Македонија
За три дена, затворени 14 угостителски објекти во Скопје, Гостивар и во Куманово

Инспекторите за три дена затвориле 14 угостителски објекти во Скопје, Гостивар и во Куманово. Препораките за затворање на угостителските објекти на територијата на целата земја главно се почитуваат, но во изминатите три дена инспекторите затвориле 14 објекти, кои не ги почитувале препораките и биле отворени за посетители иако не смееле, беше соопштено на денешната прес-конференција на Инспекцискиот совет.
„Инспекторите се на терен и ги санкционираат сите оние што не ги почитуваат мерките и препораките на Владата за заштита од коронавирусот. За сите оние кај кои ќе биде утврдена неправилност, ќе следуваат санкции и казни“, рече претседателката на Инспекцискиот совет, Магдалена Филиповска-Грашкоска.
Што се донесува до цените во маркетите, инспекторите констатираат дека нема покачување на цените, а меѓуопштинскиот сообраќај е редуциран 80 отсто.
„Меѓународниот сообраќај е во прекин, а меѓуопштинскиот превоз се редуцира 80 отсто. Инспекторатот за труд реализира 583 контроли и донесе 5 решенија и 26 укажувања за вработени лица, кои треба да бидат дома со своите деца, а работодавците не го почитувале правилото. Инспекциските служби работат на терен и со цел да обезбедиме целосно почитување на мерките и секој што нема да се придржува, ќе биде санкциониран. Мерките се заштита на сите граѓани, сите сме одговорни, заштитата зависи од сите нас“, рече Филиповска-Грашкоска.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Незаконски и неуставно е отворање на приватното средно училиште „Медресеја Иса Беу“ во Кондово, одлучи Уставниот суд

Уставниот суд денеска ја укина Одлуката за давање одобрение за основање на Приватно средно училиште „Медресеја Иса Беу“ во село Кондово, Скопје,која е донесена од страна на Владата на 26 март 2024 година.
„Судот оцени дека Одлука на Владата е незаконита и неуставна, бидејќи Владата дала согласност, односно дозволила Исламската верска заедница ИВЗ да биде основач на средно училиште- гимназија“, соопштија од Судот.
Од таму наведуваат дека ова е во спротивност со членот 7 од Законот за средно образование кој забранува верско организирање и дејствување и истакнување на верски симболи во средните училишта.
„Исто така содржината на Одлуката не е во согласност со Амандманот VII од Уставот според кој верските заедници можат да основаат само верски училишта во кои се предава веронаука, односно се проповеда и изучува конкретна религија. Судот ги прифати како основани наводите во иницијативата дека со донесувањето на оспорената одлука Владата ја повредила уставната одредба за одвоеност на државата од верските прашања“, соопштија од Уставниот суд.
Македонија
СДСМ почна постапка за утврдување кандидати за локалните избори

Синоќа се одржа седница на Централниот одбор на СДСМ на која се дискутираше за повеќе теми поврзани со актуелната политичко-економска ситуација во земјата, беа донесени неколку заклучоци но и одлуки за подготовките на партијата за претстојните локални избори.
Од денес, 30.04.2025 година, започнува постапката за утврдување на кандидатите на СДСМ за советници и градоначалници на претстојните локални избори.
„Преку отворена, инклузивна, транспарентна и демократска внатрепартиска постапка, СДСМ заедно со своето членство ќе ги избере најдобрите кандидати за локалните избори. Целта е СДСМ да биде претставена од способни и кредибилни личности, кои уживаат доверба и во својата околина, и меѓу сопартијците, но и од граѓаните кои живеат во општините. Луѓе кои можат да испорачаат резултати и имаат капацитет да ја спроведат програмата со која партијата ќе настапи пред граѓаните“, велат од СДСМ.
Исто така, Централниот одбор го овласти претседателот на партијата, Венко Филипче, да оствари разговори со постојните коалициски партнери на СДСМ, како и со потенцијални нови коалициски сојузници за настап на локалните избори.
„Централниот одбор на СДСМ оцени дека непосредно пред локалните избори, иституциите под контрола на власта, координирано вршат притисок врз градоначалниците од редовите СДСМ. Тоа го сметаме за тенденциозен политички притисок и претставува злоупотреба на државните институции во партиски цели од страна на ДПМНЕ. СДСМ со сите механизми кои ги има на располагање ќе го штити интегритетот на нашите градоначалници и ќе ги брани демократските стандарди и приници“, велат од партијата.
Пратеничката група на СДСМ подготвува и специјален закон за обезбедување конкретна и директна поддршка за семејствата погодени од трагедијата во Кочани. Законот ќе биде поднесен во Собранието во текот на следната недела. Тој е изготвен според меѓународни искуства и добри практики од земји кои се соочиле со слични несреќи.
„Со законот се предвидува финансиска и институционална помош за семејствата на настраданите, како и дополнителна поддршка за оние кои имаат повредени блиски. Целта е да се помогне во надминување на последиците и трошоците што произлегуваат од трагичниот настан, но и да се зајакнат институционалните системи што се покажаа како недоволно подготвени“, велат од партијата.
Од таму велат дека остро се спротивставуваат и го осудуваат секој обид за политичка злоупотреба.
„За време на средбата со родителите пратениците на СДСМ забележаа членови на подмладокот на политичката партија Левица, доколку се приклучиле со цел да извлечат политичка и партиска корист најостро ги осудуваме“, велат од партијата.
Македонија
ССНМ со крводарителска акција по повод 3 Мај – Светскиот ден за слобода на медиумите

Солидарноста и здружувањето се основа на борбата за слобода на медиумите и за професионално новинарство како чувар на јавниот интерес е пораката која Самостојниот синдикат на новинари и медиумски работници ја испрати денеска од крводарителската акција со која го одбележа 3 Мај – Светскиот ден на слободата на медиумите.
Со поддршка и во соработка со Здружението на новинари на Македонија и Црвен Крст на Град Скопје денеска (30.04.2025) поголем број на новинари и медиумски работници, но и граѓани донираа крв на повеќе локации и тоа во просториите на Дневен центар за дарување крв на Црвен крст на град Скопје (ДХО Даре Џамбаз), како и во Клиничките центри во Штип и Битола.
ССНМ трета година по ред го одбележува Светскиот ден на слободата на медиумите со крводарителска акција со што се приклучува на глобалното одбележување организирано од УНЕСКО, како и на Меѓународната федерација на новинари.
УНЕСКО го одбележува овој ден под слоганот „Известувањето во новиот храбар Свет – Влијанието на вештачката интелигенција врз слободата на медиумите“ со тоа укажувајќи на низата предизвици со кои се соочуваат медиумите и новинарите како резултат на брзиот технолошки напредок кој има сериозно влијание како врз известувањето, така и врз развојот на демократските процеси.
Претседателот на ССНМ, Павле Беловски рече дека новинарите во Македонија работат во тешки услови, под сериозни притисоци, закани и напади, како и со ниски примања и сериозни предизвици поврзани со социо-економската состојба.
„Само солидарни, општествено свесни новинари и медиумски работници може да бидат чувари на јавниот интерес и професионално да ја известуваат јавноста што е основ за развој на едно демократско општество. Остануваме на констатацијата дека во овој нов свет само професионално и етичко новинарство може и е најдобрата одбрана против дезинформациите и лажните вести. Бидејќи утре е 1 Мај, денеска нема да зборувам многу за состојбата на новинарите и медиумските работници, но денес во Македонија иако навидум постои слобода на изразување таа е под сериозни суптилни закани кои произлегуваат од притисоци од центри на моќ, лоша финансиска состојба во која се наоѓаат медиумите, развој на медиумски пустини во голем дел од територијата на државата, закани за новинарите и медиумските работници, особено во онлајн просторот“, рече Беловски.
Тој додаде дека со оваа акција сакаме да покажеме дека „новинарите и медиумските работници се еден важен дел од ова општество, дека се солидарни и дека го чувствуваат гласот на обезмоќените, на граѓаните“.
„Сакаме исто така овогодинешната акција да ја посветам на солидарноста, на здружувањето и емпатијата и со неа да искажеме почит кон жртвите во трагедијата која минатиот месец се случи во Кочани“, рече Беловски.
Претседателот на ЗНМ, Младен Чадиковски исто така се осврна на условите во кои работат новинарите и додаде:
„Новинарството е професија што има една посебна мисија, да го штити јавниот интерес, и да биде совеста и гласот на заедницата. Денеска, со оваа крводарителска акција, испраќаме силна порака – дека сме тука едни за други“, рече Чадиковски.
Александра Валкановска, од Црвен Крст на Град Скопје се заблагодари за хуманата акција означувајќи ја работата на новинарите и медиумските работници како важен елемент во општеството.
„Убав е начинот со кој што го одбележувате денот. Навистина радува што ја препознавте хуманоста, солидарноста, поддршката на другите преку чинот на дарување крв на денот на кој е ваш, на новинарите, слободата на медиумите и сите вие членови на синдикатот на медиумски работници“, рече Валкановска.