Северна Македонија е првата земја што ја посетува новоизбраниот претседател на европскиот дом на демократијата и тоа говори колку е голема неговата, но и поддршката на Европскиот парламент за нашата земја, изјави премиерот Зоран Заев на заедничката прес-конференција со претседателот на ЕП, Давид-Марија Сасоли.

Заев истакна дека процесот на проширување ќе претрпи промени и дека Северна Македонија мора да се подготви за построг надзор, но ние на тоа гледаме како предност за нашата трансформација.

„Подготвени сме за тоа и сакаме да учествуваме во тоа. Но, цврсто веруваме дека перспективата за членство во ЕУ е незаменлива и не треба да биде доведувана во прашање доколку навистина сакаме стабилен, безбеден и просперитетен Западен Балкан. Имаме верба. Имаме оптимизам. Уверен сум дека набргу ќе се отворат новите можности со помош на нашите пријатели од цела ЕУ“, заклучи Заев на заедничката прес-конференција со Сасоли.

Премиерот оцени дека недавањето согласност да почнат преговорите по поглавја ги вратило на агендата прашањата на евроскептиците и дилемите дали ЕУ навистина останува на своите политики за проширување и дали има алтернатива, но тој е дециден дека не постои друга опција.

„Мораме да продолжиме, дури и посилно со реформите, со докази дека во земјата владее правото, дека имама силни аргументи за напредокот во економијата. Тие реформи ни се најпотребни заради нас дома“, рече Заев.

Додаде дека Европскиот парламент и резолуцијата за Северна Македонија и Албанија се поттик дека ќе продолжи притисокот да се врати одлуката што не е донесена и дека претстојните дискусии во ЕУ ќе завршат со обновен консензус за проширување.