Македонија
Захариевски: ЗНАМ предвидува мерки за развој на бањскиот и медицинскиот туризам од кои Македонија може да оствари значајни приходи
Небојша Захариевски, носителот на кандидатската листа за пратеници во ИЕ 6 од Движењето ЗНАМ – За наша Македонија денеска одржа прес-конференција на која ги претстави мерките за развој на туризмот, предвидени во програмата на Движењето „Проглас за достоинствена Македонија“.
Тој рече дека во делот на градењето на Македонија како самоодржлива држава, туризмот зазема мошне важно место во Програмата, затоа што со добро развиен туризам, Македонија може да обезбеди и самоодржлив економски развој и просперитет на сите граѓани подеднакво во сите осум плански региони. Ова поради тоа што Македонија поседува одлични природни предуслови за максимален раст и развој на оваа гранка.
„За да се постигне максимумот ќе ги преземеме следните конкретни мерки и чекори:
– промоција на македонските културни и природни богатства, преку директно субвенционирање на проекти за афирмација на природното и културното наследство на Македонија;
– развивање на алтернативни облици на туризмот – планинарењето, качувањето, велосипедизмот, кампувањето, оф роуд скијањето, алпинизмот, етно селскиот туризам;
– обезбедување на развој на бањскиот и на медицинскиот туризам на највисоко ниво, изградба на комплетна инфраструктура како предуслов за изградба и модернизација на нови бањски системи, како и преку субвенционирање на наменски авионски летови за туристички групи на овие локации;
– подобрување на менаџирањето на сите Национални паркови во Македонија, особено нивно поврзување со сите локални туристички чинители во најширок контекст се со цел забрзување на промоцијата и препознатливоста на туристичките содржини и екслкузивитети со кои располага Македонија како неоткриена светска дестинација“, рече Захариевски.
Тој додаде дека за да може сето ова беспрекорно да функционираќе се воведе систем за формирање туристички дестинации според европски модел.
Секој плански регион ќе претставува туристичка дестинација, односно осум плански региони ќе претставуваат осум туристички дестинации плус градот Скопје, се со цел за подобро претставување пред светската туристичка клиентела.
„Во овој контекст, рече Захариевски, напоменуваме дека мошне важно место во спроведувањето на овие мерки ќе има соработката со коморските туристички организации и со туристичките синдикални организации, за да може и тие да дадат придонес и партнерски да учествуваат во носењето на сите наведени мерки и приоритети за развој на туризмот во Македонија“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Уапсен врховен судија поради сомненија за примање поткуп
Врховниот судија Наке Георгиев е уапсен поради сомнеж за примање поткуп.
„Денеска 20 мај, лишен од слобода е судија од Врховниот суд поради сомневања за сторено кривично дело Примање награда за противзаконито влијание. Судијата е лишен од слобода на лице место при извршување на кривичното дело. Се чекаат натамошни насоки од надлежен јавен обвинител“, велат од МВР.
Засега не е позната локацијата каде што е приведен судијата, ниту пак, за колкава сума станува збор.
Македонија
Сиљановска доби честитка од кралот Чарлс
Претседателката Гордана Сиљановска Давкова денеска го прими амбасадорот на Обединетото Кралство на Велика Британија и Северна Ирска, Метју Лосон.
На средбата беа разменети мислења за севкупните билатерални односи меѓу двете држави, при што претседателката Сиљановска Давкова истакна дека нашата држава придава особено значење на развојот на пријателските односи и соработката со Обединетото Кралство, вклучувајќи го сојузништвото во НАТО алијансата. Претседателката Сиљановска Давкова посочи на нејзината подготвеност за натамошно унапредување на билатералната соработка со Обединетото Кралство во сите сфери од заемен интерес.
Претседателката Сиљановска Давкова истакна дека како држава особено ја цениме британската поддршка во исполнувањето на стратешката цел – членство во Европската Унија, која продолжи и по Брегзит.
Амбасадорот Лосон на претседателката Сиљановска Давкова и предаде честитка од Кралот Чарлс Трети по повод нејзиното стапување на функцијата, во која упатува најискрени честитки за нејзиниот избор.
„Уверен сум дека ќе го вложите целиот Ваш капацитет за време на Вашиот мандат како Претседател за справување со големите предизвици на нашето време, почнувајќи од справувањето со климатските промени до продлабочувањето на евроатлантската интеграција на Северна Македонија. Многу сум задоволен што нашите две земји имаат воспоставено цврсти трговски и безбедносни односи. Оттука, се надевам дека за време на Вашиот мандат како Претседател односите, кои се веќе толку блиски, уште повеќе ќе се продлабочат“, се вели во честитката од Кралот Чарлс Трети.
Македонија
Сиљановска Давкова се сретна со украинската амбасадорка Дир
Претседателката Гордана Сиљановска Давкова денеска ја прими амбасадорката на Украина, Лариса Дир.
На средбата, беше изразено задоволство од традиционалните пријателски односи, засновани на заемна почит и меѓусебно разбирање. Претседателката Сиљановска Давкова ја нагласи нејзината заложба за продлабочување на соработката во сите области од заеднички интерес, реафирмирајќи ја поддршката за Украина против руската агресија, со која се поткопува европската глобална безбедност и стабилност.
Двете соговорнички разменија мислења и за стратешките определби и перспективите на двете земји, истакнувајќи ја потребата од натамошна заемна помош, споделување искуства и експертиза. Претседателката Сиљановска Давкова ја нагласи македонската поддршка за Украина на нејзиниот пат кон Европската Унија и НАТО.
Амбасадорката Дир, упатувајќи честитки за изборот на претседателката Сиљановска Давкова ѝ посака успешно извршување на функцијата.