Македонија
Иванов во Австралија: Работев за заштита на македонските национални интереси
![](https://makfax.com.mk/wp-content/uploads/2020/03/1-1.jpg)
По покана на Македонската добротворна организација (MCWA) и клубот „Сиднеј Македонија“, поранешниот македонски претседател, Ѓорге Иванов, беше покровител и присуствуваше на неколку настани од добротворен и хуманитарен карактер, кои се одржаа изминатата недела во Австралија, каде што оствари средби и со македонската дијаспора.
На трите гала-вечери одржани во Мелбурн, Сиднеј и Волонгог, Иванов упати апел до македонската дијаспора за обединување и единство на сите Македонци во дијаспората, како и за поддршка и помош на повозрасните лица од македонската заедница што живеат во Австралија.
„Грижата за постарите лица е грижа и за сите што ќе дојдеме во таа доба, но и за тоа што тие ни го оставаат како наследство на нашите генерации, како што се мудроста и искуството стекнато со годините“, посочи Иванов.
За актуелните случувања во Македонија, Иванов нагласи дека ја следи нивната загриженост во однос на ова порачувајќи им дека сме издржале многу тешки периоди, така што и ова ќе помине и ќе дојдат подобри времиња.
Во тој контекст посочи дека во неговите 10 години како претседател останал на свечената заклетва и ги почитувал Уставот и законите на Република Македонија.
„Работев за заштита на македонските национални интереси и направив сè што е во моја надлежност и што дозволуваше оваа функција за нивна одбрана. Би сакал да порачам и дека секој треба да ја почитува волјата на народот, која беше искажана и на последниот неуспешен референдум во 2018 година. Тоа дава право да може да бидат во важност одлуките донесени на референдумот од 1991 година, каде што граѓаните се изјаснија за независна и суверена Република Македонија“, нагласи Иванов додавајќи дека ова останува основа некоја следна генерација да се избори за враќање на она што насилно ни беше одземено.
Организаторите на овие настани му изразија благодарност на поранешниот македонски претседател за тоа што прифатил да биде покровител на настани од ваков хуманитарен карактер и како и за тоа што во текот на својот мандат постојано ги штител македонскиот национален идентитет, македонската култура и традиција.
За време на посетата во Мелбурн, Иванов го посети и училиштето финансирано од австралиската влада, а во кое наставата се одвива на македонски и на англиски јазик. Имаше можност да разговара со наставниците и со учениците и да им честита за оваа инзворедна мисија која придонесува за зачувување и негување на македонскиот јазик.
Исто така, поранешниот претседател Иванов го посети седиштето на Македонската добротворна организација, како и пензионерите што ги користат нивните услуги и имаше можност да разговара со секој од нив.
Иванов во Сиднеј со своето семејство ја посети болницата „Сент Џорџ“, каде што раководството и докторите им се заблагодарија на неговиот личен придонес, како и придонесот на сопругата Маја Иванова за помошта во обезбедувањето на средствата со кои се купени ПЕТ-скенерот и скенерот за рано дијагностицирање рак на дојката.
Иванов присуствуваше и на свечен прием што во негова чест беше организиран од страна на актуелниот и на поранешниот градоначалник на општината Бејсајд (поранешна Рокдејл), Џои Авада, и Бил Саравиловски.
Иванов имаше можност да се сретне и со претставници на политички партии на федерално и на локално ниво, кои ги застапуваат интересите на македонската заедница во Австралија.
Тој оствари и повеќе средби со преставници на македонската бизнис и академска заедница.
Посетата на Иванов на Австралија заврши на 1 март со средба со Македонците во Сиднеј на настан организиран од страна на фудбалскиот клуб „Сиднеј Македонија“ на стадионот „Бансктаун“.
Поранешниот претседател на крајот на својата посета им се заблагодари на домаќините за прекрасниот и срдечен пречек и уште еднаш им порача дека секој нивен глас е битен и ако е обединет, ќе стигне во Македонија и ќе мора да биде слушнат.
„Да го сочуваме заветот на предците и нашите револуционери, да ги чуваме македонската држава, македонскиот идентитет и јазик, македонската култура и традиција. Бидете обединети и единствени, бидете што поуспешни за да биде и Македонија што поуспешна“, заврши Иванов.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
![](https://makfax.com.mk/wp-content/uploads/2022/08/makfax_logo_350px.jpg)
Скопје
Изградба на атлетска патека во Општина Илинден
![](https://makfax.com.mk/wp-content/uploads/2024/07/atletska-pateka-2.jpg)
Општина Илинден отпочна со изградба на атлетска патека и трибина на веќе изграденото мултифункционално игралиште во близина на средното училиште во Илинден. Со завршување на градежните работи овој спортски комплекс ќе добие сосема нов лик кој веќе го носи името на прерано загинатиот бранител Драго Маневски.
Атлетската патека ќе биде со 4 патеки во вкупна должина од 200 метри, на којa ќе биде поставена најсовремена тартан подлога, ќе се гради бетонска трибина на која ќе бидат поставени 175 седишта, како и ограда околу трибината, извести општината Илинден.
Градоначалникот на Општина Илинден, Александар Георгиевски денеска направи увид на градежните работи и истакна дека работите се одвиваат според предвидената динамика. Тој додаде дека Општината е голем поддржувач на спортистите, а доказ за тоа се големиот број спортски натпревари, но и инвестициите кои ги прави Општината за создавање на соодветни, модерни спортски терени за нашите спортисти.
Спортски комплекс со атлетска патека за прв пат се гради во Општина Илинден, а по завршување на изградбата спортистите односно атлетичарите од Општина Илинден ќе имаат одлични услови за вежбање со цел остварување на големи успеси. Оваа атлетска патека ќе можат да ја користат и најмладите кои имаат афинитети кон атлетиката, но и оние посериозните, сениорите кои веќе се докажани и ќе ги развинаат своите атлетски способности за уште поголеми резултати, како во Македонија така и на странство, соопшти општината.
Досегашната пракса на инвестирање и создавање на услови за спортување, постојано се докажува како највредна инвестиција за сите генерации, додаваат од општината.
Македонија
Муцунски на НАТО Работен појадок во пресрет на Самитот во Вашингтон
![](https://makfax.com.mk/wp-content/uploads/2024/07/Nato-pojadok-1-mucunski.jpeg)
Министерот за надворешни работи и надворешна трговија, Тимчо Муцунски, денес беше домаќин на НАТО работен појадок, на кој присуствуваа амбасадорите на земјите членки на НАТО, како и Украина, Јапонија и ЕУ.
Настанот се одржа во пресрет на НАТО Самитот во Вашингтон каде ќе биде одбележана 75-годишнината од формирањето на Алијансата.
Работниот појадок беше можност да се потврдат клучните приоритети на Алијансата, кои треба да одговорат на заедничките предизвици. Воедно, на него беше истакната важноста за заедничко демонстрирање единството и заедничките напори за зајакнување на капацитетите и можностите за колективната безбедност.
Министерот Муцунски ги презентираше ставовите на земјата во однос на стратешките одлуки што треба да се донесат на самитот. Заеднички беше потврдена заложбата за обезбедување на колективната одбрана и подготвеност за одговор на предизвиците кои доаѓаат од сите правци. Притоа беше нагласено постигнувањето повеќе од 2% од БПД на земјава за трошоци во одбраната.
„Благодарни сме што НАТО го препознава Западниот Балкан како Регион од стратешка важност за Алијансата. Цврсто веруваме дека продолжувањето на блиската координација и заедничките активности на НАТО и ЕУ во регионот е од суштинско значење, првенствено преку забрзување на процесите на европска и евроатлантска интеграција. Ова е од суштинско значење за зацврстувањето на стабилноста и затворањето на вакуумот кој е подобен за дестабилизирачки влијанија од трети страни“, истакна министерот Муцунски.
Состојбите во Украина, во контекст на европската безбедносна архитектура беа во посебен фокус на појадокот. Можноста на самитот, земјите членки на НАТО заедно со украинските власти да разговараат за нивните краткорочни и долгорочни потреби, ќе овозможи донесување на важни одлуки кои ќе го детерминираат идниот тек на состојбите и иднината на оваа земја.
На него беше истакната важноста од учеството на партнерите од регионот на Индо-Пацификот, во формат АП4, заедно со високи претставници на ЕУ, и можноста за размена на мислења со нив во насока како да се продлабочи соработката, вклучително и заедничките напори за одржување на мирот и стабилноста во двата далечни, но поврзани региони, со зачувување на правилата засновани на меѓународниот поредок и заштита на нашите заеднички вредности.
Македонија
В година со уште позаострени мерки против препишување, 3,25 била просечната оценка на државната матура
![](https://makfax.com.mk/wp-content/uploads/2024/07/1-7.jpg)
Просечната оценка која ја постигнаа средношколците на државната матура годинава е 3,25. Споредбено со минатите години, постои намалување (3,65 во 2023 година, 3,78 во 2022 година и 3,61 во 2021 година) кое, според Државниот испитен центар како надлежна институција за спроведување на процесот било резултат на преземените заострените мерки при полагањето.
Од МОН објаснија дека вкупно 14.834 пријавени кандидати, на 1 јуни го полагале задолжителниот екстерен испит по мајчин јазик, додека на 8 јуни се полагаше изборниот предмет, а тестирањето се спроведе во холовите и спортските сали на училиштата, заради поголема прегледност и контрола на набљудувачите над учениците.
Резултатот, како што информираше директорката на Државниот испитен центар Билјана Михајловска, се: откриени 49 ученици кои за време на решавањето на тестовите користеле мобилен телефон, додека 4 ученици биле фатени како препишуваат решенија по претходно добиени одговори на поставените прашања. При оценувањето на тестовите, оценувачите детектирале 175 ученици кои препишувале на тестовите, како и 22 плагијати. На 268 ученици на кои им била изречена мерката поништување на испитот ќе можат повторно да полагаат во августовскиот испитен рок.
Според Михајловска, најголем број на прекршување на правилата за полагање на Државната матура се констатирани во СЕПУГС „Арсени Јовков“ – Скопје вкупно 32, потоа во СУГС „Д-р Панче Караѓозов“ – Скопје каде се изречени 18 мерки, во СОУ „8 Септември“ – Тетово има 14 изречени мерки, по 13 мерки за прекршување на правилата на тестирањето се изречени во СОУ „Методија Митевски – Брицо“ – Скопје и ЦСНО „28 Ноевмри“ – Дебар. Во СУГС „Цветан Димов“ – Скопје биле изречени 12 мерки за остранување од процесот на полагање на Државната матура.
Честитајќи им на учениците кои успешно ја завршија матурата и го потврдија стекнатото знаење во средното образование, министерката за образование и наука, Весна Јаневска, истакна дека согласно законските прописи во земјава, па и во многу други држави, дипломата е предуслов за упис на факултет.
За следната година најави две новини кои ќе помогнат за подобра организација на полагањето на државната матура и како што рече, тоа ќе биде обид да нема препишувања и други противзаконски, неетички и неморални дејства и на учениците и на тестаторите и набљудувачи.
„Ќе инсистирам полагањето на Државната матура да се реализира во амфитеатрите и други простории на јавните факултети каде има блокатори и друга технологија која ќе оневозможи користење на комуникациски уреди за време на полагањето, затоа што најчесто, поединечни и масовни препишувања се случуваат преку примена на мобилни телефони и други уреди на кои има инсталирани апликации за комуницирање“, истакна Јаневска.
Втората мерка се однесува на измена на правилниците за полагање државна матура, од аспект на подигнување на одговорностите на лицата кои се вклучени во процесот.
„Мора да постојат санкции за набљудувачите, тестаторите и за сите они ги делат просториите со учениците што полагаат, а прават пропусти и жаргонски кажано – замижуваат пред некоректни активности од страна на учениците“, додаде министерката.