Македонија
Иницијатива за конгрес: Мицкоски нема автентична политика и често ги менува ставовите
Се уште актуелниот претседател на ВМРО-ДПМНЕ, Христијан Мицкоски, е конфузен и постојано зборува различни работи во зависност од ситуацијата и соговорникот, велат од Иницијативата за конгрес на ВМРО-ДПМНЕ.
Во допис до медиумите, оттука наведуваат дека Мицкоски нема автентична политика и често ги менува ставовите се одразува на неговиот личен рејтинг, а што е уште поважно ја влече партијата надолу.
„На 10 Јули, пет дена пред изборите кога мислеше дека има некаква поддршка за да победи и да формира влада, го призна сменетото име на институциите.
‘Ние би биле лицемери ако ја игнорираме реалноста. Како и секогаш, велам дека не можеме да ја игнорираме реалноста, бидејќи учествуваме на избори и сме дел од влада на која стои новата придавка. Имаме учесник во таа Влада со новата придавка и зема плата. Би бил лицемерен, ако кажам дека тоа не е така. Ќе излезеам несериозен ако речам дека ова е фикција, а ВМРО-ДПМНЕ е сериозна партија’, изјави тогаш Мицкоски во интервју на Телма.
Сега, седум месеци подоцна Мицкоски се обидува да ја игнорира реалноста која што ја признаваше и да испраќа писма до Собранието не прифаќајќи го променетото име.
‘Владиното мнозинство не ја прими граѓанската иницијатива за одложување на пописот кој е очигледен фалсификат. Изговорот е дека не постоела институцијата Собрание на Република Македонија. Кој се плаши и бега од сопствениот народ срамно завршувa’, напиша Мицкоски пред неколу дена на неговиот фејсбук профил.
Дали Мицкоски лажел во јули кога се надевал на поддршка од меѓународната заедница велејќи дека ја признава новата реалност или лаже сега кога не ги признава новите официјални имиња на институциите?
ВМРО-ДПМНЕ и делегатите кои го избраа заслужуваат Мицкоски да им објасни кога лажел. Дали станува збор за тенденциозна манипулација или станува збор за политички дилетантизам кој го препознава јавноста.
ВМРО-ДПМНЕ не смее повеќе да биде заложник на манипулациите на Мицкоски.
Неопходно е сплотување на партиските структури преку вонреден конгрес и искрена дискусија за причините за сите порази со кои се соочивме овие три години.
Иницијативата ги повикува сите делегати кои гласаа за Мицкоски да дојдат на 28 Март на Вонредниот 17-ти Конгрес во Скопје и да дискутираат за иднината на ВМРО-ДПМНЕ.
ВМРО-ДПМНЕ веќе не смее да си го дозволи луксузот и да загуби нови изборни циклуси, оставајќи ги проблемите и нерасчистените прашања под тепих“, се наведува во соопштението.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Без струја денеска делови од Чаир, Бутел и Шуто Оризари
Од ЕВН Македонија АД известуваат дека денеска без електрична енергија ќе останат:
· во периодот од 08.00 до 11.00 часот корисниците од дел од улицата Бајрам Шабани и дел од улицата Чаирска, општина Чаир;
· во периодот од 09.00 до 10.00 часот корисниците од објектите околу Фитофарм-Визбегово, општина Бутел;
· во периодот од 09.00 до 12.00 часот корисниците позади бензинската ОКТА во Шуто Оризари, општина Шуто Оризари.
Македонија
Делови од Карпош и Шуто Оризари денеска без вода
Од ЈП Водовод и Канализација известуваат дека денеска поради уличен дефект на улицата Демирхисарска бр 13 прекинато водоснабдување ќе имаат корисниците од улицата Демирхисарска, од 17:30 часот до завршување на дефектот, општина Шуто Оризари.
Од ЈП Водовод и Канализација исто така известуваат дека денеска поради изведување на водоводен приклучок ф-100мм на ул. Софиска 7, прекинато водоснабдување ќе имаат корисниците од следниве улици: Софиска, Бриселска, Петар Драганов, Његошева, Копенхагенска и Стокхломска, општина Карпош.
Водоснабдувањето ќе биде прекинато од 09:00 часот до завршување со работните активности.
Македонија
Утрото постудено и магливо, преку денот сончево со мала до умерена облачност
Утрото постудено со услови за појава на магла по одделни котлини и речни долини. Преку денот времето ќе биде сончево со мала до умерена локална облачност. Ќе дува слаб ветер од јужен правец.
Минималната температура ќе биде во интервал од -3 до 4, а максималната ќе достигне од 16 до 21 степен.
Во Скопје, утрото постудено, во делови од котлината магливо. Преку денот времето ќе биде сончево со мала до умерена облачност. Ќе дува слаб југоисточен ветер. Минималната температура ќе се спушти до 2, а максималната ќе достигне до 18 степени.
Времето во наредните денови
Под влијание на висок воздушен притисок следува период на стабилно и суво време со постудени утра, а дневната температура ќе биде во пораст, особено во деновите од викендот. Претпладне по одделни котлини и речни долини ќе има услови за појава на магла.

