Македонија
Ковачевски: Без родова рамноправност нема ни демократија, ниту социјална правда!
Претседателот на Владата Димитар Ковачевски, заедно со министерката за труд и социјална политика, Јована Тренчевска учествуваа на настанот „Различни приказни, заедничка борба“, организиран во Владата по повод одбележувањето на 8 Март – Меѓународниот ден на жената.
Ковачевски истакна дека денеска е денот кога даваме гласност на пораките дека без потполна родова рамноправност нема ни демократија, ниту социјална правда!
„ Она за кое јас се залагам, е тоа одбележување да не е само денеска. Цврсто стојам на ставот дека овие прашања ќе бидат решени само ако им дадеме постојана гласност и видливост – секој ден. 8 Март е секако можност да поразговараме за економската, политичката и социјалната рамноправност на жените, но тој е првиот од 365 дена гласност за која јас силно се залагам.
Како Влада активно работиме да изградиме општество без стереотипи и дискриминација, општество кое е инклузивно и обезбедува еднакви можности за сите. Општество во кое сите заеднички се грижиме и секојдневно ги охрабруваме борбата против родовата нерамноправност, сексизмот и мизогинијата.
Активно работиме за да ги запреме сите видови на неправда во општеството, зашто борбата за правата на жените и девојките е борба за праведно општество.
Минатата година, Република Северна Македонија го донесе Законот за спречување и заштита од насилство врз жените и семејното насилство. За прв пат во овој закон се дефинирани различните форми на насилство врз жените, и за прв пат имаме законско решение кое насилството врз жените и девојките го дефинира како родово базирано насилство. Ова е прв закон кој дава обврска на институциите да постапуваат со должно внимание при заштита на жени жртви на насилство и семејно насилство.
За првпат во националната легислатива е воведен и клучниот процес за затворање на кругот на насилство врз жени и семејно насилство со реинтеграција на жени жртви на насилство. Во законот воедно е предвидено и брзо и ефикасно постапување на сите институции во институционален одговор на секаков обид за насилство.
За прв пат досега, законот предвидува и обврска за судовите кои се должни во рок од 24 часа од насилството да донесат одлука за отстранување на сторителот од домот од 10 до 30 дена, како и сет мерки и услуги за привремен престој за жените жртви на семејно насилство, нивните деца, жртвите на трговија на луѓе и сексуално насилство, каде ќе им биде обезбедена помош и поддршка.
Од сите нас зависи како ќе се спротивставиме на насилството, молкот не е решение, зборувањето, дигањето глас, преземањето мерки и мултидисциплинарниот пристап е вистинскиот пат за искоренување на насилство врз жени, родово базирано и семејно насилство. Реагиравме и на трендовите на сексуално вознемирување на интернет. Токму затоа во Кривичниот законик ги воведовме како нови кривичните дела „Демнење“ и „сексуално вознемирување“ како одговор на злоупотребата на интернет каналите за комуникација.
Нашите заложби за економско јакнење ги вклучуваат подеднакво и девојките и жените. Ги имаме и првите ветувачки резултати. Северна Македонија е лидер во Европа според бројот на жени истражувачи кои имаат учество од 53% во вкупниот број на истражувачи во државата. Тоа е потврдено во последниот објавен извештај на УНЕСКО. Северна Македонија е првата земја која не е членка на Европската Унија, а успешно го имплементира проектот Гаранција за млади за брзо вработување веќе четири години по ред. Ова е проект во чиј фокус се млади, невработени лица до 29 години.
Со оваа мерка минатата година беа опфатени 19.298 млади невработени лица од кои дури 74,8% се жени. Со новото зголемување на минималната плата пак им излегуваме во пресрет на вработените во индустријата за текстил, кожа и чевли, во кои најголем процент се жени.
Грантот за руралните жени од мерката „Поддршка за активен женски член во земјоделското домаќинство“ е само една од повеќето мерки на Министерството за земјоделство, шумарство и водостопанство, за директна поддршка на индивидуалните земјоделки. Тука се уште и мерките „Млад земјоделец“, како и поддршка за стартување на нов агробизнис.
Продолжуваме во настојувањата за анулирање на разликата во вредноста на трудот меѓу мажите и жените и во секој сектор да обезбедиме девојките и жените да имаат апсолутно еднакво право да напредуваат во нивните работни кариери и да бидат избирани на највисоки работни позиции.
Денеска, со честитките по повод Меѓународниот ден на жената повикувам да не запреме тука.
Независни и економски силни жени, со свој силен глас и мислење, со можности за слободен избор и еднаквост, се иднината на нашата држава која нема да толерира дискриминација по ниеден основ.
Само така, заедно создаваме инклузивно, еманципирано и силно општество.
Да живее 8-ми Март, Меѓународниот ден на жената“ порача Ковачевски.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Силјановска-Давкова: Времето на жените доаѓа, срамота е што 30 години сме немале жена претседателка или премиерка
Во рамките на активностите на кандидатката за претседателка на државата, Гордана Сиљановска-Давкова, таа се обрати на трибината на тема „Жени“ која се одржа во Јавна соба.
„Во мојата програма има посебен дел посветен на жените. Подолго светот живеел како патријархат отколку матријархат. Повеќе жени во политика, повеќе гаранции за помалку насилство. Срамота е 30 години да не сме имале жена претседателка, жена премиерка. Да им ставиме крај на Венецијанските трговци“, порача Давкова.
Како што додаде, жените имаат што да покажат, имаат вулканска сила и мажите треба да се инспирираат од нив.
„Времето на жените доаѓа. Сега е време за машка еманципација. Македонија е во женски род, политиката е во женски род. Женскоста е квалитет неискористен. Промените наскоро доаѓаат“, рече Давкова на трибината.
Македонија
Оштетени билборди и рекламни паноа на политичка партија во Тетово
Вчера на улицата ,,Киро Ристовски-Дрнц” и на улица „Маршал Тито” во Тетово биле оштетени билборди и рекламни паноа од парламентарните избори од една политичка партија.
Се преземаат мерки за расчистување на случајот, објави МВР.
Македонија
Демократски сојуз предлага платите на полицајците да бидат колку оние на обвинителите и судиите
Демократски сојуз на сите полицајци и припадници на службите за безбедност, им го честита 7 Мај, ДЕНОТ НА ПОЛИЦИЈАТА и им посакува успешно извршување на сложените безбедносни задачи.
Празникот се совпаѓа и со изборите за претседател на државата и за пратеници, каде за жал, како што велат од патијата, улогата на полицијата е клучна за обезбедување стабилност и услови за мирни и фер избори.
„Овие денови се клучни за да спречите нерегуларности, притисоци, купување на гласови, организирање на „Бугарски воз“ или нарушување на изборниот процес на кој било начин (насилство итн). Инаку полицијата и службите за безбедност извршуваат тешки, одговорни и сложени безбедносни задачи, но последните години се со ниски примања. Така, главен оперативец задолжен за спречување и откривање на тешки кривични дела прима плата од околу 45 илјади денари, а јавен обвинител околу 130 илјади денари“, додаваат од партијата на Павле Трајанов.
Предлагаат двојно зголемување на платите на полицијата и нивно усогласување со платите на обвинителите и судиите.