Во објектот „Мимоза“, кој е во склоп на ЈДГ „Весели цветови“ во општината Кисела Вода, со грант-средства од 4,7 милиони денари од Проектот за подобрување на општински услуги – МСИП, извршена е целосна енергетска обнова, поставена е нова фасада со термичка изолација, заменети се прозорците, надворешните врати и олуци, додека во внатрешниот дел од градинката поставена е нова плафонска изолација. Со ова обезбедени се потопли простории за вработените и дечињата кои поголемиот дел од денот го поминуваат во градинката.

„Инвестициите во човечкиот капитал се неопходни за да се подобри продуктивноста на населението на долг рок. Градинките, односно предучилишната грижа, се од големо значење, бидејќи тука е првиот контакт на децата со институциите и нивниот вовед во образованиот процес. Предучилишното образование е значајно за социјализација на децата, за стекнување самодоверба, когнитивни вештини, како и основа за понатамошниот образовен процес, особено ако се земе предвид дека најголем дел од развојот на мозокот на децата се случува до возраст од 5 години. Децата се нашата иднина и преку вложувањето во образованието, здравството и социјалата вложуваме во целосно искористување на нивниот потенцијал, кој согласно денешните мерења е само половина искористен“ – рече министерката за финансии, Ангеловска.

Градоначалникот на општина Кисела Вода, Филип Темелковски, заедно со министерката за финансии, Нина Ангеловска, ја посети реновираната градинка „Мимоза“, лоцирана спроти ТЦ „Шампионче“.

„Денес дечињата и вработените од објектот ‘Мимоза’ при ЈДГ ‘Весели цветови’ добиваат видно подобрени услови за престој и работа. Со проектот за енергетска ефикасност кој се работеше во изминатите месеци, објектот ‘Мимоза’ доби нова фасада со термичка изолација, нови прозорци, надворешни врати и олуци. Во внатрешниот дел на градинката се постави плафонска изолација. Инвестирањето во подобрување на условите во градинките, во обновување на секој постечки капацитет, како и отворањето нови капацитети покажуваат дека се грижиме за нашите најмлади, за нивното здравје, раст и развој. Од тука само ќе потсетам дека започнавме со изградба на нова градинка во населбата Драчево за 125 дечиња, за која благодарност морам повторно да изразам да изразам до Светската банка за кредитот преку кој ќе се спроведе Проектот за подобрување на социјалните услуги. Исто така сакам да најавам изградба на сосема нова градинка во Расадник. Грижата за нашите жители продолжува, а ветувањата стануваат реализирани проекти“ – кажа градоначалникот Темелковски.