Македонија
Ковачевски: Главното прашање на овие избори е европската иднина на државата

Главното прашање на овие избори е кој има визија за иднината, а кој продава магла и само крева раменици? Кој ќе обезбеди напредок кон членството во ЕУ, а кој ќе го закочи тој процес и ќе не врати 10 чекори назад во минатото? Ние имаме конкретен план како да ја внесеме државата во ЕУ, рече претседателот на СДСМ, Димитар Ковачевски на митингот во Кисела Вода на кандидатот за претседател Стево Пендаровски.
„Не само визија, ние имаме конкретен план, имаме волја и знаење, заедно со нашиот претседател Стево Пендаровски, заедно со Коалицијата за европска иднина, како да ја внесеме државата во ЕУ до 2030 година. Владата предводена од СДСМ ја внесе државата во НАТО, со новата Влада предводена од СДСМ, државата ќе го исполни деценискиот сон за членство во ЕУ. Граѓаните знаат дека со СДСМ нема откажување. Знаат дека нема враќање назад“, рече Ковачевски.
Додаде дека го имаат докажано тоа, работејќи во услови на најголема економска и енергетска криза.
„И никого не оставивме сaм. Донесовме сет од 9 пакети со антикризни мерки преку кој ги поддржавме граѓаните и фирмите со 2,6 милијарди евра. Денес, платите и пензиите се на историски највисоко ниво. Навробетноста ја сведовме на рекордно ниски 12,6 проценти, додаде тој.
Јас речиси секој ден сум меѓу граѓаните. На улица, во парк, на пазар. Свесен сум дека има незадоволство од инфлацијата, корупцијата, владеењето на правото. Знам дека се уште има луѓе кои тешко врзуваат крај со крај. И прифаќам дека имаме грешки, дека има состојби во нашата држава за кои можело и морало подобро“, рече Ковачевски.
Според него, единствено влезот во ЕУ е гаранција за европски животен стандард.
„За да ја оствариме целта за членство ЕУ, потребен нѝ е претседател кој ќе ја поддржи европската визија. Модерен, прогресивен, граѓански човек. Токму тоа е Стево Пендаровски. Човек без црни дамки и грешки во првиот мандат, човек кој докажа дека за него сите граѓани се еднакви.
Граѓаните знаат дека СДСМ е најдобрата опција за иднината на државата. За точно еден месец од денеска, на 8-ми мај, ќе прогласиме нова голема победа за СДСМ. СДСМ ќе ја формира новата проевропска влада, а Стево Пендаровски повторно ќе биде претседател, рече претседателот на СДСМ, Димитар Ковачевски вечерва во Кисела Вода.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
Петмина добија труење од храна откако јаделе во сендвичарница во Штип

Пет лица пријавиле симптоми на труење со храна по јадење сендвичи со пилешки стек во сендвичарница–киоск во Штип, информираат од Агенцијата за храна и ветеринарство (АХВ). Објектот е веднаш затворен до добивање на резултатите од лабораториските тестирања.
Случајот бил пријавен од Центарот за јавно здравје Штип, по што инспекторите на АХВ извршиле вонреден инспекциски надзор кај операторот со храна.
Земени се примероци од инкриминираната храна и брисеви од работните површини. Објектот е времено затворен сè додека не се потврди неговата безбедност со лабораториските резултати – велат од АХВ.
Граѓаните кои се пожалиле на симптоми на труење побарале медицинска помош, а здравствените служби го следат нивното здравствено состојба.
Од Агенцијата нагласуваат дека инспекциските служби ќе продолжат со контроли за да се обезбеди заштита на потрошувачите и превенција на слични случаи.
Македонија
Се бара притвор за одгледувачот на домашен канабис

Основното јавно обвинителство Скопје донесе Наредба за спроведување истражна постапка против едно лице осомничено за кривично дело – Неовластено производство и пуштање во промет наркотични дроги, психотропни супстанции и прекурсори од член 215 став 1 од Кривичниот законик.
Во домот на осомничениот 50-годишник во селото Страчинци, полицијата пронашла 3 откорнати растенија и 99 пресечени, превиткани и исушени гранчиња канабис, како и 41,4 грама марихуана.
Јавниот обвинител до судијата на претходна постапка од Основниот кривичен суд Скопје достави предлог за определување мерка притвор за осомничениот.
Македонија
Најмногу дожд во изминатото деноноќие во Тетово, Претор и Куманово

Најмногу дожд во изминатите 24 часа до 08:00 часот се наврнати во Тетово – 19 литри на метар квадратен, потоа во Претор 11 и Куманово 10, информираат од Управата за хидрометеоролошки работи.
Потоа следи Пожаране со 9 литри на метар квадратен, 8 во Попова Шапка, по 6 во Крушево и Маврови Анови, 5 во Битола, по 4 во Крива Паланка и Лазарополе, по 3 во Скопје-Зајчев Рид, Велес и Охрид, 2 во Прилеп и еден литар на метар квадратен во Тополчани.
Во текот на денот не очекува претежно облачно со повремени врнежи од дожд кои наместа ќе бидат пообилни (над 20 l/m²), проследени со ретки грмежи. Ќе дува слаб со умерен ветер претежно од југоисточен правец, поизразен долж Повардарието.
Најниска температура утрово е измерена на Попова Шапка – шест степени Целзиусови. Во Берово, Крушево и Маврови Анови по 9, 10 во Лазарополе, по 11 во Крива Паланка и Претор, по 12 во Охрид, Прилеп и Струмица, по 13 во Тетово, Битола, Виница и Куманово, по 14 во Скопје-Петровец, Скопје-Зајчев Рид и Велес, по 15 во Штип, Демир Капија, Кавадарци и Гевгелија.