Македонија
ЗНМ и ССНМ: Потребно е целосно расветлување на сомнежите за прислушување новинари

Здружението на новинарите на Македонија (ЗНМ) и Самостојниот синдикат на новинарите и медиумските работници (ССНМ) со сериозна загриженост ги следат информациите поврзани со можни случаи на незаконско следење новинари и медиумски работници во периодот 2019 – 2024 година за што јавноста беше информирана неодамна преку брифинг за новинари од страна на Агенцијата за национална безбедност (АНБ).
Дополнително, премиерот, како и директорот на АНБ, вчера јавно упатија повик до Јавното обвинителство да реагира и да го расчисти случајот за овие наводи.
„Сметаме дека секое незаконско следење на комуникации може да претставува сериозна закана за слободата на медиумите и за правото на јавноста да биде информирана. Воедно, потсетуваме дека и новата регулатива на Европскиот парламент, Европскиот акт за слобода на медиумите (EMFA), јасно забранува какво било незаконско следење новинари и предвидува обврска на државите членки и на земјите кандидати да обезбедат ефективна заштита од вакви практики“, велат од ЗНМ и ССНМ.
Според нив, ваквите случаи, доколку се основани, оставаат чувство на несигурност меѓу новинарите и ја нарушуваат довербата во институциите. Од тие причини ги повикваа надлежните органи да постапуваат итно и исклучиво врз основа на закон со цел да овозможат целосна транспарентност и отчетност во интерес на јавноста.
„Очекуваме Обвинителството и судството да постапат одговорно и без одлагање, со цел да ја заштитат слободата на медиумите и да обезбедат правна сигурност за сите новинари и медиумски работници во земјата. Истовремено, бараме од политичките партии и носителите на високи јавни функции да се воздржат од изјави и меѓусебни пресметки во кои користат новинарски имиња бидејќи со тоа може да ја продлабочат поларизацијата во општеството и да поттикнат говор на омраза насочен кон новинарите“, се наведува во соопштението.
Во него потсетуваат дека скандалот со масовното незаконско прислушување од 2015 година, кога беше објавено дека биле нелегално следени комуникациите на илјадници граѓани, меѓу кои и на голем број новинари, сè уште нема добиено соодветна судска разрешница и покрај напорите на еснафските новинарски здруженија.
„Речиси десет години подоцна, некои од постапките се одолжуваат или завршуваат без правосилни пресуди, а новинарите што беа директно погодени сè уште ја чекаат правдата. Ова уште еднаш ја потврдува потребата институциите да дејствуваат итно, независно и без политички влијанија. ЗНМ и ССНМ остануваат подготвени да обезбедат правна помош и поддршка за сите евентуално оштетени новинари или оние чии права биле прекршени. За развојот на овој случај ќе биде информирана и Европската федерација на новинарите (EFJ), каде што двете организации се полноправни членки“, велат од ЗНМ и ССНМ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Јасно и гласно кажав дека не сум се сретнал со Груевски, ВЛЕН манипулира, рече Османи

Бујар Османи, потпретседател на ДУИ и кандидат за градоначалник на Општина Чаир, ги демантираше тврдењата за наводна средба со Никола Груевски за обезбедување пратеници за поддршка на уставни измени.
„Во недостаток на идеи и очекуван пораз на изборите, манипулациите на ВЛЕН продолжуваат во однос за наводна моја средба со Груевски со цел обезбедување на пратеници за подршка на утавни измени. Јасно и гласно кажав дека таква средба немало. Тоа што се служат постојано со лаги и повторување на сите невистини нема да им помогне во кампањата“, рече Османи.
Додаде и дека дговорот на овие оцрнувања ќе стигне на 19 октомоври.
Македонија
Ахмети: Да сакавме да ја поделиме Македонија, тоа ќе го сторевме во 2001 година

Претседателот на ДУИ, Али Ахмети, од партиски собир во Чаир порача дека тврдењата оти Албанците сакаат да ја поделат Македонија се измислени од одредени политичари. Тој нагласи дека ако тоа било вистина, тоа можело да се случи уште во 2001 година со 15.000 вооружени лица.
Ахмети додаде дека ДУИ е за унитарна држава, рамноправна за сите, и дека е потребна правна држава со истраги за приватизацијата и поранешните функционери.
„Но, ние сме за унитарна држава, рамноправна за сите. А не еден да биде аргат, а другиот ага. Ние не сакаме да живееме во сопствената земја како кираџии“, рече Ахмети.
Лидерот на ДУИ посочи дека иднината на земјата е со стабилност, рамноправност и интеграција во Европа, додека актуелната власт, според него, не направила значаен напредок.
На настанот, Ахмети заедно со кандидатите за градоначалници потпиша „акт за Чаир“ како симбол на националното единство од 2001 година, повикувајќи на борба против дискриминацијата и лошото управување пред октомврискиот референдум.
Владејачката ВМРО-ДПМНЕ по обрќањето на Ахмети истакнаа дека ДУИ не само што не може да ја дели државата, туку може и да завршат во затвор за криминал и затоа што ја разјадуваат Македонија
Од ВМРО-ДПМНЕ оценија дека ДУИ се во очај што се враќаат на 2001 година, додавајќи дека за време на 23 години власт учествувале во компромитирање на институциите и злоупотреба на етнички теми за лична корист.
Македонија
Родители протестираат за бесплатен превоз за средношколците наместо поскапо сместување во дом, МОН смета дека решениeто е во интерес на учениците

Законското решение кое го регулира превозот на учениците е ново, заеднички изработено со сите засегнати чинители и претставува одговор на детектираните предизвици во минатото, велат од Министерството за образование и наука, по протестот на родителите од Демир Хисар, кои бараат бесплатен превоз за учениците од стручните училишта во Битола, и се чувствуваат уценети со престојот во ученичкиот дом.
„До лани реакциите беа дека учениците кои се запишани во средните училишта надвор од нивното место на живеење, губат многу време во патување, а со тоа и губат време за настава и учење. Поради превозот, односно утврдени термини за тргнување и заминување од училиште го пропуштаа почетокот на наставата или последните часови. Сега со новиот закон се надминува овој проблем, им се овозможува на учениците да бидат сместени во ученички домови и да имаат доволно време за тоа што им е основна обврска – учењето и совладувањето на наставната материја“, велат од Министерството во одговор за „Макфакс“, уверувајќи дека основа на решението се најдобрите интереси на учениците.
„Макфакс“ го праша МОН и дали има проценка колку семејства со повеќе деца ќе бидат директно погодени од оваа измена и дали е предвидена финансиска поддршка за нив, како и кои алтернативи им се нудат на учениците кои не сакаат да престојуваат во дом, а мораат да патуваат до училиште во друг град. Засега не се знае дали Министерството ќе ја преиспита оваа одлука, со оглед на тоа што, како што раскажуваат родителите, при уписот поднеле и изјава дека детето е со превоз, без да бидат запознаени со измените на Законот.
За семејствата во овој крај од Македонија почетокот на школската година почна со протести. Порачаа дека со измените се ускратува правото на нивните деца на избор и бесплатен превоз.
Реагираат и на критериумите за прием во ученичкиот дом. Велат дека првично не биле примени ученици од пооддалечени општини, како Росоман, Демир Капија и Неготино, иако токму оддалеченоста би требало да биде најважен услов. „Подоцна, кога некои од нашите деца ќе се откажат од престој, тие по дифолт ги примаат оние што претходно биле одбиени. А нам, кои не сакаме децата да седат во дом, ни го укинуваат правото на бесплатен превоз,“ се пожалија родителите пред почетокот на школкската година во дописот до медиумите.
Според нив, со оваа одлука државата наместо да обезбеди еднаков пристап, наметнува дополнителни трошоци.
На вчерашниот протест најавија дека и во наредните денови ќе продолжат со протести и блокади на патот кон Битола, а ги охрабруваат и родителите од другите градови да им се приклучат за заедно да го изразат револтот и да се изборат за правата на децата.
Според оваа измена, учениците кои се запишани во средните училишта во Битола мора најпрвин да аплицираат за место во ученички дом. Во моментов, околу 100 ученици од Демир Хисар учат во Битола, а родителите предупредуваат дека со измените на Законот им се скратува правото на децата да изберат струка која ја нема во нивниот град – како медицинска, економска или техничка. Во Демир Хисар има само едно средно училиште, и тоа со два смерови општа гимназија и компјутерска автоматика. Измените ги засегаат и учениците од селата и градовите од регионот, меѓу кои Ресен, Крушево, Могила, Новаци и други.
„Макфакс“ претходно денес испрати прашања и до Општина Демир Хисар, меѓу кои и тоа дали дали Општината може да обезбеди привремена поддршка за учениците (субвенција за превоз, посебна линија) додека не се најде трајно решение. Прашања беа испратени и до Општина Битола, но до моментот на објавувањето на овој текст, не е пристигнат одговор.