Премиерот Зоран Заев се сретна со членовите на групата Dancers United, кои освоија златен медал на Светскиот куп во рамки на Европското првенство во Римини, Италија, во 2019 година, како и први места на Светското првенство во Полска и Европското првенство во Италија во 2018 година. Со нив беа и нивните родители, тренери и ментори.

„Браво членови на Dancers United. Нашата земја и нашиот народ се горди на сите вас. Ова што вие го правите за промоција на државата е амбасадорски успех. Вие продолжете со вашите заложби, а сметајте и понатаму на мојата поддршка и на поддршката на Владата во сите ваши нови предизвици“, рече Заев.

Тој ги слушна убавите искуства од настапот во Римини, Италија. Тие соопштија дека членовите на Dancers United се веќе препознатливи и за европската и за светската јавност. При тоа изразена е посебна благодарност до премиерот Заев, до кабинетот на премиерот и до Владата, за поддршката којашто придонесува во нивната презентација во светот, како и во мотивацијата, поради поддршката и признанијата што ги добиваат во својата држава.

„Во име на Владата, на танчерите од Dancers United им доделувам Признание за ентузијазмот, трудот и упорноста со коишто членовите на оваа танчерска група успешно работат на инклузија на лицата со попреченост и за благородната цел – општество еднакво за сите“, соопшти премиерот Заев при врачување на признанието.

И членовите и претставниците на Dancers United му дадоа на премиерот Заев благодарница за особен придонес за талентите и можностите на групата.