Премиерот Димитар Ковачевски, денеска, во Гранада, Шпанија, ќе учествува на третиот самит на Европската политичка заедница. На самитот учествуваат лидери од вкупно 47 земји, од кои 27 земји членки на Европската Унија, земји од Западен Балкан, Швајцарија, Норвешка и Исланд, како и Азербејџан, Грузија, Турција и Украина. На самитот ќе земат учество и претседателката на Европската комисија, Урсула фон дер Лајен, како и претседателот на Европскиот совет, Шарл Мишел.

Програмата на самитот содржи пленарна сесија и дискусии на тркалезни маси поврзани со актуелни прашања за иднината на Европа.

Ковачевски ќе учествува на пленарна сесија, а потоа со лидерите на Шведска, Франција, Обединетото Кралство, Италија, Хрватска, Лихтенштајн, Бугарија и Албанија, како и Европската комисија и Европскиот парламент, ќе земе учество на тркалезната маса посветена на дигиталната транзиција и вештачката интелигенција. Во рамките на третиот самит на Европската политичка заедница предвидено е Ковачевски да оствари и билатерални средби со премиерот на Холандија, Марк Руте, и со премиерот на Ирска, Лео Варадкар.

Европската политичка заедница е платформа за политичка координација за европските земји од континентот, чија цел е да ги собере лидерите од европските земји во духот на еднаквоста и единството двапати годишно. Првиот самит на Европската политичка заедница се одржа во Прага во октомври 2022 година по што во јуни годинава следуваше самит во Кишињев, Молдавија.

За време на посетата на Гранада, Шпанија, Ковачевски ќе биде придружуван од сопругата Елена Ковачевска. Таа во рамките на самитот има повеќе активности во програмата, а ќе го придружува Ковачевски на свечената вечера организирана од кралот и кралицата на Шпанија.