Од вкупните побарувања на доверителите, извршителите за десет месеци наплатиле 90 милиони евра. Комората на извршителите забележува дека со последните законски измени што стапија во сила во почетокот на 2017 година во корист на доверителите наплатени се 50 милиони евра помалку.

„Со новиот Закон за извршувањето се овозможи за загрозените категории граѓани да се намалат трошоците и до 70 отсто во однос на стариот закон, понатаму социјалните случаи се изземени од плаќање извршни трошоци кај извршителите, а исто така Министерството за труд и социјална политика и КИРСМ склучија меморандум за соработка, со кој на извршителите им овозможија пристап кон базата на податоци на социјални случаи, а со цел да не се преземаат извршни дејства и да не се оптоварува буџетот на таквата ранлива категорија граѓани. Комората, меѓу другото, забележува дека со донесување такви законски одредби се наруши работата на извршителските канцеларии и во периодот од 2018 година за разлика од периодот од 2017 година извршителите наплатиле во корист на доверителите помалку средства за приближно 50 милиони евра“, рече Зоран Димов, претседател на КИРСМ, на прес-конференција.

Од Комората информираа и дека ги следат незаконитостите во работењето на извршителите преку дисциплинска комисија формирана во рамките на Комората и досега е суспендиран еден извршител, а еден е разрешен од должноста.

Димов истакна и дека за 13 години постоење на извршителите, тие наплатиле 1,2 милијарда евра и тие се вратени кај доверителите.

„Следејќи ги протестите, одреден број граѓани сметаат дека сите средства по кои извршителите ги извршуваат по налозите им припаѓаат ним не правејќи разлика меѓу главен долг, камата, нотарски, адвокатски и извршни трошоци“, рече Димов.