Македонија
„Катимерини“: Разговорите за името забавија, неизвесна е посетата на Коѕијас на Скопје

По силниот почеток, разговорите меѓу владините претставници на Грција и поранешната југословенска Република Македонија (ПЈРМ) во врска со спорот за името значително забавија бидејќи Атина чека значајни отстапки од Скопје за клучните барања на Грција за промени во Уставот на ПЈРМ, пишува грчкиот весник „Катимерини“.
Понатаму во текстот пишува дека имало надежи дека грчкиот министер за надворешни работи, Никос Коѕијас, ќе го посети Скопје, но падот на динамиката на разговорите го одложило патувањето на неодредено време.
„Оваа недела Коѕијас треба да зборува на универзитетот во Бостон и не би можел да патува во Скопје. Меѓутоа, разликите што продолжуваат да ги одделуваат официјалните претставници на Грција и на ПЈРМ може да значи дека патувањето нема да се случи до крајот на март. Патувањето на Коѕијас, кога ќе се случи, ќе биде првиот директен лет од Атина до Скопје по 12 години“, пишува „Катимерини“.
Во меѓувреме дипломатите внимателно ќе ја следат денешната посета на Скопје од страна на американскиот помошник-државен секретар за европски и евроазиски прашања, Вес Мичел, кој в четврток ќе отпатува во Атина.
„Во изјавата објавена пред неговото патување Стејт департментот рече дека Мичел ќе ја потврди поддршката на САД за евро-атлантските аспирации на ПЈРМ и за тековните преговори со Грција. И покрај тоа што ПЈРМ ги следеше ветувањата да направи симболични промени – како што се промена на имињата на меѓународниот аеродром во Скопје и на клучниот автопат, грчките власти се загрижени поради отсуството на каква било промена во суштинските прашања“, пишува во текстот.
Континуираното одбивање, продолжува текстот, од страна на премиерот на ПЈРМ, Зоран Заев, да ја разгледа можноста за ревизија на Уставот на неговата земја поради загриженоста на Грција за иредентистичките референци е клучно.
„Заев, наместо тоа, инсистира на изготвување меѓународен договор, истакнувајќи дека во секој случај неговата влада го нема потребното парламентарно мнозинство да протурка какви било уставни измени. Грчките власти тврдат дека Заев може да ги убеди пратениците да ги донесат уставните реформи“, пишува „Катимерини“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Привремена промена во сообраќајот на делот од државнот пат А2 – делница Желино – Тетово

Од денес (24.04.2025) ќе има привремена промена во сообраќајот на делот од државнот пат А2 – делница Желино – Тетово, помеѓу бензинската станица Макпетрол и северниот влез на Тетово. На овој дел од патот ќе се врши геодетско снимање и една сообраќајна лента ќе биде затворена во неколку фази. Работите ќе траат до нивно завршување, извести АМСМ.
Сообраќајот на државните патишта се одвива непречено, по наместа влажни коловози.
Интензитетот на сообраќај на патните правци надвор од градските средини е умерен. На граничните премини од македонска страна нема подолги задржувања за влез и излез од државата.
АМСМ препорачува прилагодена брзина на движење, почитување на поставената сообраќајна сигнализација и внимателно управување со возилата, особено на патиштата низ котлините, речните долини и клисурите, каде има можност од појава на одрони. Ова посебно се однесува за делниците Катланово – Велес, Маврово – Дебар – Струга, Виница – Берово и Кочани – Делчево.
Македонија
Променливо облачно и нестабилно со повремени локални врнежи од дожд и грмежи

Времето денеска ќе биде променливо облачно и нестабилно со повремени локални врнежи од дожд и грмежи. Наместа процесите ќе бидат поинтензивни во форма на невреме со пообилен пороен дожд, грмежи, силен ветер и услови за изолирана појава на град. Минималната температура ќе биде во интервал од 8 до 12, а максималната ќе достигне од 18 до 25 степени.
Во Скопје, променливо облачно со повремен дожд. Попладне ќе биде нестабилно со пороен дожд, грмежи и засилен ветер. Минималната температура ќе се спушти до 10, а максималната ќе достигне до 25 степени.
Времето во наредните денови
До крајот на оваа седмица ќе се задржи променливо облачно и нестабилно време со повремени врнежи од дожд и појава на грмежи. Локално ќе има поинтензивни процеси во форма на невреме со пообилен пороен дожд, грмежи, силен ветер и изолирана појава на град.
Македонија
Горан Минчев со граѓаните на Тетово: „Локалната промена почнува со Вас“

Генералниот секретар на Движењето ЗНАМ – За Наша Македонија, Горан Минчев, во рамки на кампањата „Заедно повеќе знаеме“, одржа средба со граѓаните, членовите и симпатизерите во Тетово.
Минчев порача дека Тетово заслужува транспарентно и ефикасно управување, развој на инфраструктурата и враќање на довербата во локалната власт.
„Граѓаните се нашите партнери – заедно ќе изградиме програма што одговара на вистинските потреби на Тетово. Време е општините да престанат да бидат партиски плен и конечно да почнат да работат за граѓаните“, изјави Минчев.
Тој истакна дека ЗНАМ нуди луѓе со знаење и интегритет, а не политички експерименти, и најави дека дијалогот со граѓаните ќе продолжи низ цела Македонија.