Македонија
Здравството се приватизира – Детската кардиохирургија се сели во „Филип Втори“

Иако пред еден месец министерот за здравство, Венко Филипче, тврдеше дека ќе има јавни дебати и детаљни анализи за тоа дали детската кардиохирургија треба да се „приватизира“, односно да се пресели во болницата „Филип Втори“ на Жан Митрев, денеска тој и официјално соопшти дека одлуката е донесена. За овие операции на тешко болните бебиња со срцеви проблеми, кои се околу 70 годишно, Фондот за здравство ќе издвојува околу милион евра.
Жан Митрев, сопственикот на „Филип Втори“ пред само неколку месеци изјавуваше дека од Детската кардиохирургија ‘живо дете не излегло’, а детскиот кардиохирург Владимир Чадиковски, кој досега работеше на Клиниката за детска хирургија, го нарекуваше ‘манипулатор кој го загрозува здравјето на децата’, сега треба да работат под ист покрив.
Чадиковски и неговиот тим од државна капа преминуваат да работат токму во приватната клиника, од каде што и ќе земаат плата.

Интервју на Чадиковски за „Плусинфо“ во април годинава за обвинувањата на Жан Митрев
Со овој чекор на министерот за здравство, кој без распишување тендер и без јавна расправа реши да ја замагли границата меѓу приватното и јавното здравство, неодговорени останаа многу прашања, како, на пример, на кој начин е избрана токму болницата на Жан Митрев, дали со преминувањето на кадарот од јавното во приватното здравство тој го признава поразот дека државното здравство на чие чело е тој е пред колапс и дали во надредена положба става една категорија болни што ќе се лекуваат во приватна клиника пред друга категорија, кои мора да одат во јавното здравство.
Она што засега се знае е дека од наредниот месец Клиниката за детска кардиохирургија ќе работи во „Филип Втори“, кадарот на чело со Чадиковски ќе биде вработен во приватната клиника, а парите за операции ќе ги исплаќа Фондот за здравство.
Ова јавно-приватно партнерство Филипче го правда со фактот „додека да се направи новиот клинички центар, не вреди да се инвестира во постојниот бидејќи за неколку години тоа ќе треба да се сруши“. Инаку, за новиот клинички центар сè уште нема ни локација, па оттаму неизбежен е заклучокот дека за какви било поголеми реформи во здравството ќе мора да поминат години.
„Иако во изминатите години во јавното здравство е направена експертиза за детски кардиохирушки операции, сепак инфраструктурата е лоша. Проценивме дека залудно е да се инвестира во инфраструктурен капацитет на Клиниката за кардиологија бидејќи кога ќе се изгради новиот клинички центар, тоа ќе се сруши. Со овој проект ги спојуваме експертизата од јавното и приватно здравство и создаваме подобри инфраструктурни услови за лекување на децата. Очекуваме на овој начин да се создадат услови лекарите да не бегаат во странство, туку да останат да работат во земјата“, рече Филипче.

Венко Филипче и Ден Дончев убедуваат дека јавно-приватното партнерство со „Филип Втори“ е за доброто на пациентите, а ќе нема поголеми финансиски импликации
Директорот на Фондот за здравство, Ден Дончев, објасни дека сега со милион евра годишно, кардиохируршки операции на децата, наместо од Клиниката за детска хирургија, ќе се купуваат од приватната болница. Покрај овие милион евра, сега ФЗО троши и дополнителни од 300.000 до 400.000 евра за кардиохируршки операции на децата во странство.
„Очекуваме да се напават заштеди со тоа што нема да има потреба децата да се праќаат во странство“, рече Дончев.
Уште едно неразјаснето прашање во овој договор меѓу јавното здравство и приватната болница е и како ќе тече процедурата за праќање во странство на децата што сепак ќе имаат таква потреба бидејќи веќе нема да постои тим на лекари во јавното здравство што ќе треба да потпише конзилијарно мислење со оглед на тоа што овој тим сега поминува во приватното здравство.
Од ВМРО-ДПМНЕ преку соопштение реагираат дека со овој чекор на виделина излегува неспособноста на министерот за здравство Венко Филипче.
„Здравствениот систем од ден на ден сè повеќе се распаѓа. Неспособноста на министерот излегува на виделина. Филипче е канцерот на македонскиот здравствен систем. Тој наместо да инвестира во јавното здравство за да се задржат лекарите во Македонија, решава да им ги полни џебовите на одредени поединци. Самиот министер и СДСМ со оваа одлука ги отворија вратите на нашите млади лекари на големо да си заминуваат од земјата, се наведува во партиското соопштение“.
Во меѓувреме Министерството за здравство со физибилити-студијата ја испитува можноста и за јавно-приватно партнерство за брзата помош.
„Физибилити-студијата треба да покаже дали воопшто е можен овој модел на јавно-приватно партнерство, кој функционира и во други земји, да функционира и кај нас. Бараме начин како да ја подобриме ситуацијата, па затоа се размислува на примена на моделот на јавно-приватно партнерство за брзата помош и домашната посета“, изјавија од Министерството пред еден месец.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Учебници сè уште нема, потребно е итно решение

СДСМ денеска преку портпаролката Богданка Кузеска потсети дека е поминат еден месец од почетокот на учебната година, а голем дел од учениците сè уште немаат учебници.
Од партијата посочуваат дека дел од учениците се приморани да учат без учебници, а дел располагаат со стари и оштетени изданија. Родителите не треба да печатат материјали дома, ниту наставниците да импровизираат, велат од СДСМ.
Според нив, обврска на Министерството за образование и наука е да обезбеди учебници навремено за сите ученици. Од таму бараат итно да се најде решение и учебниците да бидат доставени во најкраток рок.
Македонија
Субвенции за филтри на оџаците за домаќинствата што се греат на дрва, Мицкоски најави вонредна мерка за почист воздух

Во пресрет на новата грејна сезона Владата размислува за субвенции за филтри на оџаците за домаќинствата што се греат на дрва и фосилни горива. Субвенцијата би била на принципот прв дојден прв услужен исто како и субвенциите за клима-уреди и топлински пумпи. За субвенциите за филтри на оџаците, премиерот Христијан Мицкоски најави дека на негова иницијатива ќе се разговара на денешната седница на Владата.
„Бидејќи гасификацијата е процес што ќе трае подолго, нема да имаме брзи резултати. Можеби треба да размислиме по истиот принцип како што субвенционираме за клима-уреди, за топлински пумпи и субвенционирање сметки за струја на социјално ранливи категории на приближно пет-десет илјади домаќинства да им обезбедиме филтри на оџаците. Тоа е за оние домаќинства што користат фосилни горива, односно дрва. Изминативе неколку дена работев лично на оваа проблематика и гледам дека голем дел од градовите на тој начин го намалиле загадувањето“, рече премиерот Христијан Мицкоски по пуштањето во употреба на затворениот базен во Штип.
Покрај субвенциите за домаќинствата, Владата ќе ја разгледа можноста да се инсталираат филтри на оџаците на државните објекти што користат фосилни горива, чија бројка е речиси 500.
Премиерот Мицкоски вели дека оваа мерка ја најавува однапред имајќи предвид дека кога ќе почне грејната сезона, ќе има активисти што ќе се борат за воздух, иако, како што нагласи, ги немаше никаде изминативе седум години. Владата ќе бара законски начин за доделување на субвенциите во пресрет на грејната сезона, која се поклопува со предизборниот период.
„Треба да видиме со законодавството дали е тоа дозволено имајќи предвид дека сме во избори и изборите се веќе распишани, а ова би било вонредна мерка“, рече премиерот Мицкоски.
Според последниот попис на населението, во земјата има 349.402 домаќинства што се греат на дрва и други фосилни горива.
Македонија
Мицкоски за пресудата за случајот „Онкологија“: Со вакви одлуки судиите и обвинителите не си ги заслужуваат платите, а бараат уште поголеми

Премиерот, Христијан Мицкоски, денеска одговарајќи на новинарско прашање во однос на условната казна за докторката која призна злоупотреба на Клиниката за онкологија, изјави дека со такви одлуки, судиите и обвинителите не си ги заслужуваат платите, а бараат уште поголеми.
„Па знаете, моите ставови за Обвинителството и Судството се многу пати кажани, многу пати разговарани и секогаш кога ќе зборуваат зошто доцниме во процесот на испорака на законите, коишто значат реформи во Судството и Обвинителството, во суштина сакам јавноста да знае дека станува збор за 6 закони каде што основната суштина е зголемување на буџетот од којшто директно ќе имплицира зголемување на платите на обвинителите и судиите коишто имаат рејтинг од 2%, а се бара зголемување на платите за судиите, односно буџетот нивен којшто би бил сега 0,8% од БДП, а за обвинителите 0,5% од БДП и секогаш чувствувам некаква мачнина, бидејќи тие и овие сега плати што ги зимаат не ги заслужуваат, имајќи предвид вакви судски одлуки за која што вие сега зборувате“, рече Мицкоски.
Така што, додаде тој, сакам граѓаните да знаат дека, сите оние експерти, така наречени, кога излегуваат во јавност и кога ја критикуваат Владата за застој во реформите во Обвинителството и Судството, ова е суштинската реформа.
„Како да се зголеми буџетот на судовите до 0,8% од БДП, а на обвинителите од 0,5% од БДП, што е да речеме 2 до 3 пати повеќе од некои земји членки на Европската Унија. Не е проблем ние ќе ги зголемиме и три пати, ама да ги заслужат. Јас имам дилема, дали и овие плати тие ги заслужуваат, коишто сега ги земаат. Така што еве, тоа е на кратко мојот коментар“, рече Мицкоски.
Основниот кривичен суд Скопје вчера изрече двегодишна условна казна без забрана за вршење на дејност за второобвинетата во случајот Онкологија, онкологот Мери Пешевска, доколку во рок од пет години таа не стори ново дело. Пред две судски рочишта Пешевска го призна делото кое што ѝ се става на товар за несовесно лекување болни, по што кривичната постапка против неа беше раздвоена.