Македонија
За 40% поголема реализација во расчистување на делата од организиран криминал во Куманово, вели Спасовски

Министерот за внатрешни работи Оливер Спасовски заедно со дел од раководството на Министерството за внатрешни работи и Бирото за јавна безбедност, во Куманово остварија работна средба со раководствата на Секторот за внатрешни работи Куманово, Секторот за внатрешни работи Тетово и на Регионалниот центар за гранични работи Север за да се запознаат со резултатите од постапувањето на полициските службеници по поставените стратешки приоритети и цели, со цел зголемување на безбедноста во заедницата.
„Радува податокот што на подрачјето на Секторот за внатрешни работи Куманово во изминатите 10 месеци имаме намалување на бројот на кривични дела за 22 проценти, споредено со истиот период лани, а паралелно со ова намален е и бројот на пријави во областа на јавниот ред и мир за 12 проценти. Кај класичниот криминалитет се бележи намалување на бројот на кривични дела за 17%, а намалување од 58% е евидентирано кај економскиот криминалитет. Во областа организираниот криминал имаме за 40% поголема реализација во расчистувањето на овие кривични дела”, истакна министерот Спасовски во изјава за медиумите по остварената средба. Притоа, тој сподели информации за резултатите во делот на недозволена трговија со дрога.
„Според споделените податоци на средбата, СВР Куманово интензивно работеше и во борбата за недозволена трговија со дрога, за што говорат 52 претреси во домови и други простории, поднесени 44 кривични пријави против 47 сторители и запленети разни видови дрога: марихуана, хероин, кокаин, хашиш, амфетамин, МДМА, семки од растението канабис сатива. Посебно добри резултати се постигнаа со реализацијата на активностите одоперативниот план ‘Безбедно лето 2023’”, рече министерот Спасовски.
Во областа на превенцијата, Спасовски истакна дека СВР Куманово има реализирано 1.505 превентивни активности на теми: „Полиција и граѓаните“, „Безбедни училишта“ „Кажи НЕ на дрогата, ДА на животот“, „Безбедно во сообраќајот“ итн.
Спасовски предочи дека и на ниво на СВР Тетово е постигната солидна ефикасност на полицијата, особено во делот на недозволена трговија со дрога.
„И на ниво на СВР Тетово во овој период постигната е солидна севкупна eфикасност во откривачката функција на извршените кривични дела од 76% и намалување на криминалитетот, согласно трендот на континуирано генерално намалување во државата. Намалување има кај пријавите во областа на јавниот ред и мир за 6%, а ефикасност од 28% е евидентирана кај кривичните дела со непознат сторител. Во областа на недозволената трговија со дрога во овие 11 месеци откриени и пријавени се вкупно 122 кривични дела, што претставува зголемување на откривачката функција за 53%. Како резултат на ова, СВР Тетово може да се пофали и со значителен пораст на заплената на марихуана во износ од 33,5 кг, но и хероин, кокаин, амфетамин, хашиш, а покрај оваа заплена, овој месец, поточно на 03.12.2023 на подрачјето на СВР Тетово во заедничка акција се пронајдени и запленети дополнителни 30,7 кг марихуана, додека пет лица, од кои едното државјанин од Р.Албанија се приведени”, рече министерот Спасовски, изразувајќи очекување дека и во наредниот период овие организациски единици ќе продолжат со несмалено темпо во реализацијата на утврдените приоритети во насока на намалување на криминалитетот во сите негови форми и области, а посебно да ги зајакнат контролите и активностите во претпразничниот период, со цел одржување на нивото на безбедност и поволен јавен ред и мир во интерес на граѓаните.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Мицкоски: СДСМ настапува со слоганот „се бориме за нашиот дом“, а заборавија дека до пред година дена управуваа со домот кому му ги уништија темелите

Претседателот на ВМРО-ДПМНЕ, Христијан Мицкоски на митингот во Битола во рамки на кампањата за локалните избори на 19 октомври која е под слоганот Вистинскиот избор! Твојот човек! Твоето место! Твојата иднина! се осврна на слоганот на опозициската СДСМ.
Мицкоски посочи дека е фино што на СДСМ им текна да излезат со таков слоган „се бориме за нашиот дом“, но заборавиле дека до пред година и некој месец тие управуваа со домот, односно Македонија и државата ја оставија не со нарушени, туку со уништени темели, вработени без исплатени плати, земјоделци без исплатени субвенции, пола милион граѓани со по 150 денари на ден, двоцифрена инфлација.
Претседателот истакна дека, од моментот на преземањето на одговорноста да ја води Владата, секој ден во владата доаѓаше по некој кој сведочеше за аванси, провизии кои му ги барале во време на власт на СДСМ, за да му завршат работа.
„СДСМ на овие избори настапуваат со слоганот „се бориме за нашиот дом“. И сè е тоа фино, ама забораваат дека пред година и три месеци тие управуваа со домот. И она што го затекнавме не беа нарушени туку уништени темели. Кога ќе се сетам дека првите одлуки кои ги донесов како премиер беа да враќаме плати кои тие не ги исплатиле и дека делевме субвенции кои тие со години не ги исплаќаа. Секој ден во владата ми доаѓаше по некој кој сведочеше за аванси, провизии кои му ги барале за да му завршат работа. Немаше темел кој не беше руиниран од домот кој тие ни го водеа. Се сеќавате дека 500 илјади наши сограѓани, поточно секој трет човек во државата живееше со 150 денари на ден. Дека имаше двоцифрена инфлација, дека го руинираа животниот стандард на чие кревање напорно и постепено работиме“, рече Мицкоски.
Од друга страна, додаде Мицкоски, ДУИ беа господарите кои одлучуваа за целата економија, за тендерите, купуваа трговски центри, бензински пумпи и што уште не.
„Се сеќавате ли на Артановци кога во државните канцеларии, онака, лаконски и мирно си играа фудбалче и даваа кошеви, додека народот страдаше за корка леб? Ете, така тие се грижеа за домот. Сега нивната борба е за враќање на ова време кое народот веќе еднаш го порази. Тоа време на народот не му носи ништо добро“, заклучи Мицкоски.
Македонија
(Видео) Лукровски: Реконструкција на фасади, модернизација на лифтови и поставување шифрарници во сите станбени згради во Карпош

Карпош ќе биде пример како се градат услови за удобно и пристојно живеење, ветува кандидатот за градоначалник на Карпош од ВМРО-ДПМНЕ, Сотир Лукровски.
„Денес го претставуваме еден од најзначајните проекти во интерес на секојдневниот живот на граѓаните на Карпош. Програмата за реконструкција на фасади и модернизација на лифтови и поставување шифрарници во сите станбени згради на територијата на нашата општина. Знаеме дека голем број згради особено постарите со години се соочуваат со исти проблеми: дотраени фасади, нефункционални лифтови и недоволна заштита на влезовите. Овие состојби не се само естетски недостаток, тие се прашање на безбедност на достоинство и на еднаква пристапност на сите жители. Постарите лица, лицата со намалена подвижност, мајките со количките сите тие секојдневно зависат од исправноста на лифтовите. Со овој проект воведуваме и субвенции за целосна реконструкција на фасадите со што ќе постигнеме поголема енергетска ефикасност, пониски сметки за греење и ладење и поубава урбана слика за Карпош“, рече Лукровски.
Истовремено, додаде тој, ќе обезбедиме замена на сите клучни безбедносни компоненти на постоечките лифтови, од сајли сопирачки до ултразвучни механизми и системи за итни случаеви.
„Работите ќе бидат изведувани по современи стандарди и со задолжителни проверки за лифтовите, да бидат сигурни, доверливи и трајни. Дополнително во сите влезови ќе бидат поставени шифрарници за поголема контрола и безбедност на станарите, за спречување и злоупотреба од трети лица“, истакна Лукровски.
Според него, оваа иницијатива не е само техничка интервенција, ова е инвестиција во едно човечко достоинство, во комфор и во секојдневна сигурност на жителите на Карпош.
„Со овој фонд нашата општина ќе покаже дека знае да се грижи, дека умее да реагира и дека има визија, да создаде современа уредна и безбедна заедница за сите жители“, заклучи Лукровски.
Македонија
Османи: Академија за занаети и Клуб на жените за економска независност и достоинство на жените во Чаир

Кандидатот за градоначалник на Општина Чаир, Бујар Османи, денес ја претстави својата визија за економска независност и еднаквост на жените, мерки произлезени од теренските средби со граѓанките на Чаир.
Според Османи, оваа цел ќе се реализира преку две насоки. Преку отворање на патиштата во институциите и преку создавање на Академија за жени во Чаир, која ќе нуди практични обуки и сертифицирани програми за стекнување занаетчиски и претприемачки вештини.
„Ова веќе го подготвивме како проект што ќе се отвори од општината, и врз основа на законот, ќе се ангажираат обучувачи и во сите можни занаети жените ќе можат да стекнат нови способности и вештини, за оние кои немаат доволни квалификации по неколку месеци да добијат сертификат, диплома со која потоа ќе можат да ги започнат своите мали бизниси, микробизниси во секоја област“, истакна Османи.
Османи најави дека општината ќе обезбеди субвенции и финансиска поддршка за жените кои ќе отворат сопствен бизнис или ќе се вклучат во претприемништво.
„За прашањето на претприемништвото, го создадовме брендот во Старата чаршија, на претприемачките од Старата чаршија, изработен од жените на Чаир, за да ги ангажираме сите тие, особено социјалните категории, кои немаат еднакви можности, да бидат дел и да придонесат кон општеството, но и тие да бидат кориснички на овој придонес“, изјави Османи.
Во рамки на планот, Османи најави и основање на „Клуб на жените на Чаир“, во центарот на општината, кој ќе биде простор за вмрежување, менторство и поддршка.
„Таму жените ќе имаат пристап до финансиско, правно и здравствено образование, ќе се охрабруваат една со друга и ќе ги започнуваат промените што за нив се важни“, рече Османи.
Османи се осврна и на темата на безбедноста и достоинството на жените во јавниот простор.
„Ниту една мајка не смее да го испраќа детето на училиште со страв дали ќе се врати безбедно. Ќе ги обновиме училиштата, ќе ги осветлиме улиците и ќе создадеме безбедни патеки за пешаци, за секоја жена да може слободно да се движи и во вечерните часови“, изјави Османи.
Во делот на социјалните политики, Османи најави формирање на Фондацијата „Раката на Чаир“, преку која ќе се поддржуваат самохраните мајки, жените од ранливи категории, како и стипендии за девојки во STEM области.
„Ќе создадеме фонд што ќе им помогне на самохраните мајки не само за опстанок, туку за развој, школување и претприемништво. Сакам жените од Чаир да можат еден ден да кажат: ‘Јас започнав од Чаир, но светот ми ги отвори вратите“, истакна Османи. Сите овие мерки, додаде Османи, ќе важат за сите жени: Албанки, Турчинки, Бошњачки, Македонки.
На крај, Османи најави јавен систем на отчетност и транспарентност за сите програми и проекти посветени на жените, како и подготовка на првиот Акционен план за жените на Чаир, кој ќе биде изработен заедно со мајки, наставнички и занаетчики.
„Сите овие проекти нема да бидат само ветувања. Следната недела го почнуваме првиот акционен план – документ што ќе произлезе од самите жени и ќе биде темел на сите идни политики на општината“, рече Османи.
Тој се обврза дека секоја жена во општина Чаир ќе има можност, решение и избор да има сопствени финансиски приходи, да ја создаде својата финансиска независност и да не зависи од никого.