Македонија
Ковачевски: Ги реализираме ветувањата, политиките на раст на платите и на животниот стандард продолжуваат
Покачувањето на платите, покачувањето на пензиите, покачувањето на стандардот на граѓаните е она на што останавме доследни и на што ќе останеме доследни и во продолжението на мандатот иако на тој пат имаше голем број опструкции, сепак сите потребни решенија беа донесени, рече премиерот Димитар Ковачевски на седницата за пратенички прашања во парламентот и додаде дека политиките на раст на платите и на животниот стандард на граѓаните ќе продолжат.
Тој посочи дека Владата го реализира клучното предизборно ветување на социјалдемократската Влада за просечна плата до 30.000 денари, што со последните податоци од Државниот завод за статистика е надминато. Односно, просечната месечна исплатена нето-плата од вработен во март 2022 година е на ниво од 31.080 денари, што во однос на март 2021 година е зголемување од 10,1 проценти или за една година просечната плата пораснала 2.863 денари, а во однос на март 2017 година покачувањето е 8.635 денари, кога просечната плата била 22.445 денари.
„Владата и во услови на најголема светска економска и од секаков вид друга криза продолжува со засилена динамика да работи на зголемувањето на просечната плата, тука удел, нормално, има и минималната плата, која ја зголемивме на 18.000 денари, а исто така и пензиите доживеаја историски најголем раст, првин преку усогласувањето направено на почетокот на годината преку менувањето на методологијата и усогласувањето што ќе следува во септември“, додаде премиерот.
Тој посочи дека во согласност со статистичките податоци ваквото зголемување се должи, пред сè, на зголемувањето на просечната месечна исплатена нето-плата за вработен во финансиските дејности и дејностите на осигурувањето; уметност, забава и рекреација и објекти за сместување и сервисни дејности со храна.
Премиерот Ковачевски нагласи и дека мерките за поддршка за зголемување на платите во приватниот сектор преку субвенционирање дел од придонесите имаат значајна улога во зголемувањето на платите во приватниот сектор, а дека во јавниот сектор веќе се водат разговори за усогласување на платите во согласност со нова методологија, а насочи и на факторот невработеност, кој е на историски најниско ниво од 15,2 проценти.
„Ова покажува една поздрава кондиција на македонската економија“, оцени премиерот Ковачевски насочувајќи го како важно пред претстојната зима.
„Пред нас имаме тешка зима. Имаме држави што прогласуваат и вонредна состојба во однос на цената на храната и енергентите и достапноста на енергентите и значајно е што приходите на граѓаните се зголемени, имаме зголемување на минималната плата, пензиите се зголемени, имавме и еднократна помош при зголемувањето на цената на електричната енергија. Тоа нè прави поподготвени да можеме да го дочекаме наредниот период, кој очигледно ќе биде исклучително кризен на територијата на целиот европски континент“, рече премиерот Ковачевски на седницата за пратенички прашања во парламентот.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.
Македонија
Министерот Ристовски им ги врачи медалите на најуспешните на маратонот
Министерот за спорт Борко Ристовски им ги врачи медалите на најуспешните на денешното јубилејно 20. издание на Скопскиот маратон, упатувајќи честитки за сите учесници на маратонот за нивната издржливост и посветеност.
Побединик на годинешната трка е Хилари Чемвоно од Кенија. Неговиот сонародник, Даниел Кипротич го освои второто место, а третата позиција му припадна на најдобриот македонски атлетичар, Дарио Ивановски.
Во женска конкуренција доминираше Кенијката Ирине Џеруто. Најдобрата македонска маратонка Адријана Поп Арсова заврши на второто место, а трета беше Вивијан Џелагат од Кенија.
На полумаратонска трка доминираа натпреварувачите од Турција. Прв низ целта мина Џан Хусеин, второто место го освои Емектар Мурат, а трет беше Гедиклиоглу Абдурахман. Најдобар македонски натпреварувач на полумаратонската трка беше Иван Пешовски кој заврши на шестата позиција.
Во женска конкуренција, на полумаратонската трка победи Милица Мирчева од Бугарија. Греша Бакрачи од Албанија беше втора, а третата позиција ѝ припадна на Јулие Ларсен од Норвешка.
-Скопскиот маратон и оваа година покажа дека Македонија е подготвена да организира спортски настани од светски размери. Горд сум што Министерството за спорт е главен покровител на оваа атлетска манифестација која го става Скопје и Македонија на светската маратонска мапа. Ние како Министерство за спорт секогаш ќе бидеме поддршка за ваквите настани кои негуваат вистински спортски вредности, градат традиција и носат промоција на нашата Македонија во светот, истакнал министерот Ристовски на доделувањето на медалите.
Тој упатил честитки до сите учесници на маратонот, како и до организаторите и до сите што придонеле денешната трка да мине во најдобар ред, нагласувајќи дека Скопскиот маратон е една од најзначајните спортски манисфестации која негува традиција и промовира вистински спортски вредности.
-Честитки до сите учесници, за вашата посветеност и напор. Вие сте вистински инспирација и пример дека преку спортот се градат не само здраво тело туку и заедница обединета во поддршката на заеднички цели. Честитки и благодарност и за организаторите, волонтерите и сите што помогнаа во реализацијата на овој голем спортски настан. Вашиот труд и ентузијазам направија овој маратон да биде успешен и сигурен за сите учесници и гледачи. Ова е уште една победа за спортот во Македонија, и се надевам дека ќе продолжиме да создаваме вакви можности за нашите спортисти и за заедницата. Спортот е мост што не спојува, а Скопскиот маратон е доказ за тоа, рече министерот Борко Ристовски.
На годинешниот јубилеен Виз Ер Скопски маратон настапија рекордни 13.400 натпреварувачи од 55 земји. Министерството за спорт е главен покровител на Скопскиот маратон.
Македонија
Обилните врнежи ја загадија водата за пиење во Гостивар
Пожарникарите од ТППЕ Тетово имале две технички интервенции за испумпување вода во тетовската населба Деребој, кај подвозникот за село Фалише и испумпување вода во поплавената куќа во истата населба.
– ЈКП „Шар“ од Тетово информира до ЦУК дека поради загаденоста на водата во изворите на Лешница, системот на филтер станицата на Лешница засега е целосно затворен, а градот Тетово се снабдува со намалено количество вода. Екипите на ЈКП „Шар“ се на теренот за брзо решавање на проблемот. Известуваат дека ќе има ограничување на водата во градскиот водовод од 13:00 до 15:00 часот и во период од 1:00 до 4;00 часот, стои во соопштението.
Од ЈП „Комуналец“ од Гостивар е добиено известување во ЦУК дека поради контаминација предизвикана од обилните врнежи од дожд, најновите физичко-хемиски и микробиолошки анализи потврдуваат дека водата од јавната водоводна мрежа во моментов не е безбедна за пиење.
– До натамошно известување, од ЈП „Комуналец“ од Гостивар да не се пие водата од чешма, од водоводот, информира ЦУК.
Македонија
Пожарникари извлекле жена во срушена куќа во Велес
Во Центарот за управување со кризи (ЦУК) според последниот извештај имало 2.142 повици во последното деноноќие на бројот за итни случаи 112, а немало пожари на отворено.
ЦУК информира дека вчера, од 9:30 до 10:15 часот, четворица пожарникари со едно противпожарно возило од ТППЕ Велес извлекле жена во срушена куќа. Жената се стекнала со мали повреди и со возило на итна медицинска помош била пренесена во болница во Велес.
ТППЕ Куманово дека вчера, од 12:08 до 12:30 часот, извлекувала лице од возило при сообраќајна незгода во близина на Домот за стари лица „Зафир Сајто“. Лицето, како што се наведува, имало тешки телесни повреди.
РЦУК Тетово, пак, информира дека околу 4:30 часот возило излетало во река во село Беловиште, Општина Гостивар. Се интервенирало со едно возило и четворица пожарникари. Сите лица биле извлечени, а само еден сопатник бил телесно повреден, кој бил пренесен во Гостиварскиот клинички центар.