Македонија
Зголемeн бројот на нови случаи, а намален на починати за една недела

Според неделниот извештај на Институтот за јавно здравје во изминатата недела, тестирани се вкупно 13.742 примероци на коронавирус, со зголемување од 24,5 проценти во однос на eдна недела порано.
Регистрирани сe 2.036 нови позитивни случаи од 33 града во државата.
Најголем дел од регистрираните случаи е од Скопје, а највисока неделна инциденца од 611,4/100.000 е регистрирана во Демир Капија.
Процентот на позитивност во споменатиот период се движи од 9 до 18 проценти или во просек 14 отсто, идентично како минатата недела.
Регистрирани се заболени лица во сите возрасни групи. Најзастапена е возрасната група на лица на возраст над 60 години. Голем број заболени се регистрира и кај лицата во возрасните групи од 40 до 49 (18,1 %), 50-59 (17,9 %), 30-39 (18,4 %) и 20-29 (12,3 %). Најмал број е регистриран кај децата од 0 до 9 години (2,0 %) и 10-19 години (4,8 %).
По добиени 2 негативни теста за присуство на SARS-CoV-2 или со употреба на новиот алгоритам, како оздравени се водат 2.977 лица што биле хоспитализирани или на домашно лекување, 41,4 % помалку во споредба со минатата недела.
Пријавени се 64 смртни случаи од 18 града, со намалување од 7,2 отсто во однос на минатата недела. Во однос на возраста, 55 лицa биле над 60 години, 6 лица на возраст од 50 до 59 години и 3 лица на возраст од 40 до 49 години.
Детаљниот извештај на Институтот за јавно здравје за состојбата со Ковид-19 за периодот од 25 до 31 јануари 2021 година, како и кумулативната состојба со Ковид-19 во Република Северна Македонија, се објавува на веб-страницата на Институтот за јавно здравје: http://iph.mk/.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Орце Ѓорѓиевски ги лаже скопјани со EXIT

Орце Ѓорѓиевски уште еднаш покажува дека за него нема граница кога станува збор предизборната манипулација. Откако вети воз на кејот на Вардар и невозможен парк во Вардариште, сега смилисл нова манипулација дека фестивалот „EXIT“ кој најави дека нема веќе да се одржува во Србија се сели во Скопје, велат од СДСМ.
Од партијата додаваат дека кандидатот на ВМРО-ДПМНЕ за градоначалник на Скопје се обидува да ги излаже скопјани дека Скопје од следната година ќе стане нова дестинација на глобално реномираниот фестивал „EXIT“ – но под услов само ако тој победи на изборите.
„Секоја сериозна личност што го прочитала официјалното соопштение на организаторите на „EXIT“ може лесно да утврди: не постои никаква потврда за Скопје како фестивалска локација, ниту во 2025, ниту во 2026 година. Единствено што е објавено од страна на „EXIT“ е план за глобална турнеја со повеќе настани низ светот. Ѓорѓиевски, во обид да ги освои гласовите со лажни ветувања, свесно извртува дека од Србија се сели во Скопје. Фестивалот „EXIT“ и сега има свои спин-оф изданија, вклучително и во Струмица изминативе три години, тоа не значи дека фестивалот се преселил во Струмица. СДСМ го повикува Ѓорѓиевски веднаш да престане со манипулации и лажни ветувања. Градот Скопје заслужува вистински културни политики, а не евтини кампањски трикови за дневна употреба“, велат од СДСМ.
Македонија
Муцунски во дводневна посета на Стразбур

Министерот за надворешни работи и надворешна трговија, Тимчо Муцунски, денеска и утре престојува во дводневна работна посета на Стразбур, Франција.
Во рамки на посетата, министерот Муцунски ќе присуствува и ќе се обрати на свечен настан организиран по повод Денот на независноста – 8 Септември.
Покрај тоа, предвидено е да оствари работни средби со генералниот секретар на Парламентарното собрание на Советот на Европа, Деспина Хаџивасилиу, со вицегувернерот на Банката за развој при Советот на Европа, Томаш Бочек, со генералниот директор за човекови права и владеење на правото во Советот на Европа, Џанлука Еспозито, како и со генералниот секретар на Советот на Европа, Ален Берсе.
Македонија
Вработените во културата денес се сардисани од сите страни, реагира Синдикатот

Во месец август 2025 година вработените во културата го добија вториот удар – овојпат преку највисоките државни инстанци. Во својата кратка, но бурна историја, Колективниот договор за култура по втор пат се најде пред Уставниот суд, реагираат од Синдикатот на културата по преставката поднесена до Уставен суд со која како што велат се прави обид за скратување на стекнатите права на вработените во кутурата.
„Тешко е да поверувате дека околу нас постојат луѓе кои, немоќни да се изборат за сопствена подобра реалност, единствениот излез го гледаат во обидот да ја рушат реалноста и иднината на другите. Нивниот избор да тапкаат во место и да чекаат „некој друг“ да им го донесе подоброто утре, според нив, е модел кој сите треба да го следиме.
Суштината на претставката е следна: зошто вработените во културата би имале подобри права од останатите? Подносителот смета дека тоа е противуставно – дека Колективниот договор за култура ги става во понеповолна положба сите кои немаат такви права. Просечноста, па дури и потпросечноста, е парадигмата кон која, според него, сите треба да се стремиме. „Противуставно“ е, според овој став, тоа што 3.500 вработени во културата конечно почнаа да излегуваат од живата кал, добија вреднуван труд, донекаде и услови за работа, и зачеток на можности за напредок и доусовршување – темел врз кој цврсто ја градат својата нација.
Зад оваа мизерна претставка, насочена против илјадници културни работници, основано се сомневаме дека стојат разно-разни чиновничиња, службеничиња, советничиња, раководителчиња, државни секретарчиња, министерчиња и по некој “бивш синдикалец” во друго руво, кои преку погазување на другите се надеваат на личен напредок во кариерата. А има и такви за кои тоа не е прашање на кариера, туку на лична фрустрација и омраза кон туѓата стабилност. Секоја сличност со старата македонска поговорка – не е случајна.
Не се случајни ниту обидите за поткопување на правата стекнати со Општиот колективен договор и кратењето на 3% од оние 10% кои ги доби целиот јавен сектор. Вработените во културата денес се сардисани од сите страни“.
Овие денови, нагласуваат од синдикатот, огромен број луѓе работеле интензивно на одговорот до Уставниот суд.
„СКРМ го поднесе одговорот од името на сите вработени во културата – едни директно засегнати, други згрозени од мотивите на неколку поединци кои се обидуваат да срушат нешто за кое културните работници се бореа со години. Во таа борба вложија труд адвокати, членството, претседателите, претставниците – сите трпеливо и макотрпно, исто како и досега, фанатично бранeјќи ги правата од секој напад на недобронамерниците.
Знаеме дека премиерот Мицкоски е свесен дека „културата е темелот врз кој се гради една нација“ – негови лични зборови. Но исто така знаеме дека кога ќе станете функционер, особено премиер, меѓу вас и народот се спушта стаклено ѕвоно, зад кое информациите стигнуваат искривени – пренесени токму од разно-разни чиновничиња, службеничиња, советничиња, раководителчиња, државни секретарчиња и министерчиња. Поради нив, кои случајно дошле до своите „пет минути“ и денес креираат највисоки политики во државата, културните работници не успеаја да дојдат до средба со премиерот, за да ја образложат својата позиција: одбрана на Колективниот договор и на стабилноста на културните работници – темелот врз кој се гради културата“.
Затоа, како што потенцираат во реакцијата, ги повикуваат судиите на Уставниот суд да застанат во одбрана на Уставот и законите на Република Македонија – исто како што веќе еднаш постапија и сосема оправдано не поведоа иницијатива против Колективниот договор за култура, додаваат од таму.
„Вработените во културата не се со ништо поинакви од другите граѓани на нашата земја. Сите сме еднакви – и пред законите, и пред Уставот. На вас ви посакуваме успех во вашата борба за права, а ние продолжуваме да ги браниме нашите, со сите средства што ни стојат на располагање“.