Македонија
Заев: Со Ципрас договоривме решение за паметење, соодветно на политичари со визија

Премиерот Зоран Заев и неговиот грчки колега Алексис Ципрас во рамки на Самитот ЕУ-Западен Балкан во Лондон, од страна на британската премиерка Тереза Меј биле поканети заедно со неа на посебна фото-сесија како придонес во сесијата „Надворешна политика, билатерални прашања и наследство од минатото“.
Како што информираат од владината прес-служба, токму на оваа сесија посебно место добил постигнатиот договор за македонско-грчкиот спор за името и за стратегиското партнерство меѓу двете земји, кој беше потпишан на 17 јуни во Преспа.
Премиерот Заев на поканата да зборува на оваа сесија за надворешните политики, билатералните прашања и наследството од минатото на земјите од Западен Балкан, истакнал дека договорот меѓу двете земји, всушност, е најдобриот придонес за нови модели на однесување и за воспоставување нови пријателства и односи меѓу државите и политичарите.
„Што е ако не е пријателство кога се грижите со истата посветеност за интересите на вашиот политички партнер како и за своите? Што е ако не е пријателство кога ви станува најважно да создадете атмосфера во која најотворено ќе се разговара за прашања за кои преовладувал став дека нема решение? Кога ви е најважно таквата пријателска атмосфера да ја негувате како еднакво важна како и решението кон кое стремите. Низ целиот процес инсистиравме дека ние не зборуваме за црвени линии. Си рековме едни со други дека црвените линии се ограничувачки. Се согласивме дека, доколку ги има, ќе нè ограничуваат, ќе бидат закана за храброста. Црвените линии ве ставаат во кутија. Ние рековме – нема да го ставиме процесот во кутијата на црвените линии. Така прават пријателите, насочени кон решение, кон компромис“, истакнал Заев и додал дека со овој договор е ставен крај на повеќегодишните разлики кои, како што рекол, издигнале ѕид кој ги отежнувал пријателските односи меѓу соседите и создавал неизвесност за нашата иднина.
Премиерот потенцирал дека тој, премиерот Ципрас, министрите за надворешни работи Коѕијас и Димитров, членовите на владите, заедно со соработниците и со поддршката на Обединетите нации, на Европската Унија и со поддршката и на заедничките стратешки пријатели, тргнале во одлучни чекори за решение на ова прашање, кое, нагласил, ќе биде достоинствено и прифатливо за двете страни.
„Со премиерот Ципрас избравме да оставиме решенија како траги зад нас. Решенија за нашите граѓани и за нашите општества, а не за нас и за нашите политички партии. Такви се лидерите на Европа. Што ќе беше Европа денеска ако не беа лидерите кои на политичката сцена излегуваа траги за паметење, траги заради кои ние денеска ги уживаме плодовите на нивното визионерство? Што ќе беше Европа денес ако на политичката сцена излегуваа самобендисани и самодоволни, кусогледи политичари, без визија?“, нагласил Заев и изразил благодарност за континуираната поддршка што на овој процес му ја давале лидерите на земјите членки на ЕУ, поддршката на лидерите на ЕУ и за поддршката на лидерите на соседните земји и пријатели од Западен Балкан.
На сесијата „Надворешна политика, билатерални прашања и наследство од минатото“, на која се обратил премиерот Заев, лидерите на ЕУ и на Западен Балкан биле едногласни дека храброста на премиерите Заев и Ципрас е модел за решавање и на најсложени билатерални прашања и дека тие и понатаму ќе имаат голема поддршка во имплементацијата на договорот од Преспа.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Од Охрид почна промоцијата на порталот на кој ќе има 200 електронски услуги за граѓаните

Министерството за дигитална трансформација денеска од Охрид ја почна кампањата за промоција на Националниот портал uslugi.gov.mk, преку кој граѓаните можат да добијат повеќе од 200 електронски услуги.
Стартот на кампањата го означи ресорниот министер Стефан Андоновски, кој најави дека промоцијата на порталот ќе продолжи во сите градови низ државата, на плоштадите во парковите, но и на универзитети, училишта, работни места…
– Очекувам интересот значително да порасне. Секоја услуга која граѓаните можат да ја искористат на порталот е скратено време, скратени трошоци и скратено чекање во редови, како и зголемена ефикасност на институциите. Се надевам ова ќе наиде на добар одѕив кај граѓаните, рече Андоновски.
Тој посочи дека Националниот портал uslugi.gov.mk, нуди повеќе од 200 електронски услуги за граѓаните и вкупно 300 електронски услуги заедно со други портали.
Прашан за најновиот ревизорски извештај, кој покажува недостиг на ИТ програмери во институциите, министерот Андоновски подвлече дека ревизорските извештаи се патоказот кој им кажува каде треба да се движат.
– Недоволната популаризација на порталот и неорганизирањето промотивни кампањи беше една од забелешките минатата година и затоа со добра организација успеавме да го реализираме тоа годинава. Остануваат недостатоци во однос на кадарот, предизвици со бројот на вработени, но со бројка од 15-тина нови вработени во Министерството, мислам дека уште повеќе ја зголемивме динамиката на дигитализција на услуги. Наредниот период ќе промовираме и нови. Со овој пакет на активности, следејќи ги новите трендови ќе имаме успешна реализација и дигитализацијата ќе фати по драматичен чекор, изјави Андоновски.
Појасни дека според систематизацијата, во Министерството за дигитална трансформација предвидени се околу 250 вработувања, а во моментот бројката достигнува до 180.
– Во моментот бројката на вработени се движи окоу 170, со времени вработувања доаѓа до 180. Исполнувањето на таа квота од 250 би значело целосна активност и полна динамика на Министерството, но и со овие ресурси постигнуваме значителни резултати, споредено со тоа што се случуваше во минатото. При моето доаѓање во Министерството имавме околу 120.000 корисници на порталот, денеска имаме околу 190.000. Тоа е сериозна бројка. Ако до 2024 година сме имале 1.000 трансакции месечно, сега имаме 9.100 последниот месец, додаде Андоновски.
Македонија
Утре почнува учебната година, во клупите ќе седнат 177.800 основци и 67.200 средношколци

Новата учебна 2025-2026 година утре ќе ја започнат 245 илјади ученици, односно 177.800 основци и 67.200 средношколци. Настава ќе има до 10 јуни, а исклучок ќе бидат матурантите за кои редовните часови ќе траат до 15 мај. Обезбедени се учебници за сите ученици, а за првпат по седум години ќе има и учебници по странските јазици.
Ова денеска на прес-конференција го истакна министерката за образование и наука Весна Јаневска и информираше дека во повеќе училишта условите за настава се подобрени, а инклузијата е подигната со ангажирање на зголемен број образовни асистенти во основното и за првпат во средното образование. Учениците ќе се запознаваат со придобивките од вештачката интелигенција и ќе учат етички да ја користат за образовни цели.
„Втора учебна година по ред започнува со учебници за сите ученици. Целосно нови учебници има за седмо одделение во основното образование и за прва година во гимназиите, поради примената на нови наставни програми и најавувам дека овој процес на обнова на наставните содржини ќе има континуитет. За првпат после седум години, учениците ќе добијат и учебници по странски јазици – англиски, француски, германски и италијански јазик“, истакна Јаневска, нагласувајќи дека сите се испечатени и над 90 проценти од тиражот е веќе испорачан.
Министерката информираше дека системски е решен предизвикот со учебниците кој се провлекуваше со години и дека повеќе нема предмети во основното образование без учебници, нема користење на учебници без склучени договори и регулирани авторски права и нема доцнење на испораката со месеци.
Направени се и крупни инвестиции за подобрување на образовната инфраструктура. Во период од една година отпочнат е инвестициски циклус од 67 милиони евра. Дел од градежните проекти се завршени, а дел во фаза на реализација.
Јаневска рече дека започнува примената на нов електронски дневник кој има значително подобри перформанси од претходниот и наставниците ќе можат да се најават и пополнуваат податоци во секој момент.
„Вештачката интелигенција влегува во наставата. Со задоволство споделувам дека е изготвен сеопфатен прирачник за едукација и на наставници и на ученици, со јасни инструкции за етичка и ефикасна примена на новите технолошки алатки за образовни цели“, нагласи министерката.
Освен 1.346 образовни асистенти во основните училишта, Јаневска информираше дека за првпат, образовна асистенција ќе добијат и средношколците со посебни образовни потреби, а нив ќе им помагаат 130 образовни асистенти.
„За првпат е воведено и формално образование за децата на долготрајно болничко лекување и тие повеќе нема да губат настава. Зависно од нивната состојба ќе можат да се вклучуваат онлајн во својот клас или пак, наставникот индивидуално ќе работи со нив“, истакна Јаневска.
Министерката очекува наставниците мотивирани да ја започнат новата учебна година, во која, како што рече, ќе имаат и ново зголемување на платите, онака како што се договоривме пред една година, од 7,5 до 10 проценти во зависност од степенот на инфлацијата, за да има реален раст без манипулации.
Во новата учебна година, обезбедена е поголема поддршка за талентираните ученици, односно целосно покривање на трошоците за учество на меѓународни научни олимпијади, а за сите ученици е овозможено професионално, односно кариерно насочување.
Македонија
Стојановски: Владата за една година изгради и пушти во употреба 71,2 километри експресен пат и автопат

Владата на ВМРО-ДПМНЕ за една година изгради и пушти во употреба 71.2 километри експресен пат и автопат, изјави денеска на прес-конференција пратеникот на ВМРО-ДПМНЕ, Бојан Стојановски.
Тој истакна дека Владата го завршила и пуштила во употреба експресниот пат Градско – Дреново, при што завршила две делници од 25,7 километри експресен пат, во крајно брз рок.
Додаде дека се завршени и пуштени во употреба се 25,5 километри од експресниот пат Куманово – Крива Паланка.
-Пред нецели два месеци пуштени се во употреба 20 километри од автопатот Кичево – Охрид, и дополнително се очекува наскоро да биде пуштена уште една делница, а до крајот на 2026 година ќе биде пуштен во употреба целиот пат. Засилено се гради низ цела Македонија, истакна Стојановски.
Тој додаде дека автопатот Тетово – Гостивар исто така треба да биде готов за две и пол години.
-Засилено се работи и на автопатот Прилеп-Битола кој се очекува да биде завршен и пуштен во употреба 2027 година. Во наредните три до четири години цела држава ќе биде испреплетена со автопатска мрежа и мрежа од експресни патишта. Македонија се трансформира. Промените на дело, истакна Стојановски.