Македонија
Здравство ги скрати процедурите за вработување: ако има буџет нема потреба за согласност од Финансии

Министерот за здравство Фатмир Меџити успеал да издејствува скратување на процедурите за вработувањата во здравствените установи. Тој денес извести дека нема да имаат обврска да бараат согласност од Министерството за финансии за секое вработување за да можат побрзо да ги пополнуваат местата испразнети со пензионирања или на оние кои си заминуваат од клиниките.
„Ќе споделам со вас, тоа што јас го побарав од министерот за финансии, што не ми беше јасно од првиот ден, зошто секогаш треба согласност да даде Министерството за финансии за вработувања во Здравство. Некој ќе се пензионира, друг ќе ја напушти државата или ќе отиде во друга клиника, зошто тие места по автоматизам да не можат да се пополнуваат. Ние одлучивме со министерот финансии, имаше разбирање и на негова иницијатива Министерството за финансии ќе се изземе и нема да одлучува повеќе за вакви случаи. Самите институции ќе имаат законска обврска за тоа, а Министерството за здравство ќе потврдува без да се бара согласност од Министерството за финансии. Ако има резервиран буџет во самите институции и клиники, тогаш нема потреба да се бара согласност од Финансии. Ги скратуваме овие процедурални, административни маки кои ни одземаат многу време“, рече министерот Меџити.
Тој потсети дека уште првиот ден на функцијата министер побарал тематска седница на Влада за нови вработувања во здравството. Успеал да посети околу 70 отсто од поголемите здравствени установи во земјата и утврдил дека секаде имаат иста мака со недостаток од кадар и нови вработувања.
„Истите маки се секаде – вработувањата, договорите на дело на дело по пет години кои знаете дека се незаконски над шест месеци. Имаме антикорупциска комисија, тие укажуваат дека е незаконски со договор на дело да се работи повеќе од шест месеци исто и за поставените директори и менаџери, но тоа така си функционирало. Јас не разбирам многу право, но си барам во здравството, тоа што може, да биде порелаксирано и да ги поедноставиме процедурите“, рече министерот Меџити.
За повторното централизирање на клиниките во клиничкиот центар „Мајка Тереза“, Меџити рече дека информацијата ја изготвил и ја доставил во Влада и со тоа го завршил неговиот дел од работата, а сега вели дека врши постојан притисок да се реализира. Очекува дека од 1 јануари 2024 година ќе се укинат економските директори на клиниките и клиничкиот центар ќе има еден директор.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јанев на заокружување на обуката „Истрага на местото на настанот“, насочена кон унапредување на истражните капацитети на полициските сили

Директорот на Бирото за јавна безбедност Александар Јанев присуствуваше на свеченоста за доделување на дипломите, што се одржа во Центарот за обука на полицијата во Идризово, заедно со помошник министерот за внатрешни работи и началник на Центарот за обука, Влатко Митковски, како и со амбасадорот на Италија во нашата земја, Н.Е. Паоло Палминтери.
Обуката беше реализирана од Вишиот институт за истражни техники на карабинерите на Италија, со организациска поддршка од Италијанската амбасада во Скопје.
Учесниците на курсот имаа можност да стекнат напредни знаења и практични вештини за истражување на место на настан, притоа следејќи современи европски и меѓународни стандарди.
“Посебна благодарност упатувам до италијанските експерти за нивниот професионален ангажман и пренесеното знаење и сакам да истакнам дека како институција, особено ја цениме оваа соработка што претставува значаен чекор кон унапредување на капацитетите на нашата полиција и поддршка на владеењето на правото”, истакна директорот Јанев, додавајќи дека ова е уште еден показател за успешната и стратешки ориентирана билатерална соработка со Италија во областа на безбедноста и претставува дел од заедничките напори за градење побезбедно и посилно општество.
Македонија
Николоски учествува на висок министерски форум во Истанбул

Вицепремиерот и министер за транспорт Александар Николоски денеска и утре учествува на Форум за министри за транспорт што се одржува во Истанбул.
Во планираната агенда е предвидено обраќање на вицепремиерот Николоски на панелот насловен ,, Иновативни можности и решенија за финансирање на транспортни коридори” .
На Форумот ,,Глобална Транспортна Поврзаност” предвидено е да се обрати претседателот на Турција, Реџеп Таип Ердоган, министерот за транспорт на Турција, Абдулкадир Уралоглу како и други министри од Европа и светот.
На настанот ќе земат учество и бројни министри како што се министерот за транспорт на Шпанија, на Албанија, на Саудиска Арабија, Сингапур, Црна Гора, Обединетите Арапски Емирати, како и многу други високи претставници од институции од областа на транспортот.
Македонија
Сиљановска-Давкова прими припаднички на Армијата кои успешно завршија обука во САД

Претседателката Гордана Сиљановска-Давкова ги прими капетанката Неда Волчева и поручничката Сара Тасевска кои успешно го завршија седуммесечниот курс „Maneuver Captain’s Career Course“во Џорџија, САД, организиран од американскиот тренинг центар „Fort Moore”.
На средбата на којашто присуствуваа началникот на Генералштабот на Армијата, генерал-мајор Сашко Лафчиски и американската амбасадорка Анџела Агелер, двете припаднички на Армијата ја запознаа претседателката со фазите, содржините и квалитетот на воено-образовната обука и ги споделија нивните натамошни планови, заложби и амбиции за кариерен напредок.
Препознавајќи во нив потенцијал за идни генерали, Сиљановска-Давкова им честиташе на Волчева и Тасевска за успешно завршената обука и изрази уверување дека стекнатите знаења, вештини и експертиза ќе ги применат во интерес на македонската армија.
Според неа, реализацијата на оваа програма претставува влог во македонско-американското партнерство и е посебно значајна за промоција на земјава како лојален и кредибилен сојузник во НАТО.
Признавајќи ги одличните резултати што ги постигнуваат жените, соговорниците се согласија дека нивното партиципирање во меѓународните обуки треба да биде редовна пракса.
Сиљановска-Давкова на средбата ја реафирмираше својата заложба за формирање на Регионален центар за извонредност за жени, мир и безбедност со седиште во Скопје, заради промоција на жените во безбедноста и одбраната во регионот.