Македонија
Здруженијата за заштита на животните алармираат за ново масовно труење кучиња во Битола

Невладините организации алармираат за ново масовно труење на кучиња во Битола. Според нив, во изминатите два дена во 14 населби било фрлено големо количество отров и затруени се голем број кучиња, а едно се бори за живот.
„Членови на здружението за заштита на животните ‘Мали херои’ од Битола и Фондацијата ‘Бибевски’ испративме претставка и кривична пријава со спроведен записник до СВР Битола и Основно јавно обвинителство Битола, во кое бараме во согласност со со Кривичниот законик да се спроведе казна за фатен сторител на дело“, соопштија од здружението.
Според нив, труењето на бездомните животни и опасноста од расфрлање отрови и отровни материи на јавни површини се сериозни проблеми со кои граѓаните многу често се сретнуваат и неопходно е да им се стави крај.
„Апелираме на граѓанска одговорност, совесност и свесност во вакви случаи веднаш да се повика полиција и се пријави делото. Очекуваме темелна истрага од полицијата зашто фрлањето отрови е опасно за сите и прашање на време е кога нечиј живот ќе биде загрозен. Потсетуваме дека отровот има еднаква раздорна моќ за 5 минути да убие и дете. Апелираме дека оној што на ваков начин убива животни, не е стабилна личност и е опасност за секого.
Потсетуваме и дека овие дејства се забранети со закон и претставуваат кривични дела по членовите 218 – загадување на животната средина, 232 – внесување опасни материи во земјата, 233 – мачење животни, 234 – тешки дела против животната средина и можеби најважно 288 – предизвикување општа опасност од Кривичниот законик, за кои може да се добие казна затвор од 6 месеци до 10 години“, се додава во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Инспекторите влегоа во маркети, аптеки, тобако-трафики…, констатирани се неправилности

Пазарниот инспекторат констатира неправилности при контролите во маркетите кај трговците на мало, а може да има и казни со затворање маркети, изјави денеска во Прилеп заменик министерот за економија и труд Марјан Ристески.
„На теренот се 50-тина тимови на Пазарниот инспекторат. Се контролираат маркети, аптеки, тобако-трафики, секаде каде се продава на мало. Констатирани се повеќе неправилности. Има неправилности во однос на означување на намалените производи, при утврдувањето на маржите, на цените, во сметководствената евиденција… Наредната недела ќе има изрекување казни за најнедисциплинираните, а не е исклучено некои маркети да бидат и затворени, што е една од најновите мерки во Законот за трговија“, истакна Ристески.
Идната недела, Инспекторатот ќе ги контролира сите дистрибутери и поголемите увозници во земјава. Комисијата за заштита на конкуренцијата работи на прибирање докази за најавата на таканаречено „картелско здружување“.
„Комисијата за заштита на конкуренцијата стручно си ја извршува работата и доколку утврдат такво здружување, ќе има казни предвидени со Законот за заштита на потрошувачите“, рече Ристески.
Ристески очекува владините мерки да дадат резултати.
„Мерките и одлуките се донесени за да го заштитиме животниот стандард на граѓаните. Со мерките се опфатени 102 групи производи или околу1.200 производи. Трговците мора да се научат да бидат дисциплинирани, да ги почитуваат мерките наменети за граѓаните. Како Министерство за економија и труд и како државна Пазарна инспекција онаму каде ќе откриеме недоследности на одлуките со кои се повредени правата на граѓаните, ќе има ригорозни казни’, нагласи Ристески.
Македонија
Континуирано тече исплатата на парите за МојДДВ, вели Петрова

Исплатата на парите од услугата МојДДВ и за поврат на ДДВ за компаниите тече континуирано, порача денска директорката на Управата а јавни приходи (УЈП) Елена Петрова.
Нагласи дека прво треба да заврши обработката на кварталните даночните пријави кои се поднесени до 25 јануари по што почнува исплатата на средствата од МојДДВ.
-Во самиот процес се случува граѓани да променуваат трансакциски сметки, а УЈП доставува групни налози до Трезорот. Често ни ги враќаат заради угасени сметки во самиот тек на поврат на средствата. Доколку и само еден граѓанин ја угасне сметката се враќаат налози за други 8.000 граѓани и тоа значи дека процесот треба да почне наново. Можеби затоа стигнавме до крајниот рок со реализацијата на услугата. Сепак, во секој случај граѓаните ќе ги добијат своите средства навреме, истакнаа од УЈП на денешната средба со новинарите.
За исплата на средства за МојДДВ, како што посочи, за изминатиот квартал се предвидени 870 милиони денари.
Македонија
Радев телефонски разговараше со Сиљановска-Давкова: Дијалог од особена важност за цврсти билатерални односи

Претседателот на Бугарија, Румен Радев и претседателката на Македонија, Гордана Сиљановска-Давкова вчера имале телефонски разговор. Како што информира Кабинетот на Радев, двајцата соговорници разговарале за важноста од контруктивен дијалог на највисоко ниво меѓу двете земји.
– Овој дијалог е од особена важност и за изградба на цврста основа за развој на билатералните односи и за решавање на регионалните и глобалните предизвици поврзани со обезбедувањето на безбедноста, борбата против тероризмот и справувањето со нелегалната миграција, се наведува во информацијата од Кабинетот на бугарскиот претседател Радев.