Македонија
Зајкова од состанокот на АЛДЕ во Хелсинки: Одбрана, дигитализација и брзо проширување за целосна интеграција на Западен Балкан

На Советот на АЛДЕ (Алијанса на либерали и демократи за Европа), кој викендов се одржува во Хелсинки, Финска, Либерално-демократската партија (ЛДП), ги предложи и ги промовираше двете итни резолуции кои имаат за цел да го затворат растечкиот јаз меѓу Европската Унија и земјите од Западен Балкан – едната за интеграција на Западен Балкан во европскиот одбранбен систем, а другата за забрзано донесување на конкретни придобивки за граѓаните.
„На Советот на АЛДЕ во Хелсинки либерал-демократите уште еднаш ја потврдија својата визија за проширена и обединета Европа, усвојувајќи ја резолуцијата на Либерално-демократската партија (ЛДП) од Македонија, со која што јасно се укажува на проширување на Европската Унија до 2030 година, согласно Копенхашките критериуми“, со почитување на македонската посебност, јазик и идентитет, изјави по состанокот претседателката на ЛДП, пратеничка во македонското собрание и претседателка на Либералите од Југоисточна Европа (ЛИБСЕЕН), Моника Зајкова.
Првата резолуција предложена од ЛДП повикува на итно започнување разговори за вклучување на земјите од Западен Балкан – особено Северна Македонија, Албанија и Црна Гора – во одбранбената архитектура на ЕУ. Тоа подразбира пристап до Европскиот одбранбен фонд (EDF), учество во Постојаната структурирана соработка (PESCO), како и вклучување во клучните индустриски и стратешки иницијативи на Европската Унија, со нагласок дека овие чекори се неопходни за да се отстрани опасниот геополитички вакуум во срцето на Европа.
„Усвоена е уште една резолуција на ЛДП, која што е поддржана и од либерално-демократските партии од регионот на југоисточна Европа, а која што се однесува на целосно интегрирање на земјите од Западен Балкан во Европскиот одбранбен и безбедносен систем, кој што изнесува повеќе од 150 милијарди евра, но и во системот на слободен роаминг, односно роаминг како дома“, посочува претседателката Зајкова.
Втората резолуција ја нагласува потребата од итно проширување на режимот Роаминг како Дома (Roam Like at Home – RLAH), на земјите од Западен Балкан, особено имајќи предвид дека Украина и Молдавија наскоро ќе бидат вклучени во овој систем. Во резолуцијата на ЛДП стои дека доколку овие земји можат брзо да добијат пристап, нема оправдување тоа да не важи и за регионот на Западен Балкан. Преку резолуцијата ЛДП бара и целосна интеграција на Западен Балкан во ЕУ заклучно со 2030 година исклучиво според мерит систем односно постигнат реформски напредок.
„Продолжуваме да се бориме за интересите на Македонија, на македонските граѓани, но и на сите граѓани во Западниот Балкан. Западен Балкан заслужува да биде успешна приказна во Европа, односно дел од Европската Унија, каде што и припаѓа“, додава Зајкова.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Скопје
(Видео) Храбри полицајци гаснеа пожар во Бутел и завршија во болница, Костовски најави награда

Двајца полицајци од полициската станица Бутел денеска покажаа вистински херојство откако ги ризикуваа свои животи за да помогнат во гасењето на пожар кој се закануваше на детска градинка и училиште во општината. Дарко Стајковски и приправникот Филип Стојчевски, при интервенцијата вдишале јаглерод моноксид, поради што се пренесени на Клиниката за токсикологија во Скопје.
За среќа, лекарите потврдуваат дека нивната здравствена состојба е стабилна и дека се под постојан медицински надзор.
Градоначалникот на Бутел, Дарко Костовски, ја поздрави нивната храброст и најави дека општината ќе ги награди.
„Секоја чест за Дарко и Филип! Ова е вистински пример за пожртвуваност и љубов кон заедницата. Благодарение на нивната брза реакција спречена е голема трагедија и спасени се животи. Општината Бутел ќе се погрижи нивниот чин да не остане незабележан“, изјави Костовски.
Во гаснењето на пожарот учествуваа и други екипи, за кои градоначалникот додаде дека исто така ќе бидат соодветно наградени.
Скопје
(Видео) Вистинска драма кај „Борис Трајковски“, евакуација на публика, 9 полицајци завршија во болница

Попладнево околу 16 часот во близина на Спортскиот центар „Борис Трајковски“ во Скопје изби пожар кој предизвика паника кај учесниците и посетителите на меѓународниот ракометен турнир. Благодарение на брзата реакција на полициските службеници и противпожарните екипи, спречено е ширење на огнените јазици кон паркираните возила, околните објекти и лизгалиштето кое е во рамки на спортскиот комплекс.
Според информациите, полицијата извршила навремена евакуација на сите спортисти, спортски работници и публика, со што е избегната поголема несреќа.
Како последица на вдишаниот чад, девет полициски службеници завршија на Одделот за токсикологија каде им е укажана лекарска помош и се на кислородна поддршка. Од болницата информираат дека сите се во стабилна состојба.
Надлежните служби остануваат на терен за да ги утврдат причините за пожарот.
Македонија
„Марш на ангелите“: Кој ги штити виновниците, прашаа родителите во Кочани

Во Кочани денеска се одржа 20-тиот „Марш на ангелите“, тивок протест во спомен на жртвите од трагедијата во дискотеката „Пулс“. Родителите и семејствата на загинатите уште еднаш упатија силни пораки за правда, обвинувајќи дека институциите го штитат криминалот наместо младите животи.
Пред Полициската станица во Кочани тие порачаа дека системот потфрлил затоа што, како што рекоа, имало „заштитници и соучесници во униформа“. Тие побараа неселективна и транспарентна истрага, како и одговор од ОЈО ГОКК за тоа до каде е постапката против вработените во МВР.
„Зошто тие сè уште се на слобода?“ – прашаа родителите.
Маршот започна во 17:05 од „Паркот на револуцијата“, минувајќи низ центарот на градот и завршувајќи пред Основниот суд и Основното јавно обвинителство во Кочани. Таму семејствата порачаа дека нивната борба не е само за сопствените загубени деца, туку за секое дете во државата.
„Без независен и некорумпиран судски систем, вакви трагедии ќе се повторуваат. Нашите деца ги нема, но вие имате обврска да ја истерате правдата“, изјавија родителите.
Маршот, проследен со силен ветер, заврши со апел до институциите конечно да ја преземат одговорноста и да ја докажат вистинската правда.