Министерот Муцунски се обрати на 23-от Мешовит парламентарен комитет меѓу Северна Македонија и ЕУ

Министерот за надворешни работи и надворешна трговија, Тимчо Муцунски, попладнево се обрати на 23-от Мешовит парламентарен комитет меѓу Република Северна Македонија и Европската Унија, кој денес се одржа во Скопје.

Во своето обраќање, министерот Муцунски го истакна значењето на ова меѓупарламентарно тело како континуиран, посветен и силен поддржувач на евроинтегративните процеси на државата, кое дополнително придонесува кон развојот на соработката меѓу Собранието и Европскиот парламент.

Министерот нагласи дека оваа година означува две децении од добивањето на статусот кандидат за членство во Европската Унија и изрази очекување дека Унијата ќе делува одлучно во насока на поголема предвидливост и конкретно придвижување на пристапниот процес.

„Дваесет години на реформи, компромиси – често тешки и болни, но секогаш водени од визијата за европска иднина. Македонските граѓани останаа посветени на европските вредности, и покрај предизвиците и разочарувањата на овој долг пат. Денес, повеќе од кога било, потребни се јасност, предвидливост и решителност во нашиот интегративен процес. Европа не смее да ја изгуби довербата на граѓаните кои две децении веруваат во европскиот проект.“, истакна министерот Муцунски.

Во своето излагање, министерот ја потврди целосната посветеност на Владата на процесот на европска интеграција, со засилен фокус на имплементацијата на клучните реформи. Тој посебно се осврна на напредокот во усогласувањето со заедничката надворешна и безбедносна политика на ЕУ, како потврда за приврзаноста на Северна Македонија кон принципите на мир, стабилност и демократски вредности.

„Во надворешната политика остануваме доследен партнер на ЕУ, со целосно усогласена Заедничка надворешна и безбедносна политика. Нашата поддршка за Украина, учеството во санкциските режими и активната улога како НАТО-членка покажуваат дека не сме само набљудувач, туку чинител во градењето на европската безбедност. Како прва земја од регионот, потпишавме Партнерство за безбедност и одбрана со ЕУ – нова сеопфатна рамка за продлабочена соработка во оваа област.“

Во обраќањето пред комитетот тој ги истакна и добрососедските односи и регионалната соработка, при што потенцираше дека Северна Македонија останува пример во регионот за градење на стабилни партнерства со соседите, со подготвеност за дијалог и заеднички решенија.

На крајот, министерот Муцунски ја изрази благодарноста за досегашната поддршка на Европскиот парламент и повика на уште поголема активност во следните години со цел конкретни и одлучни чекори кон европската иднина на Северна Македонија.

„Дваесет години сме кандидат за членство во ЕУ. Чекориме по пат што постојано се менува, станува потежок и помалку предвидлив. Но, ние не се откажуваме. Веруваме во Европската унија, веруваме во европските вредности и веруваме дека нашето место е во европското семејство. Време е за одлуки, а не за нови одложувања. Време е зборовите да станат дела, а процесот на проширување да стане реалност.“, заклучи министерот Муцунски.

На 24.02.2025 Одделот за сузбивање на организиран и сериозен криминал поднесе кривична пријава до ОЈО за ГОКК против десет лица и тоа: Ф.А. (42) за сторени кривични дела „противзаконито ослободување на лице лишено од слобода“ по член 373 од КЗ, „злоупотреба на службена положба и овластување“ по член 353 од КЗ и „овозможување бегство на лице лишено од слобода“ по член 372 од КЗ, С.К. (53), П.А. (40), Ѓ.Р. (34), С.П. (48), Т.Н. (37), Е.О. (46), З.М. (35), К.В. (34) за сторени кривични дела „противзаконито ослободување на лице лишено од слобода“ по член 373 од КЗ и „злоупотреба на службена положба и овластување“ по член 353 од КЗ, како и против С.К. (33) за сторено кривично дело „овозможување бегство на лице лишено од слобода“ по член 372 став 1 од КЗ.

Пријавениот Ф.А., во својство на директор на КПУ Затвор Скопје, во период од март 2024 до 24.07.2024 со намера на противзаконит начин, привремено да ослободи осудени лица кои издржувале затворски казни во КПУ Затвор Скопје, злоупотребувајќи ја својата службена положба дозволил и наредил повеќе осудени лица од висок безбедносен ризик во повеќе наврати да добијат и да се стекнат со поволности кои не им следувале согласно судските одлуки, односно истиот одобрил молби поднесени од осудените лица повремено да го напуштат затворот, по што пријавениот П.А. од позиција на командир на затворска полиција, кој бил задолжен за спровод, иако знаел дека таквиот вид на спровод е спротивен на закон и процедурите за спровод, по добиената наредба од директорот Ф.А., изготвил наредба за спровод на осудените лица до нивните домови и други локации за приватни потреби, по што така изготвени биле одобрени од страна на директорот Ф.А., а во неколку наврати биле одобрувани од страна на С.К., вработен како затворски полицаец во КПУ Затвор Скопје, личен возач на Ф.А.. Потоа пријавениот П.А. одобрените наредби ги предавал на пријавените затворски полицајци Ѓ.Р., С.П., Т.Н., Е.О., З.М. и К.В. со цел извршување на незаконскиот спровод на осудените лица, иако истите знаеле дека таков спровод на осудено лице до домашна адреса врз основа на молба е спротивно на закон и процедурите и подзаконските акти на законот, сепак го извршиле спроводот, каде што ги ослободувале осудените лица да извршуваат приватни работи, а потоа откако ќе поминел одреден временски период (најчесто 8 до 10 часови) пријавените затворски полицајци ги враќале осудените лица назад во затворот. Кривичното дело „злоупотреба на службена положба и овластување“ пријавените затворски полицајци го сториле така што за ваквите незаконски спроводи, биле користени службени возила на установата, за што било потрошено службено гориво, а притоа на дел од пријавените затворски полицајци директорот Ф.А. им одобрувал прекувремени работни часови (вкупно 44 часа исплатена прекувремена работа), со што согласно наведените незаконски дејствија била предизвикана штета на буџетот на Р.С.Македонија, а воедно и мала имотна корист за Ѓ.Р., С.П., Т.Н., Е.О. и З.М..

Пријавениот С.К. во својство на затворски полицаец кривичното дело „овозможување бегство на лице лишено од слобода“ предвидено и казниво по член 372 од КЗ го извршил така што со непреземање на должни мерки и активности при утврдување на бројна состојба на осудени лица, постапил спротивно на член 9, член 13, член 19, член 28, член 44 и член 45 од Правилникот за овластувањата на затворската полиција, начинот на вооружување и вршење на работите на затворската полиција, односно не пријавил одредена група на осудени лица при вршење физички проверки за бројна состојба, при што констатирал дека сите осудени лица биле присутни, односно немало отсутни. Додека при извршена контрола поради ненајавен вонреден надзор од страна на стручни лица на Управата за извршување на санкции, констатирано е дека група од 11 осудени лица не биле пријавени дека не биле присутни, а кои биле сместени во импровизирани простории и тоа: „Возен парк“, „Перална“, „Столара“ и „Котлара“.

Во врска со бегството на групата од 11 осудени лица кои казната затвор ја издржувале во КПУ Затвор Скопје, поради фактот дека пријавениот Ф.А. во својство на директор на установата, иако бил должен да преземе соодветни мерки, во однос на импровизираните простории кои не исполнуваат законски услови за сместување на осудени лица, истиот не ги презел наведените активности и им овозможил на осудените лица да бидат сместени во импровизираните простории без посебен надзор како што налага Законот за извршување на санкции, со што постапил спротивно на член 31 од истиот, а со неговите постапки создал и овозможил услови кои што довеле до бегство на 11 осудени лица, а со наведеното пријавениот Ф.А. сторил кривично дело „овозможување бегство на лице лишено од слобода“ предвидено и казниво по член 372 од КЗ.

На 27.02.2025 година извршени се претреси во домови кај Ф.А. и С.К, при што тие се лишени од слобода и ќе бидат изнесени пред судија на претходна постапка.

Денес во Собранието се случи срамен чин на непочитување и дискриминација изговорени од страна на министерката за финансии. Настан којшто не е само личен напад до пратеничката Петровска, туку напад и до достоинството на сите жени, мајки, работнички, борци за правда и еднаквост во ова општество, реагираше пратеникот на СДСМ, Фатмир Битиќи, на собраниската седница посветена на пратенички прашања.

„Министерката за финансии си дозволи да изрази дискриминаторски став кон пратеничка, деградирајќи ја како личност и негирајќи ја нејзината способност да зборува за животот, трошоците и предизвиците на семејствата во оваа наша држава. Со зборовите: ’Не можам да ве кажам, почитувана, за да кажам почитувана, треба да ја заслужите мојата почит’-министерката директно покажа ароганција и непочитување кон институцијата парламент, во кој секој пратеник и пратеничка е избран од граѓаните и граѓанките и имаат мандат да ја изразат нивната волја.

Ова собрание, почитувана, не е приватен клуб во кој членството зависи од личните симпатии на некој министер. Ова е демократска институција во која секој има право да зборува, без да биде понижуван.

Но, министерката отиде чекор понатаму, до обидот на наметне поделба меѓу оние што се мајки и оние што според нејзиното мислење, немаат право да зборуваат за економските проблеми на семејствата.

Ако некоја жена, не е мајка, тоа не значи дека не може да зборува за економски прашања. Ако некоја жена не е министерка, тоа не значи дека не знае како изгледа реалноста во нашата драга Македонија. Министерке, во оваа држава има илјадници мајки и знаат многу добро што значи да се преживува од месец во месец и кои се борат со зголемените трошоци, кој бројат денари за да обезбедат храна, греење, училишни материјали.

Оваа држава има илјадници жени кои не се мајки, но кој работат напорно и ги чувствуваат економските последици од вашата за жал неспособна политика. И кој не заслужуваат да бидат замолчени со вашите ставови и ароганција. Ова не е прашање само на еден недоличен напад на една пратеничка, ова е прашање каков однос има Владата кон секој граѓанин кој не се вклопува во нивните лични интереси за почитуваност.

Ова е прашање на тоа за тоа дали министрите што управуваа со милијарди евра јавни пари мислат дека граѓаните и граѓанките треба да ја заслужат нивната почит или тие треба да служат на сите подеднакво.

Почитувани, не постои дијалог таму каде што постои дискриминација. Не пости почит таму каде што се понижуваат пратенички. Министерке, ова не е ваш личен простор каде можете да делите оценки за луѓето според вашата лична перцепција. Ова е собранието на Република Северна Македонија, каде ќе се борам неуморно да не се нарушува неговото достоинство со ароганција, дискриминација и понижување на било кого или која било заради нејзините различности.

Ќе не слушате, без разлика дали вие сметате дали ние заслужуваме почит или не. Почитта во оваа сала ја даваат граѓаните и граѓанките, а не министрите што денес се на функција, а утре ќе бидат само фуснота во историјата.

И затоа, министерке, јас сум Фатмир Битиќи, имам сопруга и родител сум на две деца. Ве молам, одговорете ми, дали сум достоен да ви поставам пратеничко прашање. Ова собрание не смее да бие место каде министрите делат оценки кој заслужува почит, а кој не. Почитта не е лична привилегија на еден функционер, туку вредност што треба да биде основана на секој демократски процес. Со својот изразен дискриминаторски став, министерката покажа дека на ги разбира овие принципи и затоа нема да учествувам во понатамошната комуникација со неа. Ниту ќе и поставувам пратенички прашања, иако беа подготвени две. И ова ќе остане така сè додека не се извини јавно кон навредливиот и понижувачки однос кон колешката Петровска и кон сите оние што не се вклопуваат во нејзината лична дефиниција за ’почитувана‘,“, истакна пратеникот на СДСМ, Фатмир Битиќи.