Во обраќањето по лидерската средба, денес премиерот Зоран Заев ја повика нацијата да го поддржи предлогот Република Македонија да се преименува во Република Илинденска Македонија со што ќе го направи четвртиот Илинден. Премиерот смета дека ни треба четврт Илинден за да се обединиме одново и нагласи дека Илинден е нашата светла иднина.

„Со четврт Илинден, со евентуален договор меѓу Република Илинденска Македонија неповратно го отвораме патот кон членство во ЕУ и НАТО, што е гаранција за нашиот опстанок и напредок. Јас сум Македонец и ве повикувам сите, Македонци, Албанци, Турци, Срби, Власи, Роми, Бошњаци, и сите други, ама сите – следете ме и поддржете го можното решение за 25 годишниот спор кој ја влечеше Македонија надолу конечно да го решиме. Ајде сите заедно да ставиме печат на безбедноста, стабилноста и развојот на нашата Македонија. Ајде сите заедно да поддржиме решение кое гарантира економски просперитет и унапредување на идентитетот“, повика премиерот Заев.

Тој рече дека сега е моментот кога сите политички сили, сите групи и заедници треба да се приклучат за се искористи историската шанса за дефинитевен заеднички успех на Македонија.

Заев образложи дека Илинден е судбински за Македонците. Првиот Илинден од 1903 година го претстави како симбол на заедничката борба за слободна и автономна Македонија, без разлика на вера, народност, пол и убедувања со кој е формирана првата Република на Балканот. Вториот Илинден, оној од 1944 година, според премиерот е заокружување на борбата за формирање држава. Потсети дека на вториот Илинден е воведен македонскиот јазик како службен јазик во Македонија. Третиот Илинден премиерот рече дека е 8 септември 1991 година, кога Македонија без капка крв се изборила за независност, самостојност и меѓународно признавање.

„Слободна и независна Република Македонија е плод на трите Илиндени – на Илинденското востание и Крушевската Република, на НОБ и партизанските единици кои ги носеа имињата на славните Илинденци, и на политичката борба за независна и меѓународно признаена Македонија“, рече премиерот Заев.

Прифаќање на предложеното име за Македонија ќе значи неповратно отворање на патот кон членство во ЕУ и НАТО, отворени врати, наместо блокади и повеќе пари и помош од ЕУ, смета премиерот.

Во случај да не биде прифатен предлогот од било која страна, Заев рече дека ќе остане посветен се додека не се најде решение прифатливо за двете страни.

Претседателот на ВМРО – ДПМНЕ, Христијан Мицкоски, веднаш по средбата изјави дека го отфрла предлогот оти е очигледно дека подразбира менување на Уставот, а тие не поддржуваат предлог поради кој ќе биде неопходно менување на највисокиот правен акт на државата.

Претседателот на државата, пак, по средбата излезе без став за предлогот. Рече дека ќе чека да го добие предлогот во писмена форма за да изгради став.

Средбата траеше три часа, со две паузи за консултации. Клубот на пратеници без коментар на предлогот за името го напушти претседателот на собранието Талат Џафери, а изјави не дадоа ниту лидерот на ДУИ Али Ахмети, министерот за надворешни работи Никола Димитров, вицепремиерката и министерка за одбрана Радмила Шекеринска како и вицепремиерот задолжен за европски прашања, Бујар Османи.