Македонија
Зошто повторно се случува хаос во ЈСП, вината е во неспособноста на Данела Арсовска и нејзината коалиција со СДС, ДУИ и Левицата, велат од ВМРО-ДПМНЕ

Коалицијата на Данела Арсовска, СДС, ДУИ и Левица во Град Скопје се директно одговорни за хаосот во ЈСП. Тие пред само еден месец лажеа, драматично го обвинуваа ВМРО-ДПМНЕ дека е одговорен за тоа што во Скопје нема градски превоз поради доцнење на платите. Но вистината излезе на виделина после помалку од еден месец. И овој месец повторно доцни исплатата на плата во законскиот рок во ова јавно претпријатие иако Советот изгласа субвенции, велат од ВМРО-ДПМНЕ.
„Вината е во нивната и неспособноста на Данела Арсовска. Тие заедно со менаџерскиот тим во ЈСП, иако добија 700 милиони денари или 11 милиони евра пред дваесетина дена, повторно доцнат со исплатата на плата во претпријатието во законски определениот рок, а причината никој не ја знае.
Срамно и бедно. Уште се свежи сликите на Данела Арсовска како на 22 јануари прикажуваше лажен триумфализам и велеше дека се обезбедени пари за плати „за цела година да не му ја мислиме“ мафтајќи во занес со рачето. Зошто платите не се исплаќаат навремено?“, прашуваат од ВМРО-ДПМНЕ.
Данела и нејзините коалициски партнери, како што додаваат, безмилосно ги манипулираа скопјани, возачите и нивните семејства за ситен поен.
„Уште кога на вонредната седница се изгласаа 11 милиони евра субвенции на ЈСП, ВМРО-ДПМНЕ предупредуваше дека претпријатието е бунар без дно поради лошото менаџирање. Тогаш баравме извештај и увид каде и како се трошат народните пари? И тогаш предупредувавме дека после само неколку месеци пак ќе дојдат Данела и менаџерите да бараат пари за плати во ЈСП. По се изгледа нашите предвидувања ќе се остварат многу побрзо“, се истакнува во реакцијата на ВМРО-ДПМНЕ.
Според оваа партија, СДС, Левица ДУИ и Данела Арсовска треба да излезат и да дадат одговори, зошто повторно се случува хаос во ЈСП?
„Манипулациите и лагите им се распрснаа како меур од сапуница во лице. Неспособни се и криминогени, и тоа е нивниот лепак што им ја врзува коалицијата“, потенцираат од ВМРО-ДПМНЕ.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Вреди: Корупциските досиеја на ДУИ им експлодираат едно по едно

Човекот кој со години го меркаше тронот на Али Ахмети, денес се однесува како да е „паднат од Марс“, а не како да бил дел од сите Влади и да раководел со многу ресори, зад себе оставајќи низа скандали, порача Коалицијата Вреди во најновото соопштение.
Од Коалицијата обвинуваат дека Бујар Османи и ДУИ, и по две децении апсолутна власт, сè уште не ја научиле ниту вештината на достоинствено владеење, ниту културата на политичко однесување во опозиција.
„Ги гледаме заробени во патетична паника, молејќи за власт како да им е последен политички здив“, велат од Вреди.
Во отсуство на идеи и визија, според нив, ДУИ продолжува да ги лаже гласачите со празни ветувања и повици за предвремени избори, со единствена цел – да го спасат сопственото богатство и криминалното минато кое, како што велат, секојдневно излегува на виделина.
Во соопштението се посочува дека граѓаните многу добро знаат со кого имаат работа:
Со Бујар Османи, кој делел тендери за рента-кар како „бакшиш“ за пријатели и политички кругови;
Со Блерим Беџети, кого го нарекуваат „мајстор на башибозук-политиката“, кој заедно со Данела Арсовска го претворил Скопје во џунгла;
Со Артан Груби, кого го нарекуваат „бегалец“ кој завршил на црна листа поради спасувањето на Сашо Мијалков од затвор.
„И сега мислат дека Албанците ќе им веруваат? Каде се вашите ISO-стандардите? Дали добивте одговор од европските институции за вашите писма без одговор?“, прашуваат од Коалицијата Вреди.
Во продолжение, тие обвинија дека ДУИ, во собраниската Соба 16, ја понижила Албанската заедница нудејќи четири министерства и претседател на Собранието за да влезе во влада со ВМРО-ДПМНЕ, наместо со Коалицијата Вреди.
„Не е чудо што денес, кога ДУИ нема ни реална власт ни влијание, се служат со потпалувачка реторика и лажни приказни за понижување на Албанците“, велат од Вреди, додавајќи дека за ДУИ власта отсекогаш била извор на моќ и личен бенефит, а не обврска за иднината на народот.
„Без програмска и кадровска реформа, ДУИ нема да ја помириса власта многу долго време“, се заклучува во соопштението на Коалицијата Вреди.
Македонија
Андоновски: Уверенија од судовите сега со неколку клика, без редици и чекање

Министерот за дигитална трансформација, Стефан Андоновски, на денешната прес-конференција пред претставниците на медиумите, ги соопшти новите услуги од Основните судови, кои од сега за граѓаните се достапни на националниот портал за електронски услуги – uslugi.gov.mk.
„Денеска имам чест да означам заокружување на еден значаен чекор кон дигитализирањето на најважните услуги за граѓаните. На Националниот портал за електронски услуги – uslugi.gov.mk – од денес се достапни две нови, долго очекувани услуги од Основните судови, тоа се, Уверение од кривична евиденција за физички лица и Уверение од кривична евиденција за правни лица“, изјави Андоновски
Министерот дополни дека станува збор за најкористените тековни услуги од основните судови, кои заедно со комплетирањето на пакетот на судски потврди што секојдневно им се потребни на граѓаните и компаниите го сочинуваат пакетот за неосудуваност.
Во овој пакет, веќе дигитализирани се и Потврдата од казнена евиденција и Потврдата за изречена забрана на вршење професија, дејност или должност, станува збор за документи кои се често потребни во секојдневниот живот – за вработување, аплицирање за јавни повици, образовни постапки и многу други правни и административни процедури.
Андоновски истакна дека намерата е граѓаните повеќе да не чекаат со часови пред судските шалтери и архиви. Во таа насока истакна дека целта на Министерството е едноставна, но ефикасна: „Граѓаните да поминуваат повеќе време со своите семејства, со своите пријатели, и да придонесуваат кон економијата, а помалку пред административни шалтери.“
Македонија
СДСМ бара оставка од Тошковски, ВМРО-ДПМНЕ им враќа со скандалозни факти

По вооружената пресметка кај Бит Пазар во која животот го загуби 31-годишен маж, СДСМ обвини за распад на безбедносниот систем и побара оставка од министерот за внатрешни работи Панче Тошковски. Од друга страна, владејачката ВМРО-ДПМНЕ возврати дека токму во времето на СДСМ безбедносниот систем бил најмногу нарушен, а дека денес институциите конечно функционираат и се расчистува со криминалот.
Опозициската СДСМ вели дека безбедноста е сериозно нарушена и побара Панче Тошковски да си поднесе оставка.
„Хаос владее на улиците, безбедноста на граѓаните е сериозно нарушена“, обвинија денеска од СДСМ, реагирајќи на вчерашната престрелка кај Бит Пазар.
„Додека Панче Тошковски се изживува врз граѓаните и поднесува кривични пријави за објави на Фејсбук, криминалните банди му праќаат порака дека тој не ја контролира безбедноста и не му се плашат. МВР, под негово водство, е паднато на колена. Вчера сред бел ден, пред полициска станица, се случи мафијашка престрелка со загинати и повредени. Тоа е тотален распад на безбедносниот апарат“, наведуваат од партијата.
Од СДСМ бараат оставка од министерот Тошковски како прв чекор за, како што велат, враќање на безбедноста на улиците.
„Доста беше Тошковски. Време е за оставка, време е за одговорност. Потребни се промени и итни реформи во безбедносниот систем, за да им се врати мирот и сигурноста на граѓаните“, истакнаа од СДСМ.
Од ВМРО-ДПМНЕ остро возвратија дека токму за време на владеењето на СДСМ државата била претворена во „оаза за белосветски криминалци и наркобосови“.
„Во мандатот на нивниот долгогодишен министер за внатрешни работи, Оливер Спасовски, се доделуваа македонски пасоши на светски криминалци, наркобосови, па дури и на припадници на ИСИС. За време на нивното владеење пробивани беа акции за меѓународен шверц на дрога, а мафијата си доби своја држава“, реагираа од ВМРО-ДПМНЕ.
Партијата обвини дека нападите на СДСМ се затоа што денес конечно се расчистува со криминалците.
„Системот почнува да функционира, криминалците се апсат, а секој што се огрешил пред законот ќе одговара. СДС се плаши токму затоа што законот сега важи за сите, без исклучоци“, велат од владејачката партија.