дека една од мерките што ќе ја преземе идната власт ќе биде намалување на бројката на јавната администрација, и тоа 20 отсто.
Според него, во јавната служба ќе останат да работат професионалци, односно тие што се спремни да им служат на граѓаните.
„Секако, нема да ги бркаме луѓето да си одат дома и да останат без работа. Ова е цел процес, кој е почнат и успешно ќе продолжи. Во моментот се прави анализа на сите што работат во јавнатата администрација, а се основачи или менаџери на фирми. Веројатно таму постои злоупотреба на работното место. Не може да бидете газда на фирма, да управувате со неа, а тука сте раководител на некој сектор. Со ова мора да завршиме. Ќе се заблагодариме, дечки, имате приватна фирма, успешни сте, ве молам, ослободете го местото. Вториот дел е каде што на луѓето ќе им понудиме пакети. Сите оние што ќе склучат договор за работа во приватна компанија и тоа за трајно вработување, ќе добијат испратнини во 6 бруто-плати“, рече Заев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Се излеа Маркова Река кај Батинци

Маркова Река се излеа денес по обилните врнежи од дожд.
Во селото Батинци, водата е надојдена, излевајќи се на неколку места околу речното корито.
Ангажирана е механизација за санирање на штетата, а градоначалник на Студеничани, Азем Садики, објави дека забележана е материјална штета во дворовите од куќите кои се наоѓаат во близина на реката.
Засега, според градоначалникот, нема потреба од евакуација.
Фото: ТВ21/скриншот
Македонија
Тетово повика на јавна дебата за промена на имињата на улиците

Општина Тетово в петок, со почеток во 15:00 часот, организира јавна дебата за предлози за имиња на улиците.
„Ги повикуваме сите граѓани, здруженија, невладини организации и граѓанскиот сектор да учествуваат на оваа јавна дебата за именување на улиците“, велат од општината преку допис.
Додаваат дека секој предлог од граѓаните е важен и помага овој процес да биде инклузивен и успешен за граѓаните и градот Тетово.
Македонија
Тошковски: Припадниците на МВР денеска примија плата зголемена за 10 отсто

Припадниците на МВР денеска примија плата зголемена за 10 отсто, информира министерот за внатрешни работи, Панче Тошковски.
„Изминативе години сосема оправдано имаше критики дека платите во МВР се ниски, а очекувањата и одговорностите големи. Често се укажуваше на разлики во однос на некои сродни служби, а чувството на потценетост беше реално и оправдано. Ова зголемување не е доволно, но е еден од многуте чекори што ќе следат во насока на враќање на достоинството и угледот на полицаецот. Целта е јасна – да изградиме модерна, професионална и силна полиција која ќе биде вистински сервис на граѓаните. Продолжуваме понатаму кон обезбедување на подобри услови, поголема поддршка и вистинско вреднување на трудот што секојдневно се вложува“, напиша Тошковски во објавата на социјалните мрежи.