Македонија
Истече и рокот: Одлука дали Јанкуловска е дискриминирана – нема, таа чека соодветен третман во „Идризово“

Поминаа 73 дена од поднесувањето на претставката од Гордана Јанкуловска до Комисијата за заштита од дискриминација, а до овој момент, нејзиниот сопруг и адвокат Влатко Илиевски нема добиено никаков одговор. Таа се жали дека е дискриминирана во затворот „Идризово“ каде одлежува затворска казна затоа што не може да ги користи погодностите кои и следуваат со закон, а само затоа што е женско. Од Комисијата за „Макфакс“ велат дека предметот е комплициран и се разгледува од сите аспекти. Адвокатот Илиевски за „Макфакс“ дека побарале и ургенција.
„На 23.02.2023 е поднесена Ургенција до Комисијата, бидејќи рокот од 60 дена во кој треба да постапи Комисијата истече. До сега, не сме добиле никакво известување од Комисијата“, посочува Илиевски за „Макфакс“.
Исмаил Камбери, претседател на Комисијата за заштита од дискриминација, посочува дека претставката од Јанкуловска е разгледувана најмалку четири пати на седница. Објасни дека станува збор за комплициран случај.
„Да многу комплициран предмет е. Во петок имаме стручна помош од Управата за извршување санкции. Во наредна недела треба да ја имаме“, посочува Камбери за „Макфакс“.
Во претставката на Јанкуловска стои дека погодностите се тесно поврзани со третманот кое осуденото лице го има во казнено-поправната установа. Таа е распоредела во групата „Б2“, како лице од висок или среден ризик. За да биде преместена во друга група, затворскиот правилник налага дека против неа не треба да се водат други постапки.
„И токму тука е содржана дискриминацијата бидејќи осудените лица од женски пол можат да служат казна затвор само во КПУ Идризово која што установа е од затворен тип. Машките осудени лица, по отслужување на дел од казната (откако ќе им остане помалку од 3 години казна затвор), можат да побараат и добиваат преместување во друга установа од полуотворен или отворен тип, каде што важат членовите 8 и 9 од Правилникот, каде не е пропишан условот да не се водат други постапки за распоредување во соодветните групи“, посочува адвокатот Илиевски.
Условот да не се водат други кривични постапки за затвореник да може да биде сместен во полиберални групи, според правниците не е во согласност со член од Законот за извршување санкции. Ексдиректорот на Управата за извршување санкции, во интервју за „А1он“ и самиот призна дека Јанкуловска и другите затворенички се дискриминирани.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Сообраќајот на ГП Блаце во двата правци се одвива нормално за патничките моторни возила

Од 21:50 часот сообраќајот на ГП Блаце, во двата правци се одвива нормално за патничките моторни возила, а наизменично движење за ТТМВ со хладњачи додека за ТТМВ со церади движењето е се уште забрането, извести АМСМ.
Сообраќајот на државните патишта се одвива непречено, по суви коловози.
Интензитетот на сообраќај на патните правци надвор од градските средини е умерен. На граничните премини од македонска страна, нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Дел од Гази Баба денеска без вода

Од ЈП Водовод и Канализација известуваат дека денеска поради промена на затварач од ф – 2,5 “ на улицата 16 – та Македонска Бригада б.б без вода ќе останат дел од корисниците од улиците 16-та Македонска Бригада, Лазар Поп Трајков, Трифун Хаџи Јанев и Јани Лукровски, општина Гази Баба.
Водоснабдувањето ќе биде прекинато во периодот од 08.30 часот па се до завршување на работата.
Македонија
Денеска сончево и многу топло, од среда значително опаѓање на дневната температура

Времето денеска ќе биде сончево и многу топло со мала до умерена локална облачност. Попладне ќе има услови за изолирана појава на нестабилност со краткотраен пороен дожд и грмежи. Ќе дува умерен до засилен ветер од југозападен правец (над 60 km/h).
Минималната температура ќе биде во интервал од 13 до 21, а максималната ќе достигне од 33 до 41 степен.
Во Скопје, сончево и многу топло со мала до умерена облачност. Ќе дува умерен, во делови од котлината повремено засилен ветер од југозападен правец.
Минималната температура ќе се спушти до 18, а максималната ќе достигне до 41 степен.
Времето во наредните денови
Поради продор на посвежа воздушна маса од север и засилен северен ветер (над 60 km/h) во среда, а особено во четврток ќе има значително опаѓање на дневната температура (од 8 до 10 степени). Во среда претежно во северните делови ќе има услови за повремен дожд, а во петок локална појава на нестабилност со пороен дожд и грмежи. Во деновите од викендот ќе преовладува сончево време со мала до умерена облачност, а дневната температура ќе биде во пораст.