Врз основа на објавените информации и изјави на официјални претставници, јавно реагираме и бараме итна институционална постапка за расветлување и решавање на случајот со закупот на капацитет за природен гас од терминалот во Александрополис, Република Грција, велат од Здружението на инженерите на Македонија, од каде што информираат дека поднеле претставка до Владата и до Јавното обвинителство.

„Имено, од октомври 2024 година, во согласност со изјавата на министерката за енергетика, Република Македонија месечно плаќа речиси 300.000 евра за закуп на преносен капацитет за природен гас што не се користи“.

Ова, како што оценуваат, значи дека буџетот на државата годишно се оштетува за сума поголема од 3,5 милиони евра.

Според нив, договорот, кој, како што истакнуваат, наводно е склучен за период од 15 години, останал активен и покрај тоа што земјата не остварила удел во сопственоста на терминалот – услов, кој, според кажувањата, бил основа за преземање на обврската.

„Со оглед на големината на финансиската штета и фактот што станува збор за јавни средства бараме: итна ревизија на договорот од страна на Владата и надлежните институции со цел негово поништување доколку се утврди дека е склучен спротивно на интересите на државата.
Поведување истражна постапка од страна на Јавното обвинителство со цел утврдување евентуална кривична и материјална одговорност на лицата што го склучиле или овозможиле спроведувањето на овој договор.
Објавување на содржината на договорот и вклучените страни во интерес на транспарентност и информирање на јавноста“.

Неопходно е, додаваат од Здружението, итно да се дејствува за да се спречи понатамошно трошење јавни средства за услуга што не се користи и да се испрати јасна порака дека нема неказнивост за вакви штетни договори. Во спротивно, како што велат, довербата на граѓаните во институциите дополнително ќе се наруши.