Македонија
Затворски казни за издавање лажни пасоши на странци со криминално досие

Четири затворски казни и една условна за лицата што признаа дека изработувале лажни пасоши на странци со криминално досие. Судечкиот совет на Кривичниот суд на Денис Баруфи му изрече 2,7 месеца затворска казна, на Ален Личини му изрече 2,3 години казна затвор, на Ѓорѓе Велков му изрече две години затвoрска казна, а на Фарух Беља му изрече 2 години условна казна затвор.
Сите овие лица се вработени во управните служби на МВР. На обвинетата Наздрие Зековиќ, која од здравствени причини не беше присутна на судењето, а преку адвокатот се изјасни како виновна, ќе ѝ биде изречена казна на наредното рочиште.
„Обвинетите, за да обезбедат материјална корист, изработувале лажни патни исправи за претходно креирање двојни идентитети користејќи податоци на лица што имаат право, но никогаш не побарале и не стекнале македонска патна исправа. Ваквото постапување довело до загрижувачки последици, односно издавање патни исправи на лица со криминално досие, лица што биле барани со меѓународни потерници за тешки кривични дела, со што овозможиле слободно преминување на државните граници“, рече судијката Оља Ристова.
Обвинетите Фарук Буки, Весна Колевска, Оливера Софрониевска, Бранислава Владичевска и Шемседин Јашари рекоа дека не се чувствуваат виновни за делото што им се става на товар по што постапката за нив беше раздвоена и продолжува на 7 мај годинава.
Во случајот обвинети се 11 лица, од кои десетмина вработени во одделението за управни работи во МВР се товарат дека го сториле кривичното дело продолжена злоупотреба на службената положба и овластувањето, а едно лице е обвинето за поттикнување.
Според обвинението, во периодот од јуни 2017 до крајот на 2020 година биле издадени пасоши на 214 странски и еден македонски државјанин.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Утре облачно време, од петок дожд и заладување

Времето утре ќе биде променливо облачно со сончеви периоди. Попладне ќе има услови за изолирана појава на краткотраен дожд и ретки грмежи. Ќе дува слаб до умерен ветер од јужен правец, информира УХМР.
Минималната температура ќе биде во интервал од 8 до 16, а максималната ќе достигне од 25 до 30 степени.
Во Скопје, променливо облачно со сончеви периоди. Ќе дува слаб до умерен ветер од јужен правец. Минималната температура ќе се спушти до 15, а максималната ќе достигне до 30 степени.
Од петок до почетокот на следната седмица под влијание на серија влажни воздушни маси времето ќе биде претежно облачно и посвежо со повремени врнежи од дожд. Наместа врнежите ќе бидат пообилни (над 20 l/m²).
Во петок ќе има локална појава на нестабилност со пороен дожд, грмежи и засилен ветер. Дневната температура значително ќе опадне (од 10 до 13 степени) во однос на денешната.
Македонија
Утре авионска дезинсекција против ларви од комарци во Скопје

Градот Скопје ги известува граѓаните дека на 25.09.2025 година (четврток), во раните утрински часови ќе се изврши авионска дезинсекција на подрачјето на градот Скопје против ларви од комарци.
Доколку временските услови не го дозволуваат вршењето на дезинсекцијата, ќе се прска првиот нареден ден, кога ќе бидат поволни временските услови, во истиот термин.
Се известуваат пчеларите навреме да ги преземат потребните мерки за заштита на пчелите.
Македонија
(Видео) Велјановски: Секогаш кога ДУИ губи, прибегнуваат кон потпалување на меѓуетничките односи

Секогаш кога ДУИ губи, секогаш кога граѓаните ќе ги прочитаат нивните вистински коруптивни намери, тие прибегнуваат кон потпалување на меѓуетничките односи и загрозување на соживотот, кажа на прес-конференција Александар Велјановски, пратеник на ВМРО-ДПМНЕ.
ДУИ, вели тој, нема аргументи и политики, единствена политика им е деструктивноста и уништувањето на соживотот на граѓаните.
ВМРО-ДПМНЕ, како што рече, најостро ја осудува срамната и опасна изјава на поранешниот министер за економија Крешник Бектеши, дадена при промоција на кандидатот на ДУИ за градоначалник на Тетово, Бајрам Реџепи.
„Бектеши, без трошка одговорност, велича оружје и отворено ја оправдува војната од 2001 година, претставувајќи ја како политички капитал. Тоа е скандал од невидени размери и директен удар врз меѓуетничките односи во државата.
Ова е класичен говор на омраза кој ја враќа Македонија во најтешките времиња. Наместо за иднината, граѓаните некој повторно сака да слушаат етнички провокации и поттикнување на поделби.
Македонците се столбот на Тетово. Со векови наназад тие се дел од неговата историја, култура и идентитет. Со својот труд и љубов кон овој град го изградиле и го зачувале. На овие избори како и многу пати претходно, токму Македонците со својот единствен сплотен глас и својата волја ќе одлучат кој ќе биде татко на Тетово и каква иднина ќе има овој град.
Ја повикуваме СДС јавно и веднаш да ја осуди оваа изјава и да се огради од својот коалициски партнер. Време е да се оттргнат од зависноста кон ДУИ и да покажат барем минимална одговорност. Секое молчење е соучесништво. Но, бидејќи СДС со години е навикнат да биде нем и покорен партнер на ДУИ, секој нивен денешен молк значи само едно, дека станале партнери и во омразата“.
Апелира до сите политички партии, организации и институции, да го осудат овој чин како отворен говор на омраза. Во Македонија, како што нагласи, нема место за политичари кои својата кампања ја градат на закани, омраза и величање оружје.
„Нашата обврска е да ја изградиме Македонија како силна, праведна и европска држава. Земја на мир и стабилност, а не на поделби и закани. Народот очекува јасна позиција, а ние ќе продолжиме да ја браниме Македонија од сите што сакаат да ја претворат во заложник на криминални и етнички поделби“.