Македонија
Искуства на младите: Што е потребно за да се биде успешен во Македонија?

УСАИД беше домаќин на конференција за млади лидери на тема „Патот на Македонија од развој до самоодржливост” во кино Фросина – Младински културен центар (МКЦ) во Скопје. На полудневната конференција, учесниците имаа можност да ги слушнат инспиративните говори на едни од најуспешните млади македонски таленти, кои ја пренесуваа нивната лична приказна и успех како и панел дискусија за тоа „Што е потребно за да се биде успешен во Македонија?”. Конференцијата беше последна од низа активности на УСАИД Mакедонија за одбележување на 25 годишнината од работењето во Македонија.
Обраќајки им се на учесниците на конференцијата, претставникот на Канцеларијата на УСАИД во Македонија, Дејвид Атебери, рече: „Ние сме тука во улога на катализатор кој ги поставува основите за успехот на Македонија, но на крајот иднината на земјата е дефинирана од нејзината младина, нејзините граѓани, нејзините идни лидери. Предизвиците што ги преземате, изборите што ги правите и напорите што ги вложувате ќе определат колку бргу Македонија ќе стане земјата каква што посакувате да биде“.
Ирена Чаушевска, соосновачка на бизнис академијата и акцелератор Њуменс , Дона Костуранова, извршна директорка на Младинскиот образовен форум, Сатки Исмаили, директор на основното училиште “Кирил и Методиј” од Тетово, Дороти Пачкова, основачка и извршна директорка на „Една прави”, Елена Кочоска , раководителка на програми во „Полио плус” и Сефер Селими, основач на здружението за унапредување на демократијата „Демокраси Лаб”, беа говорници на конференцијата додека Нина Ангеловска, соосновачка и генерална извршна директорка на „Групер”, Жарко Димитриоски, соосновач на агенцијата „1 на 1”, Ана Голејшка од „Ретвитни оброк” и Мерал Мусли Тајроска, амбасадорка и претставничка од Македонија на организацијата „Жени без граници” учествуваа како панелисти.
Завршувајќи ја конференцијата, амбасадорот на САД во Mакедонија, Џес. Л. Бејли додаде: „Слушајќи ги приказните на говорниците денес, знам дека може да успееме. Она што ме интересира е што ќе случи со сите овие приказни за 10-15 години. Верувам дека едно е точно а тоа е дека на тој пат нашите две земји и нашите два народа ќе станат уште поблиски и посилни партнери. Верувам дека ќе продолжиме со овие дискусии, овие партнерства, како што вашата земја ќе стане посилна и се повеќе ќе се потпира на тоа што го има“.
УСАИД покани стотина млади учесници на конференцијата за да слушнат примери за успешни стартапи, иницијативи од заедницата, социјални претпријатија и граѓански акции кои имаат позитивно влијание низ целата земја. УСАИД верува дека овие млади луѓе кои учествуваа во конференцијата ќе бидат идните претприемачи и лидери кои ќе ја водат Македонија на патот до самоодржливост.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сончево и потопло со мала до умерена облачност

Времето денеска ќе биде сончево и потопло со мала до умерена облачност. Ќе дува слаб до умерен ветер претежно од југозападен правец.
Минималната температура ќе биде во интервал од 6 до 17, а максималната ќе достигне од 28 до 35 степени.
Во Скопје, сончево со мала до умерена облачност. Ќе дува слаб до умерен ветер од југозападен правец. Минималната температура ќе се спушти до 13, а максималната ќе достигне до 33 степени.
Времето во наредните денови
До петок времето ќе се задржи претежно сончево и топло со постепен пораст на дневните температури. Ќе дува слаб до умерен ветер од јужен правец. Во сабота попладне и во текот на ноќта кон недела ќе биде нестабилно со локален пороен дожд и грмежи. Ќе дува умерен до засилен југозападен ветер, а во недела ветерот ќе го смени правецот во северен. Потоа следува период на стабилно и потопло време.
Македонија
Министерството за одбрана реагира на соопштението на СДСМ: Лицемерно, со манипулација на факти и со целосно извртување на вистината

„Лицемерно, со манипулација на факти и со целосно извртување на вистината – така се карактеризира соопштението од политичката партија СДСМ која се обидува редовна и навремена набавка која се спроведува години наназад и се однесува на потребите на Армијата и СИТЕ угостителски објекти на Министерството и Армијата, вклучувајќи го и Домот на Армијата, авто камповите во Дојран и Охрид, како и Хотелот „Шар“ на Попова Шапка, да ја претстави во сосема поинакво светло. Првенствено, треба да се има предвид дека набавеното кафе и пијалоци во угостителските објекти кои се од отворен карактер за граѓаните, се во слободна продажба, а приходот од продажбата повторно влегува во македонскиот буџет“, реагира Министерството за одбрана на соопштението од политичката партија СДСМ.
„Впрочем, имајќи предвид дека последните седум години со Министерството раководеа кадри на оваа политичка партија, кои ги правеле ИСТИТЕ набавки, се поставува прашањето – дали тие не знаеле што прават, дали се „луксузирале“ со народните пари или сега се обидуваат да стават сомнеж на функционирањето и побарувањата од не било која, туку најценетата и најпочитуваната институција во државата – македонската Армија?
Фактите се следни:
Набавката на кафе и алкохолни пијалоци е спроведена во јавна и транспарентна постапка. Целата документација, вклучително и тендерската документација, договорите и одлуките се јавно достапни на Порталот за јавни набавки и секој граѓанин, новинар или институција може слободно да направи увид, анализа и споредба со набавките од претходните години.
Набавката се однесува на угостителски објекти од отворен тип, кои се користат во рамките на протоколарни, воени и меѓународни активности, а не за „удобност“ на министри, како што лажно се тврди.
Години наназад е спроведена ИСТА ТАКВА НАБАВКА, која оваа година (во споредба со 2023 година) е со многу помали количини, на пример: ставката за алкохолни пијалоци е намалена од 50 до 88 проценти, а жестоките алкохолни пијалоци кои претходно биле набавувани се целосно отстранети.
Сумата на договорот во 2025 година е намалена за 15 проценти во споредба со 2024 година и за речиси 40 проценти во споредба со 2023 година.
Прашањата кои се поставуваат се логични: Или раководството од СДСМ кое го предводело Министерството не знаело што работи и што набавува или политичката партија влегува во едно црно сценарио во кое се обидува да ја вметне и македонската Армија.
Ги повикуваме сите медиуми да не ги земаат предвид ваквите дезинформации кои се пласираат во јавноста особено од страна на политички партии. Борбата со дезинформациите и манипулацијата со фактите е нешто против кое треба сите заедно да се бориме вклучувајќи ги и политичките партии, а не тие да потекнуваат токму од овие кујни.
Се работи за македонските граѓани и за Македонија и токму затоа не смееме да дозволиме граѓаните да бидат излажани“, се наведува во реакцијата од Министерството за одбрана на соопштението од политичката партија СДСМ.
Македонија
Од утре се нормализира сообраќајот на регионалниот пат Нова Брезница – Македонски Брод преку националниот парк Јасен

Утре од 05.00 часот регионалниот пат Р 1106 Нова Брезница – Македонски Брод преку националниот парк Јасен ќе биде пуштен за сообраќај во термините од Министерство за внатрешни работи, извести АМСМ.