Македонија
Камионите со стока од 1 февруари ќе се мерат само еднаш – царините на Македонија и Србија потпишаа меморандум

Од 1 февруари македонските компании што увезуваат или извезуваат во Србија и обратно камионите со стока ќе ги мерат само еднаш.
Ова ќе се однесува и за стоки што транзитираат низ двете држави. Директорот на Царинската управа, Стефан Богоев, и директорот на Царинската управа на Србија, Бранко Радујко, денеска потпишаа меморандум за признавање на белешките од мерење на царинските терминали т.н. кантарски белешки помеѓу двете земји.
Говорејќи за значењето на потпишаниот протокол, Богоев истакна дека заклучно со ноември 2023 година трговската размена со Србија изнесува 985,9 милиони евра, при што извозот е 365,9 милиони евра или 2,9 процента повеќе од претходната година. Притоа целиот увоз, извоз и транзит се одвива преку граничниот премин Табановце, на кој минатата година на влез се евидентирани речиси 140 илјади товарни моторни возила, а на излез 170 илјади камиони.
„Сите овие товарни возила на влез и на излез се мереле двапати, еднаш во Македонија и еднаш во Србија, а со потпишување на денешниот протокол за признавање на т.н кантарските белешки овие товарни возила, како што реков, ќе се вагаат само еднаш, што за компаниите ќе значи заштеда на време и пари. Ветив дека Царинската управа ќе дејствува како партнер на бизнис-заедницата сè со цел создавање услови за зголемување на нивната конкурентност на меѓународниот пазар. Чекор по чекор со ваквите мерки овозможуваме остварување на тие цели“, вели Богоев.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Ѓорѓиевски и „ЕУ за чист воздух“: Се садат чинари во училиштата и градинките во општина Кисела Вода

Градоначалникот на општина Кисела Вода, Орце Ѓорѓиевски, денес присуствуваше на акцијата за садасување на дрвца-чинари во ООУ „Кузман Шапкарев“, како дел од големата еколошка иницијатива што општината ја спроведува во сите училишта и градинки. Оваа акција се реализира со поддршка на Канцеларијата за проектни услуги во рамки на проектот „ЕУ за чист воздух“, финансиран од Европската Унија, која ги донираше садниците.
– Засадувањето на секое дрвце е инвестиција во иднината на нашите деца. Како општина, континуирано работиме на подобрување на квалитетот на воздухот и животната средина. Оваа донација е особено значајна бидејќи се насочува токму кон училиштата и градинките – местата каде нашите деца растат и се образуваат. Покрај бројните акции за пошумување, во сите училишта поставивме прочистувачи на воздух, а во поголемите паркови на отворено – надворешни пречистувачи, достапни за сите граѓани. Нашата заложба за чиста и здрава животна средина нема да запре овде. Продолжуваме со реализација на еколошки проекти кои ќе донесат подобри услови за сите жители на Кисела Вода, изјави градоначалникот Ѓорѓиевски, изразувајќи голема благодарност до Европската Унија и Канцеларијата за проектни услуги за донацијата и поддршката на иницијативата.
– Овој проект е уште еден доказ дека споделуваме исти вредности – грижа за околината и за здравјето на идните генерации. Благодарност до сите што придонесуваат за оваа благородна цел. Заедно создаваме почиста, позелена и поздрава Кисела Вода, додаде Ѓорѓиевски.
Македонија
Од први април му откажаа бубрезите, 40 отсто од телото му беше со изгореници, Таравари потврди дека во Литванија почина управителот на дискотеката „Пулс“

инистерот за здравство Арбен Таравари утрово потврди дека на повредите од пожарот во Кочани во Литванија, каде што беше на лекување, им подлегна Александар Карадакоски. Во Литванија бил испратен со 40 отсто изгорено тело.
„За жал утрово, два часа пред да тргнам за Липково ја добив лошата вест дека еден пациент е починат во Литванија. Од четворицата пациенти тој беше најкритичниот. Од први април му откажа работата на бубрезите, практично беше ставен на дијализа и за жал утрово ја добив лошата информација дека тој починал. 40 отсто од телото му беше со изгореници. Од почеток главен проблем беше инфекцијата, огромна површина рани што имаше на телото. Да се надеваме другите критични пациенти да поминат подобро и да ни се вратат во државата“ рече министерот Таравари утрово по посетата на Здравствениот дом во Липково.
Карадакоски е еден од четворицата пациенти за кои министерот постојано известува дека се во критична состојба. Министерот Таравари утрово извести дека од 77 пациенти кои се лекуваат во странство во овој момент има петнаесетмина кои се интубирани, сите останати дишат самостојно.
Македонија
Во тек е исплатата на правата од социјална и детска заштита

Министерството за социјална политика, демографија и млади информира дека денеска започна исплатата на правата од социјална, детска и цивилна заштита за месец Март 2025 година.
Корисниците на парични права коишто поседуваат дебитна картичка ќе можат да подигнат готовина на банкоматите на банките, да ги користат средствата за безготовински плаќања во продажната мрежа или преку електронско и мобилно банкарство од денеска, 04 Април 2025 година.
Со цел да се избегне метеж пред и во банките при исплата на правата, за корисниците кои не користат картички, исплатата ќе се спроведе во 2 групи во сите отворени филијали и експозитури на банките, согласно со утврдениот распоред по азбучен ред, според првата буква од презимето и тоа:
04.04.2025 – А, Б, В, Г, Д, Ѓ, Е, Ж, З, Ѕ, И, Ј, К, Л, Љ
07.04.2025 – М, Н, Њ, О, П, Р С, Т, Ќ, У, Ф, Х, Ц, Ч, Џ, Ш.