Законот за амнестија утрово е испратен до кабинетот на претседателот на РМ, Ѓорге Иванов, и се чека да биде потпишан, велат од кабинетот на претседателот на Собранието, Талат Џафери. Според информациите до кои стигна „Макфакс“, законот ќе биде потпишан во најбрз можен рок.

Кога законот, кој вчера беше изгласан во Собранието со 95 гласа „за“ ниту еден „против“ и ниту еден „воздржан“, ќе биде потпишан од претседателот Иванов, треба да биде објавен во „Службен весник“, со што стапува во сила.

Обвинетите за случувањата од 27 април минатата година во Собранието на РМ, според законот, ќе имаат 5 дена да поднесат барање за амнестија. По барањата на обвинетите, во рок од нови 5 дена, ќе одлучува судот, односно судечкиот совет што го води случајот, на чело со претседателката Добрила Кацарска, а во консултација со јавната обвинителка што го поднесе обвинението, Вилма Русковска.

„Макфакс“ стапи во контакт со дел од адвокатите на обвинетите за крвавиот четврток, кои велат дека засега немаат никаков став за законот за амнестија. Чекаат тој да излезе во „Службен весник“, да се консултираат со странките, па потоа заедно да одлучат дали ќе испратат барање за амнестија до судот.

Иницијатори на овој закон заедно со премиерот Зоран Заев беа и осумте пратеници од независната пратеничка група, која беше дел од ВМРО-ДПМНЕ и коалицијата. Тие дадоа поддршка на уставните измени со што на некој начин го условија парламентарното мнозинство кон донесување на овој закон.

Пратениците од „Алијансата за Албанците“, Зијадин Села и Сурија Рушиди, не го поддржаа законот за амнестија. Претседателот на партијата, Села, пред гласањето изјави дека нема мир со злосторниците и дека е срамно што тие се во салата и гласаат. Покрај пратениците од „Алијансата за Албанците“, за законот не гласаше ниту Горан Милевски, лидерот на ЛДП, коалициски партнер на СДСМ.