Министерството за труд и социјална политика и Агeнцијата за вработување информираат дека е извршена исплата на младински додаток за април. На личните сметки на 2.759 млади лица префрлени се над 8,9 милиони денари додаток на плата.

Поддршката на младите до 23 години кои засновале работен однос во производствени дејности се реализира преку имплементација на Законот за младинскиот додаток. Правото на младинскиот додаток, кој изнесува 3.000 денари за полно работно време за лице месечно, за пет месеци го искористиле 3.061 младо лице. Со оваа мерка за поттикнување на интересот за производствените дејности младите се поддржани со вкупно 45,4 милиони денари.

Повеќето од корисниците на младински додаток се вработени во производство на електрична и електронска опрема за моторни возила – 810 работници. Во производство на леб, слатки и бисквити работат 80 корисници на младински додаток, а 69 во производство на фармацевтски производи. Има и 33 млади лица што одгледуваат саден материјал, а 18 се занимаваат со производство на обувки. За младински додаток може да конкурираат младите што се вработени со задолжително социјално осигурување кај работодавци или се самовработени во компании со претежна производствена дејност, младите што се вработени преку приватна агенција за вработување кај работодавец со претежна производствена дејност, како и младите индивидуални земјоделци со задолжително социјално осигурување.

Имајќи ја предвид потребата од потикнување на растот на домашната економија и развојот на реалниот сектор, како и големиот интерес на младите за користење на младинскиот додаток, Владата соопшти дека обезбедила дополнителни средства за уште 1.000 млади лица, потенцијални корисници на правото на младински додаток.