Македонија
За веледрогеријата „Пановски“, изјавите на Лефков се директна закана и клевета, најавуваат правни дејства

Веледрогеријата „Пановски“ реагира на изјавите од страна на ВМРО-ДПМНЕ и нивниот пратеник Миле Лефков, кој денеска на прес-конференција рече дека веледрогеријата „Д-р Пановски“ „е сопственост на таткото на Ирина Пановска, која Венко Филипче ја постави за директорка на Клиниката за хематологија од 2022 година и до сега зела неверојатни 35 милиони евра тендери, само од Клиниката за онкологија и радиотерапија“.
„АД „Д-р Пановски“ Скопје не е политичка партија и не учествува на избори, туку е приватна компанија, меѓународен конзорциум, во кој има ЕУ и швајцарски капитал, и е основана пред 30 години. Оттука, обидот да бидеме вовлечени во дневнополитичката пресметка на партиите го сметаме за непосредно загрозување на темелните вредности на македонскиот Устав, како правната заштита на приватна сопственост и слободата на пазарот и претприемаштвото“.
Земајќи предвид дека последниот напад доаѓа од пратеник на владејачка партија, тоа го доживуваме и како директна закана за што ќе ги информираме надлежните меѓународни организации.
Особено што тоа го направи на крајно клеветнички и неодговорен начин кон АД „Д-р Пановски“ и без никаков основ нè посочува како директен виновник за недостигот на лекови во јавното здравство за најтешко болните пациенти. Ваков говор на омраза е многу опасен преседан за македонските компании, креира правна несигурност, што е недозволиво за држава што е полноправен член на НАТО и претендент за полноправно членство во ЕУ.
Апсолутна невистина се обвинувањата дека АД „Д-р Пановски“ ја диктира ценовната политика на лековите и со тоа наводно го уценува јавното здравство со високи цени за онколошка терапија. Законот за формирање цени на лековите е донесен во 2007 година, со кој се регулира начинот на формирање на цените на лековите, каде што јасно стои дека одговорни за методологијата за формирање цени се Министерството за здравство и одделот за формирање цени на лекови при Министервото.
Зад квалификациите дека „Д-р Пановски“ е омилена партиска веледрогерија, всушност, се кријат бизнис-интереси со цел да се наместат нови доставувачи на лекови и медицински материјали и опрема.
Добронамерно му порачуваме на г. Лефков, пред да ја стави АД „Д-р Пановски“ повторно во некаков партиски контекст, внимателно да се информира колку јавните здравствени институции имаат заостанати долгови кон нашата компанија за веќе испорачани лекови и во кој период тие долгови се акумулирани.
Наш императив е пациентите да добиваат и да им биде достапна најсовремена медицинска терапија и затоа не ретко сме се ставале во функција на јавното здравство и тогаш кога тоа било на наша штета.
Наша обврска е да го заштитиме нашиот корпоративен имиџ бидејќи ваквите напади ни причинуваат сериозна нематеријална и материјална штета. Правниот тим на АД „Д-р Пановски веќе презема соодветни дејства во оваа насока“, се истакнува во демантот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: Не ми паѓа на памет да размислувам за било какви уставни измени, без гаранции

Без гаранции не ми паѓа на памет да размислувам за уставни измени. Нашата позиција е јасна, ние не ги игнорираме обврските што претходната влада на СДСМ ги прифатила, за жал, но исто така не гледаме дека нашиот источен сосед прави нешто во насока на испорака на своите обврски. Очекуваме поробусна акција од ЕУ и кај нашиот источен сосед, односно кај нивниот партнер во рамки на европското семејство зашто сме виделе во минатото многу пати – кога се сакало се се можело, порача денеска премиерот Христијан Мицкоски.
„Вчера дадов еден краток коментар, денес бидејќи ме прашувате ќе дадам одговор на вашето прашање и ќе го поделам одговорот во два дела,“ изјави Мицкоски, одговарајќи на новинарско прашање во врска со неговиот став во однос на Резолуцијата и на решението да се донесат уставни измени до февруари поднесена од страна на претседателот на опозициската СДСМ Венко Филипче.
„Првиот дел е дека, за жал и ова раководство на СДСМ ја продолжува практиката на претходните раководства на СДСМ да ги руши позициите на македонската Влада и на државата, да ги распродава идентитетските и националните приоритети, од, за мене, неразбирливи причини. Ако на времето тоа го правеа за да се одржат на власт, за да можат да ги злоупотребуваат институциите и ресурсите на државата, не го оправдував се разбира за тоа има одговорност, но и некако ги разбирав. Сега не ги разбирам од опозиција зошто мора да ги подриваат позициите на Владата којашто грчевито се бори, тоа што тие го распродадоа, изминатите 7 години кога беа во влада, да го поправи. И на меѓународен и на домашен план,“ истакна Мицкоски и додаде:
„Второ, Резолуцијата, таканаречена, којашто ја видов и текстот внатре ќе се разгледува после изборите, така го разбрав раководството на СДСМ.
Трето, таму има историски фалсификати. Во годината кога славиме 80 години од кодификацијата на македонскиот јазик, тие не убедуваат во Резолуцијата дека тој во Обединетите нации бил прифатен во 19-тата година, мислам, не знам што да кажам. И вчера го кажав фактот дека во 2005-тата година, не доби Северна Македонија дата за почеток на преговори, туку доби Република Македонија. Тоа се историски фалсификати, јас не знам до кога овие луѓе ќе се служат со историски фалсификати“.
„И конечно, нашата позиција е јасна. Ние не ги игнорираме обврските што таа влада ги прифатила, за жал. Но, исто така, не гледаме дека нашиот источен сосед прави нешто во насока на испорака на нивните обврски и очекуваме исто така, поробусна акција од страна на Европската комисија и Европската Унија и кај нашиот источен сосед, односно кај нивниот партнер во рамките на европското семејство. Затоа што сме виделе во минатото многу пати дека кога се сакало, се можело.
Ние имаме јасна позиција – гаранции, коишто ги спомена претседателот на Европскиот совет, бидејќи македонскиот народ и граѓаните во Македонија без разлика на етничката припадност, многу дадоа во името на таа европска иднина на државата, многу дадоа, како ниеден друг народ во Европа. Сакате да тргнеме од 18-ти, 19-ти век па наваму да анализираме. Сега веќе да не зборуваме, последниов. Без такви гаранции, на памет не ми паѓа да размислувам за било какви уставни измени,“ истакна Мицкоски.
Тој е дециден дека никогаш нема да се откаже од македонскиот народ во соседството и насекаде во светот.
„Што со Македонците од другата страна на таа граница? Што со нив? Ќе се откажуваме ли секогаш како влади од македонскиот народ во соседството и насекаде во светот? Тоа јас нема да го направам. Никогаш. А треба само едноставно да се применат пресудите од Стразбур, ништо повеќе не треба да прават. Тоа е меѓународно право, Бугарија е потписник на тие конвенции. Само треба да го применат она коешто го донел Европскиот суд за човекови права во Стразбур, којшто е европска темелна вредност. Да може ОМО Илинден – Пирин да функционира како здружение на Македонците во Бугарија. И со тоа ќе се стекне ОМО Илинден – Пирин со право да претстави свој човек во Министерскиот совет за малцинства во Бугарија, како што имаат Евреите, Ерменците, Турците, Ромите итн. Заслужиле Македонците коишто, според пописот во 56-та година биле мнозинство во Западна Бугарија, а во 65-та магично 200 илјади исчезнуваат, во следниот попис да имаат свој претставник тамо. И јасно држење до Резолуцијата од јули 2022-та година којашто ја гласаше Парламентот заеднички со 95 гласа. Ништо друго не бараме. Ова е тоа што го бараме. Ова се се факти. Кога ќе видиме подготвеност од другата страна, и ние сме подготвени да седнеме и да разговараме. А за оваа Резолуција, тоа малку што имаме да го кажеме ќе го кажеме после изборите,“ рече Мицкоски.
На новинарското прашање дали ги прифаќа црвените линии на Филипче тој одговори дека не прифатиле негови црвени линии, прифаќа македонски црвени линии: „не би го коментирал тоа, можеме да растураме пердуви колку сакаме, ниту сме прифатиле црвени линии негови, јас прифаќам македонски црвени линии“.
Македонија
„OCR Кучково 2025“: во недела петто издание на трка со препреки во Македонија

На 28 септември 2025 година, во с. Кучково, Општина Ѓорче Петров (кај Крстот), ќе се одржи петтото издание на единствената трка со препреки во Македонија, организирана од Спортското здружение ОТАКУ СКОПЈЕ.
Оваа трка претставува уникатно спортско и адреналинско доживување за сите учесници, кои ќе можат да ја тестираат својата физичка и психичка подготвеност на патека долга преку 8 км која има повеќе од 20 предизвикувачки препреки. Трката вклучува качување по јаже, преминување преку високи ѕидови, ползење низ кал, носење товар, трчање низ природен терен, како и многу други предизвици кои остануваат изненадување, најави организаторот.
„OCR Кучково“ е многу повеќе од спортска трка – тоа е тест за издржливост, самонадминување и тимски дух, кој создава незаборавни моменти за секој што ќе застане на стартната линија.
По завршувањето на трката ќе се одржи церемонија за наградување на најдобрите во категориите: мажи, жени и тимови“.
Организаторите ги покануваат сите љубители на спортот, авантурата и природата, да ги бодрат натпреварувачите и да уживаат во единствената трка со препреки во земјава, која ќе се одржи во недела (28 септември, во 10:00 часот), кај Крстот во с. Кучково.
Македонија
Доста е со декларации и резолуции, да се фатиме за работа, порачува Демократскиот сојуз

Демократскиот сојуз предлага конкретна активност, а не резолуции или декларации ко според нив се користат за дневно политички препукувања, манипулации и политички маркетинг.
Демократскиот сојуз бара да се престане со носење на резолуции и декларации кои никого не го обврзуваат и никој не ги разгледува или чита.
Демократскиот сојуз предлага македонскиот Парламент да се обрати до Советот на Европската Унија со следните барања:
Советот на Европската Унија да ги донесе следните заклучоци:
Прво, по приемот на Македонија во Европската Унија, Македонскиот јазик да биде официјален јазик.
Второ, историските, идентитетските и јазичните прашања да не можат да бидат основа за блокада на евроинтегративните процеси.
Трето, да ја обврзе Бугарија да ги спроведат одлуките на Меѓународниот суд за човекови права од Стразбур, со кои ќе им се овозможи на Македонците во Бугарија да се здружуваат за афирмација на своите особености поврзани со јазикот, културата, историјата итн“.
На овој начин, како што оценуваат од оваа партија, ќе се покаже национално единство и ќе се предизвика реакција од страна на ЕУ.