Македонија
Зошто во МАНУ нема ниту еден вработен Албанец, прашуваат од „Вреди“

„Пред да реагираме инстинктивно и со емоции, правилно да се постави дилемата: Зошто во Македонската академија на науките и уметностите (МАНУ), институција од клучно значење за науката во земјата, до денес нема ниту еден вработен Албанец? Зошто Албанците, втората најзначајна заедница во Северна Македонија, се исклучени од институција што треба да ги претставува и да ги поддржува сите етнички и културни групи во земјата?, прашуваат од коалицијата „Вреди“.
Нагласуваат дека на академија на науки и уметности на Албанците не треба да се гледа како на контраст или паралелизам на МАНУ. Напротив, додаваат од таму, тие ја гледаат оваа иницијатива како можност за соработка и синергија помеѓу двете академии промовирајќи размена на идеи и искуства и придонесувајќи за напредокот на науката и уметноста на национално и меѓународно ниво.
„На оние што академијата за науки и уметности на Албанците ја нарекуваат квазиакадемија им порачуваме: ставете ја главата во некоја дупка и не излегувајте следните 20 години бидејќи вие ги уништивте образованието и културата на Албанците. ДУИ со спротивставувањето на оваа иницијатива уште еднаш докажува дека е на иста линија со ВМРО-ДПМНЕ кога се во прашање албанските национални проекти.
Основавањето академија на науки и уметности на Албанците претставува важен чекор кон напредувањето на науката, уметноста и културата на Албанците во Северна Македонија. Оваа институција ќе служи како академски и културен центар, кој има цел да ги промовира и развива знаењето и креативноста на албанскиот јазик и традиција придонесувајќи на тој начин за збогатување на мултикултурниот мозаик на нашата земја“, нагласуваат од коалицијата.
Коалицијата „Влен“ повикува на поддршка на оваа, како што ја нарекуваат, племенита иницијатива и на ангажман во конструктивен дијалог за да се осигурат дека овој проект ќе се реализира успешно и ќе донесе корист за сите граѓани на Северна Македонија. Уверени се дека само преку соработка и разбирање може да се изгради подобра заедничка иднина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
СДСМ: Јавното обвинителство се обиде да ја релативизира одговорноста на актуелните функционери

Според СДСМ, со денешната прес-конференција, Јавното обвинителство уште еднаш потврдило дека постои сериозен обид да се минимизира и релативизира одговорноста на носителите на актуелни функции и институции поврзани со трагедијата во Кочани.
Од опозициската партија велат дека наместо да се лоцира институционалната одговорност и да се повикаат на одговорност директорите на Државниот пазарен инспекторат, УЈП и други релевантни органи кои имаа обврска да постапуваат, фокусот се префрла на индивидуални случаи и на маргинални групи, избегнувајќи ја суштината – зошто и како фирма увезувала и со месеци продавала опасна пиротехника без дозвола, и кој тоа го дозволил.
Дополнително, како што се додава, наместо да се отворат посебни истраги за секој аспект од случајот – за незаконскиот увоз, за институционалниот надзор, за реакцијата на полицијата и за конкретните пропусти на диското, Обвинителството сѐ спакува во еден предмет, со што ризикува да се развлекува постапката со години, па дури и децении. Со ваков пристап, правдата станува недостижна – а тоа е неприфатливо.
„Сериозно прашање е и одлуката приведените полицајци и полициски функционери, кои биле одговорни кобната вечер, да се пуштат на слобода со мерки за претпазливост. Особено загрижува фактот дека двајца од нив биле пресретнати на пат кон граница со Бугарија, што отвора сомнеж за можно бегство и криење на вината.
СДСМ уште еднаш потенцира – без целосна и непристрасна истрага, без одговорност за институциите и носителите на функции кои затаиле, нема да има вистинска правда за жртвите и нивните семејства.
Граѓаните гледаат. И со право очекуваат правда“, се додава во партиското соопштение.
Македонија
(Видео) Во Гази Баба се гради огромна дива депонија без никакви дозволи, објави Арсовска

Во општина Гази Баба, фирма затекната од инспекторат на град Скопје при вршење нелегални активности, правење огромна дива депонија со градежен и опасен отпад и бесправна експлоатација на земјиште, без лиценци, елаборати, дозволи и одобренија, што претставува сериозна опасност по здравјето на граѓаните и животната средина, објави градоначалничката на Град Скопје, Данела Арсовска.
„Апелираме до Министерството за внатрешни работи да постапи, бидејќи неказнивоста и непостапувањето предизвикува сторителите на вакви дела да мислат дека се недопирливи пред законот. Фирмата која прави дива депонија и каде се експлоатира, го има поткопано 110kV кабловски и воздушен далновод кој го напојува со електрична енергија градот Скопје. На ова земјиште сопственост на Република Македонија се прави сериозна штета на главниот далновод, известени се сите надлежни институции за кои очекуваме да не се кријат и да постапуваат“, вели Арсовска.
Македонија
Кривични пријави против двајца угостители од Берово и од Пехчево за бесправно градење

Полицијата поднесе кривични пријави против правно лице – угостителски објект од Пехчево и против С. П. (43) од Пехчево и против правно лице – угостителски објект од Берово и В. К. (32) од Берово поради постоење основи на сомнение за сторени кривични дела бесправно градење.
Пријавениот С.П., сопственик и управител на правното лице од Пехчево, на катастарска парцела во Пехчево во државна соспственост, без одобрение за градење издадено од надлежен орган, изградил тврд објект во кој што е сместен угостителскиот објект и вршел угостителска дејност.
Пријавениот В.К., сопственик и управител на правното лице од Берово, на катастарска парцела, сопственост на Т.К. и М.К., на земјоделско земјиште, надвор од урбанистички план за град Берово, бесправно изградил тврд објект во кој што е сместен угостителскиот објект во кој вршел угостителска дејност.