Во Собранието денеска продолжи расправата на Комисијата за уставни прашања на чиј дневен ред е последниот, односно четвртиот предлог-амандман што произлезе од потребата за имплементација на договорот за името меѓу Скопје и Атина.

Премиерот Зоран Заев на расправата истакна дека со нацрт-амандманот се предлага обврската на земјава за заштита, гарантирање и негување на историското и културното наследство на македонскиот народ, како и заштита на правата и интересите на државјаните кои живеат или престојуваат во странство и унапредување на нивните врски со Македонија.

Тој заклучи дека идентитетот на македонскиот народ е заштитен и во овој дел нема да има никакви промени.

Пратеникот од ВМРО-ДПМНЕ, Владимир Ѓорчев во реплика му порача на Заев дека не ги зачувале црвените линии. Според него, договорот со Грција е асиметричен, со оглед на тоа што Грција не го менува Уставот.

Елизабета Канческа Милевска, како дел од независната пратеничка група рече дека Владата треба да се заложи да се постигне национален консензус за промената на Уставот. Таа порача дека не треба да се делиме  на патриоти и предавници и неопходно е да се пронајде начин во државата да има подобар живот.

За збор се јавија и пратениците од албанските партии. Претникот Фадил Зендели од БЕСА рече мора да се најде начин да се гарантираат правата на Албанците, како Албанци од Македонија кога се во странство.

„Треба да има посебна формулација и за дисјаспората од другите заедници, а не само за македонската, рече Зендели, на што Заев му одговори дека Уставот потенцира оти државата води грижа за сите.

Според Сурија Рушити од Алијансата на Албанците државата ги дели граѓаните на сопственици и кираџии.Тој побара да се вметне одредба за заштита на културното и историското наследство на Албанците во земјава.

За дискусија се пријавени вкупно 12 пратеници. Претходните неколку дена во Собранието, на комисиката расправа поминаа трите нацрт-амандмани кои Владата пред околу една недела ги достави до Собранието.

Претседателот на Собранието, Талат Џафери, на 1 декември ја закажа седницата за нацрт-амандманите на Уставот.

Според Деловникот, претресот во матичните комисии може да трае најмногу три работни дена по текстот на нацртот на секој амандман одделно. Собранието со мнозинство гласови од вкупниот број пратеници го утврдува нацртот на секој амандман на Уставот одделно. Во последната фаза од постапката за менување на Уставот, повторно е потребно двотретинско мнозинство. Според роковите, очекувањата се целиот процес на усвојување на уставните измени да заврши во втората половина на јануари 2019 година.

Измените на Уставот се очекува да стапат на сила откако грчкиот Парламент ќе го ратификува договорот помеѓу Македонија и Грција, како и откако Грција ќе го ратификува протоколот за пристап на Република Македонија во НАТО.