Во Градскиот парк на Школка во Скопје, со почеток во 10.45 часот, ќе се одржи 10. традиционална јубилејна кампања за борба против ракот на дојката со наслов „Напред розово 2018 – чекори против ракот на дојката“.

Настанот е во организација на здружението „Борка – За секој нов ден“ и Амбасадата на САД во Македонија, а оваа година во партнерството со компанијата „Авон“.

Официјални обраќања ќе имаат Џес Л. Бејли, амбасадор на САД во Република Македонија, и Кејпи Полк Бејли, Венко Филипче, министер за здравство, Марина Цигарида, менаџер за продажба на „Авон“ – Македонија, и Биба Додева, претседател на НВО „Борка“.

Настанот ќе вклучи заедничка розова прошетка на повеќе од 1.500 учесници што ќе испратат порака за важноста на раната дијагноза и поддршката на пациентите како основен предуслов за победа над ракот на дојката. Во прошетката ќе земат учество сите граѓани на Република Македонија вклучувајќи и организирано учество на поддржувачи на „Борка“ од градовите во Македонија. По прошетката, ќе следува музички хепенинг сè со цел да се овозможи луѓето, т.е. борците против ракот на дојката да се зближат, да се дружат и да го слават животот.

Како и во годините претходно, така и оваа година ќе се собираат средства преку продажба на розови производи, а  средствата од продажбата ќе се искористат за реализација на годишните активности на здружението „Борка“, а тоа се: обезбедување психосоцијална помош и поддршка за болните од рак и нивните семејства, обезбедување перики за жените со низок социјален статус кои примаат хемотерапија, посета на Клиниката за онкологија и торакална хирургија од страна на волонтери на здружението, одржување на бесплатната СОС-линија за помош и поддршка и др.