Македонија
„Изговори од трето одделение не поминуваат“, Ковачевски смета дека уставни измени без ВМРО-ДПМНЕ се легитимни

И без поддршка од опозициската ВМРО-ДПМНЕ, уставните измени ќе имаат легитимитет, смета премиерот Димитар Ковачевски. Тој посочи дека тоа е исто како што легитимитет има членството во НАТО, кое, според него, не било поддржано од најголемата опозициска партија. Обвини дека секогаш кога нешто нема да поддржат, од ВМРО-ДПМНЕ кажуваат изговори како во трето одделение.
„Еве јас ќе ве прашам: дали има легитимитет нашето членство во НАТО? Има. Опозицијата не го поддржа. Така што ќе станеме членка на ЕУ и јас се надевам дека опозицијата еднаш нешто ќе поддржи. Опозицијата не го поддржа ниту договорот ФРОНТЕКС, за кој утре почнува имплементацијата, каде што првпат имаме македонски јазик со сите други јазици во ЕУ. Тоа не било никогаш досега. Кажаа биле на пауза. Такви изговори од трето одделение не поминуваат. Договорот има легитимитет“, рече Ковачевски.
За предлогот на поранешниот пратеник од редовите на ВМРО-ДПМНЕ, Александар Спасеновски, со промена на државниот грб според предлогот од 2014 година да се придобие опозициската партија – Ковачевски вели тоа да се достави до комисијата во Министерството за правда.
„Слободно нека ги донесат сите предлози во комисијата за уставни прашања, која ќе биде формирана во Министерството за правда, таму ќе може да се разговара. Бидејќи гледаме, прво, беше хрватски модел, сега грб, така што ставовите на дневно ниво таму се менуваат. Ќе видиме до крај како ќе биде“, рече Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Меџити: Инвестиција од над 6 милиони денари во населбата Гази Баба за одржливо водоснабдување

Првиот заменик на претседателот на Владата и министер за животна средина и просторно планирање, Изет Меџити, денеска изврши увид во работите кои се одвиваат на улицата „Бајрам Шабани“ во населбата Гази Баба во Општина Чаир.
Проектот, поддржан од Министерството за животна средина, има за цел подобрување на снабдувањето со вода за пиење за жителите од оваа област. Оваа инвестиција, во вредност од над 6 милиони денари, опфаќа изградба на нов цевковод со профил DN 280 мм и должина од 235 метри, со што ќе се замени постојната дотраена мрежа.
„Со оваа интервенција се елиминираат честите прекини и недоволното снабдување, обезбедувајќи стабилна вода за пиење со подобрен притисок долж целата улица,“ изјави Меџити при средбата со жителите на населбата.
Проектот се реализира од страна на Министерството за животна средина и просторно планирање, во соработка со Општина Чаир, со цел да се гарантира постојан и квалитетен пристап до вода за пиење за жителите на оваа зона.
Македонија
Мицкоски: За прислушувањето СДС се фатени во лага и сега се заплеткуваат

Во интервју за Дојче Веле за скандалот со прислушкувањето, претседателот на ВМРО-ДПМНЕ и премиер на Република Македонија, Христијан Мицкоски истакна дека во врска со изјавите на поранешниот директор на АНБ, но и за изјавите на СДСM кои излегоа во јавноста, се измислуваат различни изговори и тие се доказ дека нивните тврдења не се совпаѓаат па така дополнително се заплеткуваат во своите тврдења што јасно го покажува нивниот страв.
„Како тоа сега измислуваат различни изговори, откако се фатени живи, СДС едно кажува, Димовски друго, па се заплеткуваат и дават во сопствените тези, така што е јасно како бел ден дека се уплашени. Сакам уште еднаш да им порачам, секој што учествувал во тоа ќе одговара. Ако имало нешто против мене, зарем тие, како бран залетани, би ми простиле, кога половина ВМРО и виновни и невини ги натрупаа во случаи? Сега, пак, се уплашени, а јас со задоволство гледам како се прпелкаат од страв, паника и полни со неизвесност. Не знаат дали некој пропеал, дали сè се знае или само дел, дали ќе има конечна разрешница. Во оваа состојба, тие не се ни свесни до крај дека ова нема добро да заврши за нив. Затоа губат време пишувајќи анонимни писма, и тоа токму инспираторите на ова, како ќе глумат жртви, како ќе напаѓаат ширејќи магла и дезинформации. Забавно е да се гледа како тие исти инспиратори се мобилизираат и ги мобилизираат сите нивни соработници, кои „никнуваат“ од разни страни“, рече Мицкоски.
Мицкоски истакна дека тезата која ја шират за случајното фаќање додека следеле други е трагична и невистинита, потенцирајќи дека СДСM не се менува и постои опасност истата таа да се претвори во маргинална партија чиј простор ќе им биде заземен од друг.
„Сè си се покажува точно како што очекувавме. И јас сум задоволен од тоа што досега се случува. И тезата дека сум „случајно“ фатен додека следеле други е смешна и истовремено трагична теза која е невистинита и наивна, па ако е така зошто тогаш само мене ме следеле и очигледен фокус на следењето сум јас? Ако сум „ловен“ преку други, тогаш за нив ќе има документација, а вака само за мене има. СДС, за жал, не се менува и огромна е опасноста како тргнале да станат маргинална партија и нивниот простор да го заземе некој друг. Но тоа е нивни проблем. Исто како што е нивни проблем, т.е. на нивните функционери и нивна одговорност тоа што ќе следи во овој процес за следење и злоупотреби на службената положба“, дециден е Мицкоски.
Македонија
Шукова: Скопје е во водна криза, имам системско решение за надминување на проблемот

Кризата со водоснабдувањето во Скопје е директен удар врз квалитетот на живот и го нарушува основното човеково право на пристап до вода,“ изјави денес кандидатката за градоначалник на Скопје, Каја Шукова.
Шукова посочи дека населбите Ѓорче Петров, Гази Баба и Автокоманда со месеци се соочуваат со недостаток на вода, особено во летните месеци. Иако нема формални рестрикции, системот работи со намален притисок поради дотраена водоводна мрежа, огромни загуби на вода, диви приклучоци и недостаток на инвестиции во инфраструктурата.
„Над 30% од водата се губи низ распукани и несанирани цевки, а вкупните загуби достигнуваат и до 50%. Изворот Рашче работи на граница на капацитет, а градот нема ниту стратегија, ниту решение на повидок,“ изјави Шукова.
Како нејзин приоритет, таа најави сигурно и стабилно водоснабдување, со конкретни мерки: итна санација на водоводната мрежа, изградба на современ систем за собирање и пречистување на отпадни води, намалување на загубите, искористување на дождовницата и воведување нови технологии за водни пумпни станици и резервоари.
„Скопје мора да има стратегија и мора да има вода – подеднакво за сите,“ порача Шукова.