Македонија
Глоба од 13.000 евра, инспекција влезе во „Мош“ и во „Интермецо“ по поплаките на граѓаните за гласна музика

По пријави од граѓани за зголемена бучава од гласна музика од угостителските објекти на територија на општина Центар, Секторот за инспекциски работи во текот на минатата недела организира акција за мерење бучава со овластена лабораторија за животна средина „Еуромак контрол“ – Скопје во раните утрински часови, информираат од Општина Центар.
Акциите, како што појаснија, биле спроведени на целата територија на општината, при што биле поминати клучните точки, односно локалите за кои редовно има пријави од граѓани, конкретно во населените места Дебар Маало, Буњаковец, Центар и Капиштец.
„Извршено е мерење на бучавата на два угостителски објекта: „Мош“ и „Интермецо“.
По извршените мерења на бучавата, овластената лабораторија за животна средина ги достави извештаите од мерењата, врз основа на кои се спроведени инспекциски постапки, со платен налог за глоба за сторен прекршок во согласност со Законот за заштита од бучавата во животната средина.
Правните лица може да платат половина од казната во рок од 8 дена. Доколку не ги платат казните во висина 13.000 евра, овластениот инспектор ќе достави барања за поведување прекршочна постапка пред Основниот суд, оддел за прекршоци“, се нагласува во информацијата од Општината.
Општина Центар, велат од таму, постојано добива поплаки од граѓаните за гласна музика и непочитување на работното време по што во неколку наврати досега има изречено казни за бучава.
Општина Центар апелира до сите управители и сопственици на угостителски објекти во општината да се придржуваат до постојните правилници, да имаат обѕир кон жителите што живеат во непосредна близина на нивните локали и да се придржуваат до Законот за заштита од бучавата во животната средина.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Судот го одобри обвинението за возачот што ја прегази Фросина

Судот го одобри обвинението за возачот Васил Јованов што ја прегази Фросина Кулавкова на пешачки премин на булеварот Партизански Одреди.
„Ја информираме јавноста дека Советот за оценка на обвинителниот акт, го одобри обвинението на Основното јавно обвинителство со КО бр. 271/25 од 27.03.2025 година против осомничениот В.Ј. за кривичното дело Тешки дела против безбедноста на луѓето и имотот во сообраќајот од чл. 300 ст.2 в.в. со чл. 297 ст.1 од КЗ, поврзан со сообраќајката од јануари 2025 – та година на булеварот Партизански одреди во Скопје во која животот го загуби 22 – годишната Ф.К.“, соопшти Кривичниот суд.
Од таму додаваат дека со одобрениот обвинителен акт, формиран е кривичен предмет кој ќе биде ќе биде распределен на понатамошно судење согласно АКМИС – системот, а кога ќе биде насрочен термина за главна расправа, странките и јавноста ќе бидат дополнително известени.
Македонија
(Видео) Јанчев: Кадровата политика на оваа влада го доуништува здравството

Пратеникот од Левица, Сашко Јанчев во Собранието за време на седницата за пратенички прашања, упатувајќи прашања до министерот за здравство, реагираше на кадровските злоупотреби, мобинг и недоследности во здравствените установи.
„Нема подобра политика од кадрова политика. Државните институции не се зградите фасадите и ентериерот, туку луѓето, кадарот кој работи во нив. И ако има добар кадар, ќе има и функционални институции“, рече Јанчев.
Тој алармираше за постапките на Бурим Идризи, раководител на сектор во Институтот за трансфузиона медицина, кој според кажаното, изготвувал фалични анекси на договори за вработување со кои неовластено го менувал датумот на засновање на работниот однос. На вработени со повеќедецениски стаж им вметнувал одредба дека засновале работен однос лани, во 2024 или 2023 година. Раководителот таквите анекси им ги давал на вработените и непотпишувањето на истите го третирал како отказ, односно прекин на работниот однос.
„Овој лош кадар, Бурим Идризи, не само што е награден, туку е пренаграден – тој е одговорен на четири одделенија, правно-административно техничко одделение, општи работи, ИТ системи, е во комисија за „Мој термин“ и други комисии. Значи, тој зема поголема плата од што земаат специјалистите“, истакна Јанчев.
Посочи дека и директорот на Институтот за трансфузиона медицина, Елези, непотпишувањето на наштиманите анекси го третирал како раскинување на договорот за вработување и на огласна табла им се заканувал со такви известувања. Јанчев истакна дека директорот Амир Елези не ги исполнува законските услови да раководи со ваква установа, односно да биде директор. Истото поради фактот што Законот предвидува дека директорот мора да биде специјалист по трансфузиологија и да има работно искуство најмалку две години од областа на трансфузиологијата, додека пак актуелниот директор специјализирал рентген и го нема потребното искуство.
Беше изнесен и случај на искусна медицинска сестра со 38 години стаж во болницата во Неготино, која наместо да се награди за нејзината посветеност, била преместена на работно место со помала плата. На нејзиното место е поставена вработена со само неколкумесечен курс.
„Тоа е таа владина кадрова политика. Кога 38 години стаж и работно искуство е помалку од неколкумесечен курс и неискуство. Таа е таа владина кадрова политика која ја уништува Македонија“, потенцира Јанчев.
Македонија
СДСМ: Додека ДПМНЕ, ЗНАМ и ВЛЕН се расправаат, целиот систем се распаѓа

Според СДСМ, Владата предводена од ДПМНЕ, ЗНАМ и ВЛЕН е најнеспособната и најхаотичната што Македонија ја имала.
„Додека ДПМНЕ, ЗНАМ и ВЛЕН се занимаваат со внатрешни пресметки и коалициски кавги институциите се уриваат пред очите на граѓаните.
Системот е на работ на колапс, а владата функционира како неорганизиран картел, повеќе фокусирана на тоа кој ќе земе повеќе, отколку на тоа како да се решат проблемите на народот. Граѓаните секој ден гледаат, наместо работа, партиски препукувања. Наместо резултати, скандали. Наместо политики за народот, тивки борби за тендери и функции“.
Како што оценуваат, здравството е во колапс, економијата во слободен пад, инфраструктурата е заглавена. Платите за илјадници вработени во јавниот сектор не се неисплатени, проекти – нула.
Владата, како што додаваат не работи за народот, туку само за себе.
А парите, според СДСМ, наместо да одат кај граѓаните и работниците за повисоки плати се трошат за лукзусни овошја, папаја, манго, луксузни хотели, приватни авиони и патувања со државни делегации како туристички тури.
„Ова не е Влада која работи за граѓаните – ова е организиран хаос на штета на државата. Оваа влада нема капацитет, нема план, нема визија. Единствено што гледаме се кавги, скандали и неспособност“, велат од СДСМ.