Македонија
Ковачевски за „Политика“: Апелирам за итен прекин на агресијата врз Украина, како држава претседавач со ОБСЕ ќе помогнеме со дијалошките искуства

Претседателот на Владата, Димитар Ковачевски, ви интервјуто за „Политика“ зборуваше и за придонесот што ќе го даде Македонија за време на претседавањето со ОБСЕ во контекст на актуелните случувања во Украина, со дијалошките искуства на домашен и меѓународен план.
Ковачевски посочи на важноста на прогресивните политики на Владата и на државите од регионот, чијашто цел се европските интеграции, но ја унапредија соработката со регионалните иницијативи и денес тоа резултира со економска поддршка и стабилност.
„ Добро е што ја унапредуваме регионалната соработката и со тоа ја зајакнавме меѓусебната доверба. Овие регионални иницијативи, Отворен Балкан, Берлинскиот процес нè зближуваат и се поттик заеднички да го држиме изострен фокусот кон одржувањето на стабилноста и безбедноста во регионот и секако тоа што е наша заедничка стратешка цел, кон европските интеграции“, рече премиерот Ковачевски.
Како премиер на држава којашто претседава со ОБСЕ тој апелираше на итен прекин на руската агресија врз Украина и соопшти како Северна Македонија може да придонесе преку сопствените искуства, во воспоставувањето на мирот во пошироки рамки.
„ Мора да се врати мирот во светот и ние сме уверени дека е тоа можно преку креативни решенија, на коишто ќе работиме. Да, изненади тоа што агресијата дојде од постојана членка на Советот за безбедност на Обединетите нации, како што è Руската Федерација. Тоа што низ насилство одлучува да решава предизвик – држава членка на ОН, организација којашто во својата основа го има одржувањето на мирот во светот и членка на ОБСЕ, е спротивно на заедничките определби на државите членки против какви било форми на дејствување, чиишто последици се човечки животи и загрозување на светскиот мир.
Историјата покажува дека ниту еден проблем не може да се реши по насилен пат и колку и да трае еден воен конфликт, секогаш до решението е дојдено на дијалошка маса.
Затоа, апелирам, како премиер на држава којашто претседава со ОБСЕ, веднаш да прекине агресијата на Руската Федерација врз Украина и да се отвори пат за дипломатија и дијалог, со цел да се дојде до разумно решение по мирен пат.
Македонија од 1 јануари 2023 година ја има честа да претседава со Организацијата за безбедност и соработка во Европа, ОБСЕ. Тоа е истовремено и голема обврска, бидејќи се случува во време кога во Европа има воена агресија.
Но, уверен сум дека успешно ќе одговориме на дадената доверба, затоа што имаме искуства како се надминуваат конфликти. И самите ние, како држава, бевме корисник на посредничко-безбедносни механизми, вклучително и на мировната мисија на Обединетите нации и преку сопствен пример ни се познати бенефитите од мировни ангажмани на меѓународната заедница.
Исто така, успеавме и со сопствени сили, дома, иако сме мултиетничка држава, да се обединиме во заедничките определби кон мир, со што не бевме вовлечени во војна, во време на поранешна Југославија, а и подоцна, со Охридскиот рамковен договор, успеавме да ја сочуваме унитарноста на државата.
Денес сме и светол пример на Балканот и во Европа, за функционална мултиетничка демократија и држава којашто стабилно чекори по евроатлантскиот пат. Тоа го постигнавме и со мудрите дијалошки политики во добрососедските односи.
Со сите овие искуства, подготвени сме да придонесеме во зајакнувањето и развојот на безбедноста на меѓународен план. Како претседавач со ОБСЕ во 2023 година, посветени сме мултилатеризамот да го надмине милитаризмот, што е врвен предизвик за Европа и светот, денес“ порача премиерот Ковачевски, во интервјуто за српскиот дневен весник „Политика“.
©Makfax.com.mk Доколку преземете содржина од оваа страница, во целост сте се согласиле со нејзините Услови за користење.

Македонија
(Видео) Бујар Османи: Предвремени избори ќе има во март или април

Кандидатот за градоначалник на Општина Чаир, Бујар Османи, ја коментираше изјавата на премиерот Христијан Мицкоски дека по локалните избори е можно одржување предвремени парламентарни избори, потврдувајќи дека според неговите сознанија и проценки, таквите избори ќе се одржат во март или април следната година.
„Тоа е всушност тоа што го кажувам јас и ние од почетокот, дека да, ќе има предвремени парламентарни избори некаде во март или април. И ова го кажувам најаргументирано, врз основа на сите разговори и договори што ги има на политичката сцена“, изјави Османи.
Тој додаде дека изјавата на премиерот само го потврдува она на што ДУИ и другите опозициски политички сили укажувале со месеци, дека сегашната влада е нестабилна и неодржлива.
„Се разбира дека на премиерот веројатно му требаа дополнителни аргументи, коишто сега ги гледа на терен, во односот на силите и тоа што се случува. Ситуацијата е неодржлива, и затоа веќе почна и тој да го спрема теренот“, рече Османи.
Тој истакна дека најавените избори ќе бидат можност да се избере нова влада со јасен европски и економски фокус.
„Јас ви тврдам дека предвремени парламентарни избори ќе има во март–април и ќе има нова влада која ќе го откочи европскиот процес, ќе го врати соживотот и економскиот просперитет на земјата“, порача Османи.
Македонија
Герасимовски и советниците спречија изградба на зграда: „Безбедноста на граѓаните на прво место“

На предлог на градоначалникот на општина Центар, Горан Герасимовски, Советот на општина Центар со 19 гласа „за“ и и еден воздржан донесе одлука за суспендирање на примената на градежна парцела во рамки на ДУП „Буњаковец 1.
Причината за суспензијата е изградба на објект чија реализација може да предизвика сериозни безбедносни и правни импликации. Градежната парцела се наоѓа на аголот на булеварите Климент Охридски и Митрополит Теодосиј Гологанов, а единствениот пристап до неа минува покрај студентскиот дом „Кузман Јосифовски-Питу“, каде се наоѓа резервоар со запаллива материја која се користи за греење, што претставува ризик од пожар и бара изработка на посебен елаборат со еколошки анализи и согласности, известува Општината.
Пристапот исто така минува преку подземни инсталации кои ја снабдуваат целата населба и студентскиот дом, како и преку објекти легализирани во минатото, пред повеќе години, за кои е потребна постапка за нивно отстанување , процес кој може да предизвика долги и комплексни правни последици.
Општината повеќе од две години работи на соодветно решавање на овој случај, но досегашните барања за соодветен сообраќаен проект не беа уважени од соодветните институции.
Поради тоа, се предлага суспензија за градење на конкретната градежна парцела се додека не се обезбедат безбедносни и правно сигурни услови за пристап и реализација на објектот, се наведува во соопштението на Општината.
„Мојот приоритет е безбедноста на граѓаните и инфраструктурата. Нема да дозволам да се загрози безбедноста на жителите на Центар, но истовремено ќе внимаваме да се заштитат интересите на сите инволвирани страни. Важно е да бидеме целосно сигурни дека сите услови се исполнети за да може да се гради објектот.Во меѓувреме, подготвуваме нов ДУП кој ќе ги реши овие прашања и ќе овозможи безбеден и законит пристап до парцелите“, истакна Герасимовски.
Македонија
Александар Трајановски: Централната пошта да стане Градски инспекторат и Центар за урбано планирање – време е за пресметка со дивоградбите и урбаниот хаос

Кандидатот за градоначалник на Град Скопје од коалицијата „Искуство за успех“, Александар Трајановски, најави конкретен план за обновување на Централната Пошта и нејзина трансформација во Градски инспекторат и Центар за урбано планирање.
„Ги засукуваме ракавите и влегуваме во директна пресметка со дивоградбите и урбаното дивеење во градот Скопје и општините. Повеќе нема да има недопирливи згради, бесправни градби и хаотичен развој. Време е институциите да си ја вратат својата сила,“ изјави Трајановски.
Со овој потег, еден од највпечатливите објекти на скопскиот модернизам ќе добие нова јавна функција со вистинска корист за граѓаните – место каде ќе бидат обединети сите градски инспекции и урбанистички служби, во транспарентен и ефикасен систем.
„Централната Пошта е дел од нашето културно наследство, но и од нашиот градски срам – ја оставивме да пропаѓа. Наместо да ја рушиме, ќе ѝ дадеме нова улога. Таа ќе стане симбол на ред, контрола и паметно урбано управување,“ изјави Трајановски.
Новиот Градски инспекторат ќе обедини повеќе од десет инспекциски служби – урбанистички, градежни, комунални, еколошки и сообраќајни. Просторот ќе биде отворен за јавноста, архитектите и стручната фела, со современи канцеларии, дигитални системи и сали за јавни консултации.
Дел од поширока визија – „Поправка на она што вреди“
Оваа иницијатива е дел од визијата за „поправка на она што вреди“ – враќање на животот во објектите што го обликуваа идентитетот на Скопје. Во истиот план се предвидени и:
· ГТЦ – нов дом на градската администрација, младите и културата,
· Кино Милениум – обновен културен простор и филмски центар,
· МКЦ – проширен центар за современа уметност и независна сцена.
„Скопје не треба да се гради одново – треба да се обнови со памет и љубов. Градот го измалтретиравме доволно, време е да го лекуваме,“ порача Трајановски.