Физибили-студија и идеен проект за изградба на булеварот Никола Карев на потегот од крстосницата со булеварот Словенија до обиколницата беа презентирани денеска во просториите на Град Скопје.

На презентацијата присуствуваше и градоначалникот Шилегов, како и претставници на засегнатите стопански субјекти од индустриската зона во Визбегово, што се наоѓаат по должината на трасата, кои се вклучија во дискусијата.

Булеварот Никола Карев во овој дел е предвиден како транзитна магистрала. Во идејниот проект се нудат три варијанти за негова изведба.

Во варијантата што е оценета како најповолна за изведба поради најмалите инвестициски трошоци, времето на реализација и поради тоа што не се урива железничкиот надвозник, се предвидува булеварот Никола Карев да има 4 сообраќајни ленти (по две ленти во насока), средишно зеленило, пешачки и велосипедски патеки и осветление на должина од речиси 4 километри, како и кружен тек пред приклучувањето кон обиколницата.

При реализацијата на овој проект, по должината на предвидената траса, ќе има потреба и од експропријација на земјиштето.

„Физибилити-студијата и идејниот проект се изготвуваа врз основа на важечката планска документација – ГУП 2012 – 2022 година и важечките ДУП-ови од неколку околни општини. Тие имаат цел да ги согледаат сообраќајните и техничките можности за изведба на ова инфраструктурно решение, како и потребите на граѓаните“, информираат од Град Скопје, кој е нарачател.

Студијата и проектот се изработи од компанијата „ГЕИНГ Кребс унд Кифер“.