Македонија
Здруженија за заштита на животни тврдат дека во штипскиот стационар успиваат здрави животни

Здруженијата за заштита на животни „Про анима“ Берово, „Шепасти ентузијасти“ Скопје и граѓанската иницијатива „Кане корзо надеж“, информираат за ужасни активности на управата на Ветеринарната болница од Штип, на чело со ветеринарот Крсто Митев.
Тие укажуваат за еутанизирани кучиња, меѓу кои и 2 здрави единки, кои, како што велат, денеска се брутално убиени без никакво тестирање и фрлени на депонија.
Од здруженијата велат дека стационарот е во многу лоша состојба, дека нема вода и дека тие за животните носат во шишиња од дома или од чешмата што се наоѓа на 100 метри од стационарот. Активистите го чистеле изметот од кучињата, зашто, како што велат, никој со недели не се појавил таму да ги измие кафезите.
„За секој поминат ден (24 часа) откако ‘функционира’ стационарот, односно за ‘надзор и одржување’, Ветеринарната станица – Штип наплаќа по 1.350 денари + ДДВ. Во ова не влегува трошокот за обезбедување храна и вода или каков било трошок за лекување, кој Ветеринарната станица – Штип го наплаќа посебно. Моментално ова го прават само 2 девојки доброволно, иако Ветеринарната станица – Штип има ангажирано лице кое го плаќа 6.000 денари месечно да го прави сето ова. Кучињата кои се останати горе сè уште се сместени во кафези оградени и покриени со лимови. Стационарот функционира во ваква состојба и покрај добиените насоки од АХВ за негово подобрување. Во меѓувреме штотуку стерилизирано куче почина од топлотен удар. Случајот со Бренда никогаш не се расчисти. Лицето претставник од АХВ е всушност локален комунален инспектор со име Тоше Георгиевски. Во стационарот има кучка со маркица која е бремена. Низ градот има испуштено и други кучиња со маркица кои не се стерилизирани“, велат од здруженијата.
Тие бараат најстрога казна за ветеринарот Крсто Митев, кој, како што велат, не работи според законите и монструозно успива здрави животни без претходен тест.
Исто така, бараат да се поништи одлуката за доделување на тендерот на Ветеринарна станица – Штип и да се распише нов, а воедно и да го направи стационарот како што е предвидено според правилникот за ваков тип објекти.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ослободителна пресуда за струшкиот градоначалник, Мерко законски го набавил луксузното „ауди“

Основниот суд во Струга го ослободи градоначалникот на Струга, Рамиз Мерко, кој беше обвинет за незаконска набавка на луксузното службено возило „ауди“ А6 од 67.000 евра и уште три други автомобили.
Судот не утврдил дека Мерко го прекршил законот при набавката на службените возила.
Мерко беше обвинет за злоупотреба на службента положба, поради набавката на четири моторни возила во вкупна вредност од околу 114.000 евра, во време кога општината имала долгови и блокирана жиро сметка.
Обвинението беше поднесено лани во март, а судскиот процес почна во април.
САД го ставија струшкиот градоначалник на таканаречената црна листа, со што го означија како генерално неподобен за влез во Соединетите Американски Држави поради негова вмешаност во значителна корупција.
Против Мерко има девет обвиненија за несовесно работење, за бесправно градење, како и за фалсификување исправа.
Македонија
Викендов казнети 1.077 возачи, најмногу од нив возеле без возачка дозвола

Во деновите од изминатиот викенд (07./08.06.2025) како резултат на редовните сообраќајни контроли на патиштата низ земјава, од вкупно 1.077 издадени платни налози дури 174 прекршоци се однесуваат на возачи кои што учествувале во сообраќајот без возачка дозвола, 65 возачи возеле под дејство на алкохол и исклучени се од сообраќај, додека пак 172 возачи на мотоцикли се санкционирани за неносење на заштитна кацига.
Инаку, согласно одредбите од Законот за безбедност на сообраќајот на патиштата 156 прекршоци во текот на викендот се однесуваат на непочитување на пропишаната брзина на движење, 149 за недозволено паркирање, додека пак санкционирани се 58 лица кои некористеле сигурносен појас, изречени се 24 мерки за користење мобилен телефон при возење, осум санкции за минување на црвено светло, а изречени се и три прекршоци за возачи на електрични тротинети.
Исто така, 49 возила биле отстранети заради тоа што биле нерегистрирани, а седум возила заради техничка неисправност.
„Сообраќајните контроли продолжуваат и во наредните денови. Апелираме до граѓаните да ги почитуваме сообраќајните правила и прописи за да ја зголемиме безбедноста во сообраќајот и заедно да придонесеме за посигурни патишта“, велат од МВР.
Македонија
(Видео) Експресниот пат не е автопат, кампања на МВР со РСБСП

„Експресен пат” е јавен пат кој е специјално изграден и наменет исклучиво за сообраќај на моторни возила, означен со пропишан сообраќаен знак, со најмалку по една лента за секоја насока и лента за застанување, на кој сообраќајот може да се вклучи, односно исклучи само на одредени и посебно изградени приклучоци и кој е заштитен од пристап надвор од овие површини, велат од МВР кое заедно до РСБСП објавија промотивни видеа.
Експресниот пат има по една сообраќајна лента во секоја насока, кои меѓусебно се разделени со полна или со испрекината линија зависно од конфигурацијата на теренот.
Покрај сообраќајната лента за движење на возилата, на експресниот пат има и лента за застанување на возилата која е наменета исклучиво за запирање на возилата. На експресниот пат не е дозволено движење на пешаци, велосипеди, трактори и други бавни возила.
Најголемата дозволена брзина е ограничена на 110 километри на час, освен доколку не е поинаку определено со сообраќаен знак.
Престигнувањето е дозволено исклучиво кога има добра прегледност и има обележана испрекината линија на коловозот.
Секое движење со возилото во лентата за застанување претставува сообраќаен прекршок и подлежи на глоба согласно Законот. На експресниот пат забрането е полукружно вртење, застанување и паркирање, освен на предвидените места.
Возачите мора да внимаваат, да држат безбедно растојание и да ги почитуваат сите сообраќајни знаци. Експресниот пат нуди брзина – но, само кога се користи правилно и одговорно.
Експресниот пат не е автопат и нема посебна сообраќајна лента за престигнување.
На експресен пат, престигнувањето може да се изврши само кога тоа е дозволено, безбедно – и исклучиво на делови од патот каде е обележано со испрекината линија и доколку не ги попречува возилата кои се движат од спротивната насока.
Доколку се приближува возило кое има намера да престигне друго возило, возачот на возилото кое се престигнува не смее да ја користи лентата за застанување со цел да „направи” простор за да биде престигнато – тоа е лента исклучиво за застанување по потреба, никако за возење.
Престигнување на непрегледни делници, на кривини, со возење по лентата за сопирање или со газење преку полната линија, е строго забрането и претставува сериозен ризик.
Таквите сообраќајни маневри често завршуваат со несреќа која може да предизвика тешки повреди… и загубени животи.
Не брзај – едно незаконско престигнување може да биде твоја последна одлука.
На експресен пат почитувај ги правилата кои спасуваат животи.