Македонија
Избрани новите проекти кои ќе добијат грантови за обезбедување услуги за социјално ранливите категории во 17 општини
Министерката за труд и социјална политика, Јованка Тренчевска присуствуваше на презентацијата на резултатите од вториот јавен повик за развој на социјални услуги на локално ниво, што го организираше Министерството за труд и социјална политика, во рамки на Проектот за подобрување на социјалните услуги, поддржан од Светска банка.
Избраните организации ќе обезбедуваат различен вид на услуги, особено за социјално ранливите категории граѓани кои живеат на територија на 17 општини, меѓу кои во градовите: Охрид, Прилеп, Гевгелија, Струмица, Гостивар, Пробиштип, Кратово, Крушево и Крива Паланка, како и во осум помали општини: Долнени, Кривогаштани, Богданци, Босилово, Врапчиште, Пласница, Центар Жупа и Арачиново.
Социјалните услуги што ќе им бидат овозможени на жителите од овие општини се однесуваат на: помош и нега во домот, обезбедување лична асистенција, како и организација на дневни центри за престој, а со нив се очекува да бидат опфатени околу 530 корисници на кои им е неопходна помош и поддршка, како што се лица над 65 години, деца и возрасни со физичка или интелектуална попреченост, како и лица со намален функционален капацитет.
Истовремено, воспоставувањето на ваквите нови социјални услуги во споменатите општини креира можности за работно ангажирање и вработување на околу 150 лица, пред сè негуватели и останати стручни лица, кои пред да почнат со работа ќе поминат низ соодветни обуки и ќе добијат лиценци.
„Со овие нови проекти, заедно со оние од претходниот јавен повик за доделување грантови, обезбедуваме поддршка за 34 проекти преку кои се создаваат услови за развој на социјални услуги кои може да опфатат околу 1300 корисници на локално ниво во вкупно 41 општинa. Oсобено ме радува фактот што близу половина од избраните општини се рурални средини што ја потврдува заложбата за достапност на услугите и во најодалечените места од нашата земја. Еднакво важен аспект од оваа активност е што преку нејзиното спроведување се креираат и нови работи места за над 400 лица стручен персонал кој ќе ги испорачува новите социјални услуги на граѓаните. Овие бројки се силен показател за успешноста на овој Проект“, изјави Министерката за труд и социјална политика, Јованка Тренчевска, при денешното потпишување на договорите за доделување грантови со присутните градоначалници на општините чии проекти за социјални услуги беа избрани на вториот јавен повик.
„Самата суштина на социјалната реформа која ја почнавме во 2019 година е приближувањето на услугите до граѓаните, децентрализацијата, вложувањето во човечкиот капитал, односно поставување на граѓанинот во центарот на системот. Социјалната реформа има двојни придобивки, едниот аспект е приближување на услугите до граѓаните, а вториот аспект е отворањето на нови работни места за граѓаните кои се во социјален ризик“, потенцираше Тренчевска.
Зборувајќи во името на општините, градоначалниците на Пласница и Крушево ја поздравија поддршката што ја обезбедува државата преку ресорното министерство и Проектот за подобрување на социјалните услуги, а која им овозможува и на помалите рурални општини кои располагаат со ограничени финансиски средства, да развијат нови социјални услуги во партнерство со организации – даватели на услуги, кои ќе им се дадат на граѓаните, особено од социјално ранливите категории кои живеат во овие општини.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Филипче: Бошњачката заедница е нераскинлив дел од нашето мултиетничко општество
Претседателот на Социјалдемократскиот сојуз на Македонија, Венко Филипче, вечерва присуствуваше на одбележување на Меѓународниот Ден на Бошњаците, во организација на Странката на демократска акција на Македонија (СДА).
Во обраќањето пред присутните, Филипче прача дека бошњачката заедница е нераскинлив дел од општеството и има значаен придонес во развојот и напредокот на Северна Македонија.
„Граѓаните Бошњаци по измените на Уставот од 2001 година, станаа дел од преамбулата и на нашиот Устав. Со нивната традиција, како составен и нераскинлив дел од нашето мултиетничко општество, имаат значаен придонес во развојот и напредокот на државата. Бошњачката заедница во Северна Македонија активно се вклучи во успешниот концепт „Едно општество за сите“, со кој Северна Македонија сега е пример во Ервопа и регионот за дијалог, меѓусебно разбирање и почитување“, рече Филипче.
Воедно, претседателот на СДСМ, Филипче ја потенцираше важноста на Странката на демократска акција на Македонија (СДА), која како коалициски партнер на СДСМ, изминативе години даде поддршка на развојните политиките во периодот на Владата на СДСМ.
„Во основното образование за учениците Бошњаци се врати редовната настава на босански јазик, Северна Македонија и Босна и Херцеговина потпишаа серија на билатерални договори во интерес на граѓаните,Скопје и Сараево станаа збратимени градови. Со својата прогресивна идеологија во изминатите години, СДА активно учествуваше во сите процеси кои ја придвижија државата напред, како што е членството во НАТО и започнувањето на преговорите со Европската Унија“, рече Филипче, додавајќи дека токму тоа и е разликата СДСМ и актуелната власт .
Филипче во своето обраќање нагласи дека СДСМ и СДА и во иднина ќе делуваат заеднички и ќе се залагаат за соживот,меѓусебна почит и интеграција на државата.
„ За жал деновиве сме сведоци на едни политики кои ја враќаат државата назад во изолација, нешто за што граѓаните не гласаа. И тоа не смееме да го дозволиме, не смееме да се откажеме од европскиот пат, од европска иднина за нашите граѓани. СДСМ и СДА и понатаму ќе продолжат да делуваат заеднички, ќе се залагаме за демократските вредности и инклузија на сите заедници, за интеграција, а не за изолација на државата“, порача претседателот на СДСМ, Венко Филипче.
Македонија
Промена на времето: УХМР за утре најавува дожд, силен ветер и драстичен пад на температурите
Управата за хидрометеоролошки работи најавува значителна промена на времето утре – дожд, засилен ветер и пад на температурата.
Утре под влијание на влажна и постудена воздушна маса од север ќе настапи позначителна промена на времето. Од утринските часови најпрвин во северните делови, ќе има повремени врнежи од дожд и локална појава на грмежи. Ќе дува силен ветер (наместа над 70км/ч.) кој ќе продолжи и во понеделник.
ИЗВОР: УХМР
Дневната температура значително ќе се намали (утре за 6 до 8, а во понеделник уште за дополнителни 4 до 6 степени). Потоа во следните два дена времето ќе биде сончево со ниски утрински температури, а дневните ќе бидат во пораст.
Во Скопје, утре ќе има повремени врнежи од дожд, локално со појава на ретки грмежи и силен ветер.
Од четврток се очекуваат нови врнежи од дожд.
Македонија
Претседателката Сиљановска Давкова се сретна со генералниот секретар на Советот на Европа, Алан Берсе
Претседателката Гордана Сиљановска Давкова во рамки учеството на 79. Генерално Собрание на Обединетите Нации во Њујорк, оствари средба со генералниот секретар на Советот на Европа, Алан Берсе.
На средбата беа разменети мислења за целите и приоритетите насочени кон демократизацијата на македонското општество, човековите права и владеењето на правото. Реафирмирајќи ја посветеноста за натамошна конструктивна соработка со Советот на Европа, претседателката Сиљановска Давкова изрази задоволство од континураната поддршка за нашето целосно усогласување со европските стандарди и вредности.
Претседателката Сиљановска Давкова ја нагласи важноста од кредибилно постапување на Европската Унија во однос на интеграцијата на земјите од Западен Балкан кога напредокот на поединечните кандидати е евидентно заслужен. Таа се осврна и на неопходното обезбедување усогласеност со обврските што земјите-членки ги презеле, вклучително и правилното спроведување на пресудите на Судот во Стразбур.
Соговорниците разговараа и за актуелните безбедносни состојби во Европа, со акцент на војната во Украина, како и за потребата од посветеност и заеднички пристап кон сегашните и идните предизвици какви што се влијанието на новите технологии и климатските промени врз човечките ресурси.
На средбата претседателката Сиљановска Давкова упати честитки до новоизбраниот генерален секретар на Советот на Европа, Алан Берсе, изразувајќи искрени желби за успешно исполнување на важната мисија и продолжување на плодната соработка со македонските институции.