Македонија
За да добива лиценци, сопственикот на „Пулс“ со години користел незаконски проект, а подмитил и службеник, според истрагата
Верижните пропусти и незаконитите дејства на одговорните и на службените лица довеле до смртоносниот пожар во дискотеката „Пулс“ во Кочани.
Државниот јавен обвинител, Љупчо Коцевски, соопштувајќи детали за истрагата, која се води против 27 лица, рече дека сопственикот на дискотеката 11 години користел незаконски изработен проект за да добива лиценца.
Коцевски објасни дека трoјца осомничени се јавуваат како одговорни лица, сосопственици или управители во извесен период во фирмата, чија подружница е клубот. Обвинителот вели дека објектот со намена за лесна индустрија, кој се наоѓал во индустриска зона, воопшто не исполнувал услови да биде пренаменет во угостителски објект. Но, и покрај тоа, во континуитет во целиот период осомничените добивале лиценца незаконито и организирале угостителски услуги. Притоа сите знаеле и биле свесни дека клубот не ги исполнува законски пропишаните услови и начин за вршење угостителска дејност.
Во тој контекст, постои сомневање дека сопствникот подмитил лице вработено во Министерството за економија за периодот од февруари 2024 до февруари годинава и без да биде спроведена законски пропишаната постапка, обезбедил фалсификувана лиценца за вршење угостителска дејност. Поради тоа, против вработениот во Министерството е поведена постапка и за примање поткуп.
Осомничена е и сопственичка и управителка на фирма од Кочани, која во текот на 2010 година постапила по барање на сопственикот и му изготвила основен проект како услов за работа на кабарето иако знаела дека не постоеле законски услови индустрискиот објект да биде пренаменет во дискотека.
„Овој незаконит проект, сопственикот, во периодот од 2012 до 2023 година, во континуитет незаконито го користел во прилог на барање за добивање линценци за вршење угостителска дејност. Во 2023 година тој ѝ се обратил на осомничената за да изврши корекција на основниот проект, а таа, без да изврши проверки на самото место, незаконски извршила промена на правните лица во основниот проект и со тоа овозможила кабарето да поднесува барања за лиценца“, изјави Коцевски.
Од Министерството за економија до овој момент осомничени се поранешен министер, но и поранешен државен секретар, раководител на сектор, раководител на одделение и помлад соработник, кои и во моментот работат во Министерството, но на други раководни позиции. Според Обвинителството, сите тие со неизвршување на своите службени должности, што биле правно должни да ги извршат, не постапиле според прописите и техничките правила за мерките за заштита и на фирмата која не ги исполнувала пропишаните услови и начин за вршење угостителска дејност и во повеќе наврати со лиценци му овозможиле вршење угостителска дејност – кабаре.
Двајца поранешни директори на Државниот пазарен инспекторат и три службени лица инспектори се сомничат дека во пет години не извршиле контрола над работењето на фирмата за да утврдат дали има важечка лиценца.
Осомничените тројца градоначалници на Кочани во периодот од 2012 година до кобниот ден кога се запали дискотеката, како и осомничениот поранешен директор на Дирекцијата за заштита и спасување, не ги извршиле своите правни обврски во согласност со Законот за заштитата и спасувањето, со што овозможиле кабарето „Пулс“ незаконито да продолжи со вршење угостителска дејност. За целиот овој период Општината примала уплати по основ на надоместок за угостителски објект.
Коцевски денес првпат обелодени дека и член на ДНК е осомничен поради пиротехниката, која, според сомнението, ја активирале како дел од сценскиот настап.
Беше кажано дека и дискотеката имала устен договор за концертот со бендот, објектот бил пренатрупан и никој не ги сопрел децата да влегуваат.
Сите осомничени се обезбедени. Кочанското Обвинителство, со оглед на тежината на кривичното дело што им се става на товар и сите други околности, бара притвор за сите осомничени, со исклучок на три лица, кои се хоспитализирани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Николоски: Со Лабудовиќ како иден градоначалник на Центар ќе најдеме решенија за сите проблеми во Маџир Маало
Кандидатот за градоначалник на општина Центар од Движењето ЗНАМ поддржан од ВМРО-ДПМНЕ Мирослав Лабудовиќ и вицепремиерот и министер за транспорт и врски Александар Николоски денеска остварија средба со жителите на Маџир Маало, на кој им ветија дека ќе направат се за набргу да им ги обезбедат сите неопходни услови за живот и развој во 21 век. Со вицепремиерот и министер имаме заедничка согласност дека оваа брутална бетонизација што му се случува на Центар треба да запре час поскоро. А, првиот чекор е носење и ревизија на сите урбанистички планови. Што ќе се прави со континуирана соработка на локалната со централната власт.
„Имаме заеднички став дека новиот детален урбанистички план за Маџир Маало, ќе биде квалитетен, за модерен развој на овој дел од Скопје и, се разбира, исклучиво во интерес на граѓаните. Со нив ќе се консултираме како сакаат, каква потреба имаат тие за овој дел од нашата општина. Дополнително планираме изградба на нова градинка на овој потег, како и модернизација на улиците кои долго време не се санирани“, рече Лабудовиќ, нагласувајќи дека соработката што ќе ја имаат и со Минстерството за транспорт и врски и со Град Скопје ќе биде исклучиво во штитење на јавниот интерес.
Вицепремиерот и министер за транспорт и врски Александар Николоски пак, посочи дека е жално во 21 век луѓето да живеат во субстандардни услови во срцето на Скопје.
„И овде на дело може да видите како изгледа урбанистичкиот хаос и создавање на урбанизам во интерес само на поединци. Затоа што, поединци кои се блиски до актуелното раководство на општина Центар не може овде да си го најдат личниот финансиски интерес или да најдат бизнис и токму затоа луѓето живеат во сосотјба која не личи на 21 век – со уништени улици, без соодветен водовод и канализација и со нерешени имотни прашања. И, ова на најдобар начин покажува како се уништува општината и зошто се неопходни промени во Центар“, потенцираше Николоски.
Вицепремиерот Николоски верува дека заедно со Лабудовиќ, кого го нарече иден градоначалник на Центар, ќе работат на изнаоѓање решенија за сите проблеми и предизвици со кои се соочуваат маџлирмаалци. За, конечно тие да дојдат до пристојни услови за живот.
Македонија
Минчев: Со новиот закон и Академијата поставуваме темели за модерна, стручна и европска јавна администрација
Министерот за јавна администрација, Горан Минчев, се обрати на јавната дискусија на тема „Имплементација на Законот за стручно усовршување и обука на административните службеници“, организирана од страна на Министерството за јавна администрација во рамки на проектот „Поддршка за воспоставување на Академија за стручно усовршување и обука на административните службеници“, кој се реализира во партнерство со Центарот за управување со промени (ЦУП) и со поддршка на Амбасадата на Република Франција во Скопје.
На настанот свое обраќање имаа и амбасадорот на Република Франција, Н.Е. г. Кристоф Ле Риголер, д-р Неда Малеска Сачмароска, извршна директорка на ЦУП, францускиот експерт проф. д-р Jean-Michel Eymeri-Douzans од Институтот за политички студии во Тулуз, како и претставници од Генералната дирекција за администрација и јавна служба на Франција (DGAFP). Меѓу присутните беа и гости од дипломатскиот кор, владини функционери, претставници на државни институции, граѓанскиот сектор и академската заедница.
Во своето обраќање, министерот за јавна администрација Горан Минчев истакна дека со донесувањето на новите закони за јавната администрација, а особено со Законот за стручно усовршување и обука, се поставуваат нови стандарди во јавната служба.
„Законот за стручно усовршување и обука на јавните службеници е суштинска промена. Промена што ја премостува децениската разлика меѓу желбата за европска администрација и реалноста што ја градиме денес – модерна, стручна и одговорна администрација,“ нагласи министерот Минчев.
Тој потенцираше дека партнерството со Француската амбасада и со француските институции претставува доказ за довербата на европските партнери во реформите што се темелат на знаење, транспарентност и резултати.
„Проектот ‘Јакнење на капацитетите и професионализација на администрацијата’, кој го реализираме со поддршка од Француската амбасада, во партнерство со Националниот институт за јавна администрација (INSP), Генералната дирекција за администрација и јавна служба и Центарот за управување со промени, претставува вистински темел за создавање нов систем – систем во кој институциите не се формалност, туку алатка за развој,“ изјави министерот.
Министерот Минчев најави дека во рамките на оваа соработка ќе биде воспоставена Академија за стручно усовршување и обука на административните службеници, како институција што ќе стане „срцето на професионализацијата на јавната служба“.
„Со формирањето на Академијата, која ќе се структуира во рамките на овој француско-македонски проект, создаваме институција која ќе биде срцето на професионализацијата на јавната служба. За прв пат во историјата на нашата држава, системски и институционално ги регулираме стручните обуки на јавните службеници,“ изјави Минчев, додавајќи дека „секој административен службеник – од најмладиот до најискусниот – ќе има можност да се надградува, да стекнува нови знаења и да го покаже својот професионален капацитет.“
Во своето обраќање, министерот се заблагодари на амбасадорот на Франција, на ЦУП и на сите партнери кои придонесуваат за реализација на реформите во јавната администрација.
„Ова е партнерство меѓу државата и нејзините луѓе, меѓу институцијата и службеникот, меѓу знаењето и јавниот интерес,“ нагласи тој.
Настанот вклучи две панел-дискусии со учество на домашни и меѓународни експерти, кои ги презентираа моделите и искуствата во организацијата на академии за обука, како и најдобрите практики во континуираната едукација на јавните службеници.
Министерството за јавна администрација останува посветено на реформите што водат кон создавање професионална, транспарентна и европска јавна администрација, која ќе биде темел на модерна и одговорна држава.
Македонија
Герасимовски: Ги прошируваме капацитетите на „Јохан Хајнрих Песталоци“, го санираме покривот и создаваме подобри услови за учениците
Кандидатот за нов градоначалнички мандат во Општина Центар, Горан Герасимовски, најави проширување на капацитетите на ООУ „Јохан Хајнрих Песталоци“.
„Со зголемувањето на бројот на ученици, потребата за дополнителен простор стана приоритет. Затоа ќе инвестираме во проширување на капацитетите на училиштето со изградба на нови училници,“ рече Герасимовски.
Во програмата се предвидува и промена на фасадната столарија и подовите, како и партерно и хортикултурно уредување на дворот на училиштето.
Дополнително, по промената на кровот на училиштето, реконструкцијата на отворените игралишта и тековната санација на покривот врз спортската сала, „Ј.Х. Песталоци“ ќе биде целосно реконструирано.

